Bakı-Tbilisi sərnişin qatarına biletin əvvəlcə tapılması, sonra alınması, indi isə geri qaytarılması problemi ortaya çıxıb. Həmkarımız Elnurə Abuşova Bakı-Tbilisi qatarına geri dönüşə aldığı bileti qaytarmaq istədikdə ondan buna görə faiz tutulub.
Həmkarımız bildirir ki, ADY kassalarında belə bir vəziyyət yaşanır. Vətəndaşları məcbur edirlər ya faiz tutularaq biletlərini geri qaytarsınlar, ya da AZAL-ın bahalı təyyarə biletlərini almağa məcbur qalsınlar.
Nəqliyyat və logistika məsələləri üzrə mütəxəssis Rauf Ağamirzəyev “Sherg.az”a açıqlamasında bildirdi ki, Bakı-Tbilisi sərnişin qatarına bilet problemi emosional deyil, rasional qiymətləndirilməlidir:
- 26 may tarixində ilk reys xəttə buraxılanda mən İctimai Televiziyanın “Sabaha saxlamayaq” proqramında ADY Sərnişin Daşınması Departamentinin rəhbəri Azər Fərəcova o zaman da bu fikri bildirmişdim ki, tələb böyük, təklif isə məhduddur. Milyonluq Azərbaycan və Gürcüstan arasında - Bakı və Tbilisi şəhərləri arasında sərnişin qatarına ilkin olaraq 118, sonra 150, 178, daha sonra yerlərin sayı 356-a çatdırıldı, bu rəqəmlər çox cüzidir, yüksək tələb qarşılığında. Quru sərhədlərin bağl olduğu, yalnız hava nəqliyyatı və indi də dəmir yolu ilə hərəkətin mümkün olduğu halda, maraq daha da çoxalacaq. Vaqon sayını artırmaqla daha çox sərnişin daşıya bilərik. Burada sinif fərqi var, lyüks sinifli - 2 yerlik 16 nəfərlik vaqon, kupe - 4 yerlik 34 nəfərlik vaqon, yaxud da plaskart dediyimiz vaqondur ki, 58 nəfər daşımaq olur. Bakı-Tbilisi sərnişin qatarı açılanda qeyd etdilər ki, əlimizdə yetərli vaqon yoxdur. Beə olduqda yeni qatara köhnə vaqonlar qoşmaq təcrübəsindən istifadənin mümkünlüyü göründü. Bunun ayrı rəqəmlərlə qeyd olunması onu göstərir ki, yaxın gələcəkdə dublyor qatar formalaşdırmaq hədəfi qarşıya qoyulub. Bu ilk gündən bizim tərəfimizdən səsləndiriıən fikir idi ki, tələbi qarşılamaq üçün fərqli-fərqli təkliflər formalaşdırılsın. Mövcud qatar reysinin Batuma qədər uzadılması vacibdir. Bizim 45 mnlik tələbə kontingentimiz var, Türkiyədə təhsil alırlar. Onlar üçün sərhəddə gəlib Batumda qatara minib Vətənə qayıtmağın daha rahat yolu olar. İkinci məsələ, dublyor qatar məsələsidir ki, bu, köhnə qatar da ola bilər. Təmir olunub xəttə buraxılar. Bununla plaskart vaqonların sayını artırmaq olar. Üçüncü variant oturaq tipli qatarın təşkil olunmasıdır. Bu reysləri sərhədyanı bölgələrə təşkil etmək olar. Gün ərzində bur neçə reysin təşkil olunması ciddi alternativ olar. Ağstafa ilə Tbilisi arası 104 kilometrdir. Belə reyslər təşkil olunsa, həm Tbilisinin yükünü götürər, həm də Ağstafadan sərnişinləri ötürmə imkanı yaradar. Bakıdan Ağstafaya hər gün 26 reys avtobus hərəkət edir, oradan da Tbilisiyə sərnişin qatarı ilə hərəkət təşkil olunsa, bu, ən yaxşı alternativ olacaq. Bu, sərhəddə daha sürətli keçid imkanı yaradar.
R.Ağamirzəyev qeyd etdi ki, sərhəd-keçid prosedurunun optimallaşdırılması da vacib məsələdir:
- Qatarların daha sürətli keçidini təmin etmək üçün ortaq yoxlamalar təşkil etmək olar ki bu, vaxtın optimallaşdırılmasına zəmin yaradar. Qatarların intensiv hərəkəti təmin olunar, narazlıqlar da aradan qalxar. Gürcüstan tərəfi bununla bağlı razılığını, onlar tərəfdən heşbir problem olmadığını artıq bildirib. Biletlərin qaytarılması məsələsinə gəlincə, 2 ildir dinamik tarif siyasətinə keçilibsə və bunu beynəlxalq reyslərə də tətbiq ediriksə, biletin alış qiyməti elan olunmuş 90 günə daha sürətli keçid təmin olunmalıydı, indi 30-dan 44-ə qaldırılıb, düşünürəm ki, növbəti mərhələni gözləmədən 6 ay və hətta 1 ilə qədər uzadılması vacibdir. Niyə bu vacibdir, çünki vətəndaşın əlçatan biletə çıxışı rahatlaşır. Səfərlər öncədən proqnozlaşdırıla bilir. Bu, dəmir yolu üçün də sərfəlidir, dəmir yolunun dayanıqlı fəaliyyətinə zəmin yaradır. Biletin alınması, qaytarılması şərtləri qanunvericiliyə uyğun təşkil olunub. Faizlər biletin qaytarılma vaxtından asılı olaraq tutulur. Düşünürəm ki, narazılığın kökü tələbin çox, təklifin az olmasıdır. Alternativlər mütləq nəzərdən keçirilib, tez bir zamanda tətbiqinə başlanmalıdır.
