Ermənistanın ədliyyə naziri Srbuhi Qalyan Ədliyyə naziri yanında İctimai Şuranın ilk iclasında bildirib ki, Ermənistanın yeni Konstitusiya layihəsinin mətni artıq hazırdır, hakim Vətəndaş Müqaviləsi Partiyasının idarə heyətinin iclasında və eyni adlı parlament fraksiyasında müzakirəyə çıxarılacaq.
Musavat.com erməni mediasına istinadən xəbər verir ki, nazir qeyd edib ki, Konstitusiya İslahatları Şurası hər həftə iclaslar keçirir:
“Söz verdiyim kimi, mətn də hazırdır. Lakin hələlik onun dərc olunması ilə bağlı heç bir xəbərim yoxdur, çünki mətnin Vətəndaş Müqaviləsi Partiyasının idarə heyəti və parlament fraksiyası ilə də müzakirə edilməsi qərara alınıb. Bundan sonra onun dərc olunması ilə bağlı qərar veriləcək”, - deyə nazir bildirib.
O həmçinin, Ermənistan Respublikasının yeni Konstitusiya layihəsinin konseptual müddəalarının əvvəllər hazırlandığını və mətnin bu müddəalara əsaslandığını vurğulayıb.
Milli Məclisin deputatı Hikmət Babaoğlu Musavat.com-a şərhində Paşinyanın bir neçə il öncəki açıqlamasını xatırladıb: “Ermənistan Konstitusiyasının yeni mətninin hazırlanması ilə bağlı əvvəlcədən proqnozlaşdırılan məsələlər özünü doğrultdu. Artıq yeni layihənin ictimai müzakirələrə təqdim olunması gözlənilir. Mənə elə gəlir ki, Azərbaycanı maraqlandıran əsas məsələ-Ermənistanın yeni Konstitusiyasında Preambula hissəsinin olub-olmaması məsələsi də öz həllini tapıb.
Çünki bir neçə gün öncə Paşinyan deyib ki, yeni mətndə Preambula olmayacaq. Dolayısı ilə, Azərbaycana qarşı ərazi iddiası məsələsi də yeni mətndə olmayacaq. Paşinyan bir qədər irəli gedərək bildirib ki, yeni Konstitusiya mətninə səs verənlər sülhə, səs verməyənlər isə müharibəyə səs vermiş olacaqlar. Məncə, bu, erməni cəmiyyətinə ötürülən ən obyektiv və ən dəqiq mesaj idi. Ermənistan cəmiyyəti bilməlidir ki, yeni Konstitusiyada Azərbaycana qarşı ərazi iddiası olacaqsa, nə paraflanmış sülh sənədi imzalanmayacaq, nə də qismən açılmış kommunikasiya və ticarət əlaqələri bərpa olunmayacaq. Ermənistan cəmiyyəti yeni Konstitusiya layihəsinə səs verən zaman iki dəfə düşünməlidir, nəyi seçirlər- sülhü ya müharibəni? Məncə, hazırkı şərtlərdə biz sülhə daha yaxınıq”.
