Ali Məhkəmədə xüsusi amansızlıqla qəsdən sağlamlığa ağır zərər vurmada təqsirləndirilən Həcər Hüseynovanın barəsindəki qərardan verilən kassasiya şikayəti üzrə məhkəmə iclası başa çatıb.

Pravda.az-ın əldə etdiyi məlumata görə, hakim Teyyub Muxtarovun sədrliyi ilə keçirilən prosesdə qərar elan olunub.

Qərara əsasən, kassasiya şikayəti təmin edilməyib.

İttihama görə, hadisə 2024-cü ilin avqust ayında saat 20 radələrində Bakı şəhəri, Sabunçu rayonu, Bakı Olimpiya Stadionunun yaxınlığında baş verib.

Belə ki, Həcər Hüseynova avtomobildə tanışı, zərərçəkmiş Azər Ağayevlə şəxsi münasibətlər zəminində mübahisə edib. Mübahisə zamanı təqsirləndirilən şəxs zərərçəkmişə xüsusi əzab və iztirab verdiyini dərk etdiyi halda, buna məhəl qoymayaraq onu cəzalandırmaq məqsədilə əvvəlcədən əldə etdiyi kimyəvi maddədən istifadə edib.

Qadın içərisində aşılandırıcı kimyəvi maddə (“kislota”) olan plastik butulkanı əl çantasında özü ilə gətirib. Daha sonra butulkanın qapağını açaraq içərisindəki “kislota”nı Azərin üz və baş nahiyəsinə töküb. Hadisə nəticəsində Azərin bədəninin müxtəlif nahiyələrində ağır kimyəvi yanıq xəsarətləri yaranıb.

Məhkəmə materiallarında göstərilir ki, zərərçəkmişin sağ sifət, sağ qulaq seyvanı, boyun, döş qəfəsi, sağ bazu və sağ said, sol bazu-çiyin qurşağı, sol said, qarının ön divarı və hər iki bud nahiyələrində ümumi bədən səthinin 30-35 faizini əhatə edən II-III dərəcəli kimyəvi yanıq yaraları əmələ gəlib.

Bundan əlavə, sağ çiyin qurşağı nahiyəsində ümumi bədən səthinin 1 faizədək hissəsini əhatə edən I dərəcəli kimyəvi yanıq xəsarəti müəyyən olunub.

Ekspertiza nəticəsinə əsasən, həmin xəsarətlər ümumilikdə həyat üçün təhlükəli olan sağlamlığa ağır zərər kimi qiymətləndirilib.

İttihama görə, Həcər Hüseynovanın hərəkətləri xüsusi amansızlıqla və zərərçəkmişə ağır iztirablar verməklə törədilib.

Bakı Ağır Cinayətlər Məhkəməsinin hökmü ilə Həcər Hüseynova Cinayət Məcəlləsinin 126.2.3-cü maddəsi ilə nəzərdə tutulan cinayət əməlini törətməkdə təqsirli bilinib. Ona 6 il müddətinə azadlıqdan məhrumetmə cəzası təyin edilib. Təqsirləndirilən şəxsin cəzasını ümumi rejimli cəzaçəkmə müəssisəsində çəkməsi qərara alınıb.

Məhkəmə, həmçinin zərərçəkmiş şəxsin mülki iddiasına da münasibət bildirib. Belə ki, zərərçəkmiş və mülki iddiaçı Azər Ağayevin mülki iddiası qismən təmin edilib və Həcər Hüseynovadan 3 200 manat tutulularaq zərərçəkmişə ödənilməsi qərara alınıb. Hökmdən zərərçəkmiş Azər Ağayev apellyasiya şikayəti verib. Bakı Apellyasiya Məhkəməsinin qərarı ilə zərərçəkmiş şəxsin apellyasiya şikayəti təmin edilməyib. Birinci instansiya məhkəməsinin hökmü apellyasiya şikayətinə münasibətdə dəyişdirilmədən saxlanılıb.