Azərbaycanda yeni il tətilidir. Dekbarın 30-dan 7 gün qeyri-iş günü elan edilib. Bayram tətilindən sonra ilk iş günü yanvarın 6-da olacaq. Amma ölkəmizin bəzi dövlət orqanları gücləndirilmiş iş rejimində çalışır. Strateji postlara rəhbərlik edən vəzifəli şəxslər öz işlərinin başındadır.
Dekabrın 31-də Naxçıvan Muxtar Respublikasının yerli mediası Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəflinin, dövlət və hökumət nümayəndələrinin Naxçıvan şəhərinin Heydər Əliyev prospektində təşkil olunan “Snowfest – Qış festivalı”na hazırlığın vəziyyəti ilə maraqlandığı, sakinlərlə səmimi söhbət edib, uşaqlarla xatirə fotoları çəkdirdikləri ilə bağlı məlumat yayıb.
Yanvarın 2-də isə yerli media Naxçıvan Dövlət Milli Dram Teatrında şəhid və qazi övladları, həmçinin sosial qayğıya ehtiyacı olan uşaqlarla keçirilən bayram görüşündən xəbər verib. Bildirilib ki, Naxçıvan Dövlət Milli Dram Teatrının kollektivi yazıçı Eluca Atalının qələmə aldığı "Odunçunun nağılı" əsəri əsasında hazırladığı tamaşanı təqdim edib. Naxçıvan Muxtar Respublikasında Azərbaycan Respublikası Prezidentinin səlahiyyətli nümayəndəsi Fuad Nəcəfli “yaşıl enerji”yə keçid, təbiətin mühafizəsi, ekoloji təmizliyə çağırış ideyalarını təşkil edən tamaşanı uşaqlarla birlikdə izləyib.
Səlahiyyətli nümayəndə Fuad Nəcəfli çıxış edərək qeyd edib ki, müstəqilliyimizin ilk illərində Vətənimiz gözlənilməz bəlalarla üzləşib. Şəhid və qazilərimizin fədakarlıqları sayəsində yurdumuz bu bəlalardan xilas olub, torpaqlarımız işğaldan azad edilib. Qəhrəmanlarımızın övladları ilə qürur duyduğunu diqqətə çatdıran səlahiyyətli nümayəndə uşaqlara bayram təbriklərini və xoş arzularını çatdırıb.
Bu məlumatlarla tanış olduqdan sonra muxtar respublikanın rəhbər vəzifəli şəxslərinin ötən bayramlardan fərqli olaraq, Naxçıvanda qalıb öz işlərinin başında dayanmasını əhali rəğbətlə qarşılayıb. İnsanlar hesab edirdi ki, muxtar respublikanın rəhbər vəzifəli şəxsləri bayram tətilini Naxçıvanda keçirir.
Son illər Naxçıvanda baş verən hadisələrin təhlili, rəhbər vəzifəli şəxslərin proseslərə məsiliyyətsiz yanaşması bu məsələdə bizdə müəyyən şübhələr yaratmışdı. Necə olub ki, ailə üzvləri Bakı şəhərində yaşayan vəzifəli şəxslər bu bayram tətilində paytxata üz tutmayıb?
TNS-in əməkdaşları bu suala cavab tapmaq üçün araşdırma aparıb. Məlum olub ki, yerli mediada verilən xəbərlər gözdən pərdə asmaqdan başqa bir şey deyilmiş. Sən demə, səlahiyyətli nümayəndə Fuad Nəcəfli, onun müavini Samir Seyidəhmədli, Ali Məclis sədrinin birinci müavini Bəxtiyar Məmmədov dekabrın 30-dan Naxçıvandan çıxıblar. Dekabrın 31-də və yanvarın 2-də ictimaiyyətə təqdim edilən tədbirlər isə dekabrın 29-da keçirilib. Bu vəzifəli şəxslərin bayram tətilini Bakıda öz ailələri ilə birlikdə keçirdiklərinə dair məlumatlar var. Sual olunur. Naxçıvanda baş verə biləcək fövqəladə hadisə zamanı muxtar respublikada olmayan rəhbərlər prosesi necə idarə edəcəklər? Naxçıvanı başsız qoyub paytaxta qaçmaqla, özü də gündə bir xəbər yaydırıb muxtar respublikda olduqları görüntüsünü yaratmaqla kimi aldadırlar? Axı Naxçıvanda yaşamaq, işləmək sizin üçün bu qədər çətindirsə, gedin, istefa ərizənizi yazın, Bakıda çalışmaq istəyinizi bildirin. Həftənin 5-ci günündən paytaxta qaçanlar, bayram tətilindən bir neçə gün də sonra Naxçıvana qayıdanlar öz hərəkətləri ilə göstərirlər ki, onların muxtar respublika əhalisinə xidmət etmək fikirləri yoxdur. Fikri paytaxtda qalan çalışdığı yerdə məhsuldar fəaliyyət göstərə bilməz.
TNS dəqiqləşdirib ki, Bakıdan Naxçıvana göndərilən yüksək vəzifəli şəxslərdən yalnız bir neçəsi bayram tətilini muxtar respublikada keçirir. Onlardan biri də Naxçıvan Şəhər İcra Hakimiyyətinin başçısı Cabbar Musayevdir. Biz naxçıvanlılara dəyər verib birinci bayram tətlini muxtar respublikada keçirdiyinə görə, cənab icra başçısına redaksiyamıza müraciət edən Naxçıvan sakinlərinin təşəkkürünü çatdırırıq.
Bəli, məsuliyyət hissini itirəndə belə primitiv formada gözdən pərdə asmağa çalışırlar.
Bu qədər də olmaz axı...
