Vətən müharibəsi iştirakçısı Kənan Qasımov deyir ki, 44 günlük müharibə zamanı Şuşa istiqamətində gedən döyüşlərdə iştirak edərkən düşmən artilleriya atəşi nəticəsində kəllə-beyin travması alıb.

"DİA-AZ"ın məlumatına görə, Qasımov bildirir ki, 4 ildir əlillik dərəcəsinin təyin olunması üçün müraciətlər etsə də, bu müraciətlərə mənfi cavab verilir. O iddia edir ki, Əlilliyin Bərpa Mərkəzində 7 nəfərlik həkim komissiyası onun müraciətini əsaslandırılmamış şəkildə rədd edib.

Şikayətçi iddia edir ki, həmin komissiyanın üzvləri Kənan Qasımova “Səni döyüşə biz göndərməmişik” kimi ifadələr işlədərək, əlillik təyin etməmək üçün min cür bahanələr gətirir.

Vəziyyətinin ağır olduğunu və həyat şəraitinin gündən-günə pisləşdiyini deyən müharibə iştirakçısı qeyd edir ki, artıq hüquqlarının tapdanmağından yorulub və birbaşa ölkə başçısına müraciət edərək, sosial müdafiə nazirinin və əməkdaşlarının vətən yolunda sağlamlığını fəda edənlərə qarşı ədalətsiz yanaşmasının araşdırılmasını və həmin məmurlar barədə ölçü götürməsini, eyni zamanda hüquqlarının bərpa olunmasını üçün ona kömək etmələrini xahiş edir.