Bakı Ağır Cinayətlər Məhkəməsində oğurluqda təqsirləndirilən G.Abdullayevanın cinayət işi üzrə məhkəmə istintaqı başa çatıb.

Pravda.az-ın əldə etdiyi məlumata görə, hakim Vüqar Seyidovun sədrliyi ilə keçirilən prosesdə hökm oxunub.

Məhkəmənin hökmü ona 2 il 6 ay müddətə azadlığın məhdudlaşdırılması (elektron qolbaq) cəzası təyin edilib.

İttihama əsasən, G.Abdullayeva tamah niyyəti ilə özgənin əmlakını gizli şəkildə talamaq məqsədilə 2025-ci ildə zərərçəkmiş Orxan Tağıyeva (soyadı şərtidir) məxsus paytaxt ərazisində yerləşən evdə xadimə işləyərkən cinayət əməli törədib.

Belə ki, təqsirləndirilən şəxs evin yataq otağını təmizlədiyi zaman güzgülü dolabın üzərində zərərçəkmiş şəxsə məxsus üzüyü görüb.

Söhbət həmin vaxtın məzənnəsi ilə 25 500 manat dəyərində olan 15 000 ABŞ dolları məbləğində qiymətləndirilən, 11 qram çəkidə, 18 karatlı, brilyant qaşlı bir ədəd qızıl üzükdən gedir.

G.Abdullayeva üzüyü gizli şəkildə götürərək cibinə qoyub.

Bundan sonra o, həmin otaqda saxlanc yeri hesab olunan güzgülü dolabın siyirməsinə qanunsuz daxil olaraq daha iki üzüyü də götürüb. Digər iki üzüyün qiyməti 55 000 manat göstərilib.

Beləliklə, təqsirləndirilən şəxs ümumilikdə 80 500 manat dəyərində əmlakı gizli yolla ələ keçirərək zərərçəkmiş şəxsə külli miqdarda maddi ziyan vurmaqla oğurluq edib.

Məhkəmədə ifadə verən G.Abdullayeva ittiham üzrə özünü təqsirli bilib.

O deyib ki, Orxan Tağıyevin evində xadimə işləyib və üzükləri həmin evdən götürüb. Təqsirləndirilən şəxsin sözlərinə görə, üzüyü götürdükdən sonra “Moskva” Univermağında 1 300 manata satıb. Bir neçə gün sonra digər üzüyü də həmin yerdə 4 000 manata satıb.

O, hadisədən bir neçə gün sonra oğurluğun üstünün açıldığını bildirib.

Təqsirləndirilən şəxs törətdiyi əmələ görə peşman olduğunu deyib.

Məhkəmədə verilən sualları cavablandıran G.Abdullayeva deyib ki, üzükləri satarkən onların özünə məxsus olduğunu deyib.

Onun sözlərinə görə, üç azyaşlı övladı var və zərərçəkmiş şəxslə barışıblar.

Təqsirləndirilən şəxs üzüklərin hər üçünün geri qaytarıldığını bildirib.

O, həmçinin qeyd edib ki, üzüklərin satışından əldə etdiyi pulları xərcləməyib. Üzüklərdən birini ümumiyyətlə satmayıb və evində saxlayıb. Digər iki üzüyü isə satdığı yerdən geri alıb.

Məhkəmədə Orxan Tağıyev də ifadə verib. O bildirib ki, 2025-ci il tarixlərdə həyat yoldaşı evdə olan üzüklərin itdiyini deyib. Bundan sonra polisə müraciət edilib və faktla bağlı cinayət işi başlanıb.

Zərərçəkmiş şəxs məhkəmədə G.Abdullayeva ilə barışdıqlarını söyləyib. O, təqsirləndirilən şəxsə qarşı heç bir şikayət və tələbinin olmadığını deyib.