Azərbaycanda çoxmənzilli binaların idarə olunması məqsədilə yaradılan Mənzil Mülkiyyətçilərinin Müştərək Cəmiyyətlərinin (MMMC) fəaliyyəti ilə bağlı narazılıqlar zaman-zaman gündəmə gəlir. Jurnalist Elman Eldaroğlu da yaşadığı Binəqədi rayonundakı 9-cu mikrorayon, Mir Cəlal küçəsi 143A ünvanında yerləşən binanı idarə edən “Binəqədi-38” MMMC-nin fəaliyyəti barədə bir sıra iddialar səsləndirib.

Modern.az-ın məlumatına görə, E.Eldaroğlu bununla bağlı deyib:

"Azərbaycanda ilk Mənzil Mülkiyyətçilərinin Müştərək Cəmiyyəti (MMMC) 2014-cü ilin yanvar ayında dövlət qeydiyyatına alınıb. Bu hüquqi şəxslərin yaranması ölkədə Mənzil Məcəlləsinin tətbiqi və çoxmənzilli binaların idarə edilməsində yeni üsulların təbliği ilə bağlı həyata keçirilir. Fəqət, ölkədə MMMC-lərin fəaliyyətinə nəzarət edən konkret bir qurum yoxdur. Guya idarəetmə və nəzarət binada mülkiyyət payı olan sakinlərə həvalə edilib. Bu da özbaşınalığa, saxtakarlığa yol açır. Məsələn, yaşadığım 9-cu mikrorayon, Mir Cəlal küçəsi 143A binasını “Binəqədi-38” MMMC idarə edir. Bu MMMC-nin rəhbərliyi qanunvericiliyin tələblərinə uyğun heç bir yığıncaq-seçki keçirmədən, sakinlərə başqa adla imza atdıraraq MMMC-ni 29 mart 2024-cü ildə Ədliyyə Nazirliyində qeyri-kommersiya hüquqi şəxs kimi dövlət qeydiyyatına sala bilib. Bu barədə Ədliyyə Nazirliyinə rəsmi müraciət etsək də, bizə yerli məhkəməyə müraciət etmək tövsiyə olunub.

Buradan belə çıxır ki, bir neçə sakin mülkiyyətçilərin yığıncağını keçirmədən digər sakinlərdən imza toplamaqla binanın idarəetməsini asanlıqla ələ keçirə bilər. Çünki qeydiyyata götürən orqan daxil olan sənədlərin doğruluğunu yoxlamır. Bundan əlavə, artıq iki il beşinci aydır ki, “Binəqədi-38” MMMC VÖEN olmadan fəaliyyət göstərir. Burada çalışan hər kəs, yəni komendant, təmizlik üzrə xadimə, inzibati işçi, mühafizəçilər rəsmi əmək müqaviləsi olmadan çalışır. Bu barədə Dövlət Vergi Xidmətinə, Dövlət Əmək Müfəttişliyinə, DOST Agentliyinə dəfələrlə müraciət etsək də, səsimizi eşidən yoxdur.

Kommunal haqları nağd və ya da ki, kiminsə adına açılan şəxsi kart hesabına toplanır. Hansı ki, Azərbaycan Respublikasının “Nağdsız hesablaşmalar haqqında” Qanununun 3.4.5-ci maddəsinə görə stasionar telefon xidmətləri və kommunal xərclərin ödənilməsi yalnız nağdsız hesablaşma qaydasında aparılmalıdır.
Odur ki, “Binəqədi-38” MMMC-nin sədri işləyən Eldar Səfərovun sakinlərə hər ay təqdim etdiyi möhürsüz, imzasız hesabatı da şübhəlidir.

Bundan əlavə, binanın sakinləri arasında illərlə kommunal haqqını ödəməyən adamlara qarşı heç bir hüquqi addım atılmır. Sanki Eldar Səfərov özü belə sakinləri qoruyur. Nəticədə, kimlərsə liftlərin, su nasoslarının, mühafizə xidmətinin, təmizləyicinin, daxili və xarici işıqlandırmanın məsrəflərindən müftə istifadə edir. Büdcədən yoxa çıxan vəsaitin hesabatını soruşanda isə sədr heç bir rəsmi əmək müqaviləsi olmadan, qeyri-qanuni işləyən komendantın üstünə atır. Komendant isə çiyinlərini çəkir.

Mülkiyyətçilərlə hesablaşmadan yığılan kommunal haqlarından böyük məbləğ sərf edib mənasız yerlərə xərclənir. Binada yanğın əleyhinə mərtəbələrdə quraşdırılan bütün avadanlıqlar bərbad haldadır. FHN-ə şikayət edəndə də sahə üzrə inspektor gəlib faktı təsdiq edir, amma heç bir nəticə olmur. Mərtəbələrdə yanğın əleyhinə avadanlıqlar bərpa olunmur ki, olunmur. Anlaya bilmirəm, binada qəfil yanğın baş verərsə, tələf olan insanlara görə kim cavabdehlik daşıyacaq?

Bina başdan-ayağa avtopilot rejimində idarə olunur. Mənzillərin əksəriyyətində mətbəxlər balkona köçürülüb və mətbəxlərin kanalizasiya sistemi yağış suları üçün nəzərdə tutulan borulara qoşulduğu üçün binanın müxtəlif yerlərindən süzülən çirkab sular blokdakı sahələrə dolur.

Binada elektrik maşınlarının şarj edilməsi üçün qeyri-qanuni quraşdırılan avadanlıqların qarşısını almaqdan ötrü MMMC-nin rəhbərliyi heç bir iş görmür. Şikayət edəndə də MMMC-nin sədri və idarə heyəti sayğısızlıq göstərib cavab vermək istəmir.

Ümummülkiyyətə aid olan sahələrdə avtomobillərin parkinq edilməsi qanunla qadağan olsa da, həmin yerlərdə MMMC-nin sədri Eldar Səfərovun çevrəsində olan şəxslər avtomobillərini park edir. Binanın su anbarı illərlə təmizlənib dezinfeksiya olunmur. Zirzəmilərdə qarajların jalüzlə bağlanması yanğın zamanı tüstünün qatılaşmasına bir zamindir.

Birdirmi, ikidirmi “Binəqədi-38” MMMC-nin problemləri, saymaqla bitməz. Haraya şikayət etsən də, nəticəsi olmur ki, olmur. İctimailəşdirdim ki, bəlkə kimsə bu qeyri-qanuni fəaliyyətin qarşısını ala bilər. Qanuni dövlətdə belə də qurum olar?.."

“Binəqədi-38” MMMC-nin sədri Eldar Səfərov və idarə heyətinin şikayətdə səsləndirilən iddialara münasibəti məlum deyil. Məsələ ilə bağlı aidiyyəti dövlət qurumlarının və “Binəqədi-38” MMMC rəhbərliyinin mövqeyini dərc etməyə hazırıq.