Təxminən 8-10 ilin söhbətidir. Bir neçə deputat - içlərində komitə sədri də var - qəfildən açıqlama verdilər ki, Azərbaycan Kollektiv Təhlükəsizlik Müqaviləsi Təşkilatının üzvü olmalıdır. Hardan çıxdı bu məsələ? Rusiyanın yaratdığı təşkilat, işğalçı Ermənistanın - o vaxt torpaqlarımızı işğaldan azad etməmişdik - təmsil olunduğu qurum... Azərbaycan niyə burda olmalıdır?

Axar.az xəbər verir ki, bu sözləri Elxan Şahinoğlu Prezident Administrasiyasının sabiq rəhbəri Ramiz Mehdiyevin Rusiyanın adamı olması və millət vəkillərinin də bu prosesdə iştirakı haqda “Media Türk” kanalına danışarkən deyib.

O bildirib ki, həmin deputat və komitə sədri ilə bir ay qiyabi polemika aparıb:

“Onların zəif bir arqumenti vardı - guya biz KTMT-yə üzv olsaq, Rusiyadan daha ucuz silah ala bilərdik. Onda mən bildirdim ki, təzəlikcə Rusiyadan 5 milyard dollarlıq silah-sursat almışıq və Nəcməddin Sadıqovun sayəsində onların yarısı keyfiyyətsiz və zaydır. Niyə biz yenə keyfiyyətsiz silah almağa davam etməliyik?

Hiss etdim ki, bu dəst-xətt (Azərbaycanın KTMT-yə üzv olması təklifi - red.) Ramiz Mehdiyevdən gəlir. Ramiz Mehdiyevin dəstəyi ilə seçilən deputatlar bu məsələni gündəmə atıblar, müzakirəyə çıxarıblar, məqsəd də nəbz yoxlamasıdır. Əlbəttə ki, Ramiz Mehdiyevin sifarişi ilə”.

E.Şahinoğlu xatırladıb ki, həmin ərəfədə Prezident İlham Əliyevin xarici səfərlərindən birində rusiyalı jurnalist “Azərbaycan KTMT üzvü olmaq istəyərmi” sualını verib:

“Bu sualın verilməsi ilə anladım ki, ölkəmizdə bu mövzunu gündəmə gətirmək elə Kremlin istəyidir və bir mərkəzdən idarə olunur.

İlham Əliyev çox konkret bir cavab verdi, dedi ki, Azərbaycanın hərbi bloklara qoşulmaq niyyəti yoxdur”.