Aktyor burada Azərbaycan milli mətbəxinin nümunələrindən dadıb. Restoranda səsləndirilən canlı muğam ifası isə Ceki Çanın diqqətini çəkib. Hollivud ulduzu ifanı telefonunun kamerası ilə lentə alaraq həmin anları yaddaşına köçürüb. Moderator.az-ın araşdırmasına görə, dünya ulduzu üçün muğam ifası səsləndirən xanəndə Miri Zadə olub:

“Ceki Çan səhnə aldığım restorana qonaq idi. Yarım saata yaxın milli musiqimizi onun üçün ifa etdik. Çox maraqla qarşılandı, telefonunu götürüb lentə aldı. Yaxından ünsiyyətimiz olmadı. Uşaqlıqdan filmlərini izlədiyimiz, sevdiyimiz aktyorla eyni mühitdə olmaq əlbəttə ki, gözəl bir hiss idi. Bizim kamança ifaçımız Nurəddin Tağıyev onların xalq mahnısını ifa etdi. Bu da onlar tərəfdən maraqla və təəccüblə qarşılandı. Çox insan videoya rəy yazıb bildirir ki, bu real görüş deyil, süni intellektdir. Bu da normaldır. Çünki Ceki Çan əlçatmaz sənətkardır, hər kəs onunla görüşüb, şəkil çəkdirmək istəyir. Amma bu baş tutmadığına görə süni intellekt vasitəsilə fotoşop edirlər. Şanslıyıq ki, bizi bu tədbirə dəvət etdilər. Həmin məkanın rəhbərliyinə buna görə xüsusi təşkkür edirəm”.

“Əslində bizim bir layihəmiz var idi. 2 aya yaxındır onun üstündə işləyirik. Həmin layihəni paylaşıb, təqdim etmək istəyirdik ki, Ceki Çanla gündəm dəyişdi (gülür). Yeni işimiz də “Tel oynasın” adlı məşhur mahnını ifa edib, ona klip çəkdirməyimizdir. Artıq sosial şəbəkə hesabımızda (@mirizadehmusic) paylaşılıb. Mən Mədəniyyət və İncəsənət Universitetində, Əməkdar artist Bəsti Sevdiyevanın sinfində təhsil almışam. Ondan öncə də Xan Şuşinski adına Ağdam musiqi məktəbində oxumuşam. Orada da müəllimim Əməkdar artist Səbuhi İbayev olub. Əlavə olaraq keçmiş xanəndələrimizin bütün ifalarına qulaq asıb, muğamın sirlərini öyrənmişik. Hələ də öyrənirik. Vaxtaşırı olaraq dövlət tədbirlərində də çıxış edirik”.