İmişli rayonu, Cəfərli kənd sakini Əliyev İsmayıl Abdulla oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi narazılıq edir:

“Mən, Əliyev İsmayıl Abdulla oğlu, yazaraq xahiş edirəm ki, problemimi işıqlandırasınız.

Bildirim ki, şikayətim İmişli rayonu İcra və Probasiya şöbəsinin icra məmuru Ramil Paşayevdəndir. Belə ki, keçmiş həyat yoldaşım Ağayeva Gülnarə Adil qızı və onun yaxın qohumları icra məmurunu ələ alaraq, başıma oyun açırlar.

Qeyd edim ki, 2016-ci ildə yoldaşım boşanma üçün məhkəməyə müraciət edib və hakim iddianı təmin edib. Həmin vaxt ölkə xaricində olmuşam. Nə məhkəmədən, nə də boşanmadan xəbərim olmayıb. Azərbaycanda olmadığım tarixdə "icra məmurunun yanında olub, hansısa sənədə imza atmışam" kimi göstəriblər. Guya mən demişəm ki, aliment borcunu ödəyə bilməyəcəm. Halbuki həmin vaxt mən xaricdə olmuşam.

Azərbaycana gələndən sonra bilmişəm ki, 4900 manat aliment borcum yığılıb. Boşanmadan xəbərim olmadığı üçün ailəmin dolanması üçün yoldaşımın, onun dayısının oğlunun və bacanağımın adına pullar göndərmişəm. İcra məmuru isə sənədlərdə qeyd edir ki, guya məni məcburi çağırıblar.

Mən öz istəyimlə ölkəyə gəlmişəm. Azərbaycana gələndən 1 ay sonra İmişli Rayon Məhkəməsi məni həbs edib və qanunsuz olaraq 15 gün içəridə saxlayıblar.

Onu da qeyd edim ki, keçmiş yoldaşım Gülnarə, qardaşı Ağazadə Vüsal, xalası oğlu Quliyev Vüqar, dayısının yeznəsi Hacıyev Elşən xəbərim olmadan mənə məxsus mal-qaranı İmişli rayon mal bazarında satıblar. Xalsı oğlu Vüqar bunu mənə notarial qaydada sübut edib. Mənə məxsus mal-qaranı satıb, özlərinə Bakı şəhərində ev alıblar.

Həyatım demək olar ki, təhlükədədir. Xəbərim olmadan başıma oyun açıblar. Bu yazdıqlarım onların mənə etdiyi qanunsuzluqların yalnız bir faizidir. Sizin sayt vasitəsilə, başda Ədliyyə naziri Fərid Əhmədov olmaqla, səlahiyyətli qurumlara müraciət edirəm. İcra məmurları açıq-aşkar reketçiliklə məşğuldurlar, tədbir görün”.