“Zatulin, Kandelakin, Kandelaki, Kiosyan və s. bunlar tanış adlardır. Rusiyanın Qazaxıstana qarşı dedikləri ilk dəfə deyil. Rusiya Qazaxıstanın şimalını “rus çölləri” adlandırır. Necə ki, ermənilər deyirdi ki, “Azərbaycan adlı dövlət olmayıb”, ruslar da deyirdi ki, “Qazaxıstan adlı dövlət olmayıb”. Bunlar “Azərbaycan, Qazaıxtan adlı dövlət olmayıb” deyəndə başa düşmürlər ki, Azərbaycanda və Qazaxıstanda olan qədim türk xalqı ümumiyyətlə dünyada ermənilərdən və ruslardan əvvəl dövlətlər qurub, məskən salıb. Bəli, dünən onların qurduğu dövlətlərin adı başqa ola bilər, amma həmin o xalqlar dövlətlər qurub. Azərbaycan adlı dövlət olmayıbsa, türk xalqı olmayıb? Onda belə çıxır ki, Cənubi Qafqazda türk xalqı 1918-ci ildən peyda olub? Mərkəzi Asiyada da türk xalqı 1920-ci ildən sonra peyda olub? Qazaxıstanlılar da deyə bilərlər ki, ümumiyyətlə bütün Rusiya, Moskva Qızıl Ordadır. Onlar da Nazarbayev vaxtında öz varisi kimi Qızıl Ordanı göstəriblər. Yəni o zaman ümumiyyətlə bütün Rusiya da vaxtilə qazaxıstanlıların ruslara verdiyi hədiyyədir. Artıq daha cəsarətli çıxışlar etmək lazımdır”.
“Ağ Partiya” başqan müavini Əhəd Məmmədli Bizimyol.info xəbər portalına açıqlamasında bildirib ki, bu siyahıda olan adamlar Azərbaycana qarşı da əvvəl hücumlar edib.
Politoloq bildirib ki, onların cavabları istər Qazaxıstan, istər Azərbaycan tərəfindən verilir.
“Təbii ki, bir az çəkingən. Açıq demək lazımdır. Misal; Astanaya və yaxud da Bakıya iddia qoyularsa, biz də Dərbəndə iddia qoymalıyıq. Bilirsiniz ki, Krım xanı iki dəfə Moskvanı yandırıb. “Qızıl Orda”, peçenek, bulqar, polo xaqanlıqları, türk xaqanlıqları... Xatırlayırsınızsa, Putin pandemiya vaxtı demişdi ki, “Rusiya xalqı daha böyük təhlükələr görüb. Orada kimin adını çəkmişdi? Orada fransızların və yaxud almanların, Napoleonun və ya Hitlerin hücumunu xatırlatmamışdı. Polovların, peçeneklərin adını çəkmişdi. Onlar qədim türk xalqalrıdır. Onların artıq beyninə yeriyib ki, ən böyük təhlükə türkdür. Ona görə belə hücum edirlər. O təhlükənin qarşısını almaq üçün belə addım atırlar. Bu səbəbdən də onların cavabını vaxtında və cəsarətli şəkildə vermək lazımdır”-deyə politoloq qeyd edib.
Əhəd Məmmədli Jirinovskini də xatırladıb.
“Yadınızdadırmı, Jirinovski Azərbaycana qarşı necə neçə dəfə təhqiramiz ifadələr işlədirdi? Jirinovski ölməmişdən öncə. Bəxtiyar Vahabzadənin bir oğlu var, İsfəndiyar Vahabzadə. Düzdür, mən o adamın siyasi olaraq kimliyini bəyənmirəm. O, çox düzgün cavab vermişdi. Cavab da təhqiredici olmuşdu. Sanki qurbağa gölünə daş atmışdılar. Sakitləşmişdilər. Çünki elələrinə onların dilində cavab vermək lazımdır. Onların dilində danışa bilən bizim də “jirinovski”lərimiz və ya Kandelaki kimi aparıcımız olmalıdır.
Türk ölkələrinə Rusiya tərəfindən, rus şovinistləri tərəfindən hücumlar olanda cavab bir az ehtiyatlı verilir. Bir az o cavabları cəsarətləndirmək lazımdır. Bizim də "Zatulin"lərimiz olmalıdır. İstər Qazaxıstandakı deputatlar olsun, istər Azərbaycanın Milli Məclisindəki deputatlar olsun. Deputatlarımız niyə danışmırlar? Deputatımızın birini deport ediblər. Deputatın diplomatik toxunulmazlığı var. Niyə çıxış etmirlər, nədən çəkinirlər?
AzTV Almaniya haqqında verilən veriliş hazırlayanda, digər yandan Rusiya haqqında da bir veriliş hazırlasın. Təyyarə faciəsində Rusiyaya qarşı kifayət qədər reaksiya oldu. “Rusiya evi” bağlandı və s. Bunlar siyasi konyukturaya uyğun olmamalıdır. Dünən İranı tənqid edirdik. O gün Pezeşkian iki şeir dedi, başladıq İranı tərifləməyə?! Eynilə də Rusiya üçün deyirəm. Dünən təyyarəmizi vurmuşdular, tənqid edirdik və bu gün 9 maya hazırlaşırıq. Mən bunu tam da Azərbaycana aid bir qələbə hesab etmirəm. Mənimlə razılaşmayanlar ola bilər. Amma ruslarda fərqlidir. Bu, konyukturaya uyğun deyil” -deyə politoloq bildirib.
Əhəd Məmmədli qeyd edib ki, Qazaxıstanla Rusiya müttəfiqdir, yenə dəöz müttəfiqinə ərazi iddiası ilə çıxış edir.
“Bu necə olur? Bizim də Dugin kimi filosofumuz olmalıdır. Bizim də Bəxtiyar Tuncay kimi filosofumuz var. Ona şərait yaradılmalıdır ki, danışsın. Tarixi xatırlatsın. Rusiya dövlətinin cəmi 500 il tarixi var. Bu rəqəm tarix üçün azdır. Biz onlara xatırlatmalıyıq ki, sənin 500, mənim dövlət olaraq 2000-3000 yaşım var. Buna ümumi Qazaxıstan, Azərbaycan və Özbəkistan tarixçiləri yığışıb, birgə cavab verməlidir. Türk ölkələrində dövlət ideologiyası yoxdur. Biz də onlara uyğun cavab verməliyik. Öz zatulinlərimizi, duginlərimizi yaratmalıyıq. Biz nə edirik? Biz rusun deputatını deport etsəydik, rus kanalları Azərbaycana qarşı hücuma başlamışdı. Bizim kanallarımız niyə susdu? Burada dövlət ideologiyası işləməlidir. Burada dövlət səviyyəsində media təbliğatı aparılmalıdır. Hitler Almaniyası Avropanı tutanda təkcə silah gücünü yox, həm də Gebbelsin propaqandasının hesabına tutmuşdu. Putin bu gün Zatulin və Dugin kimi şəxslərin hesabına guruldayır. Özlərindən icad ediblər “rus dünyası”...
Biz türk dünyasına, türk dövlətlərinə hələ də türkdilli dövlətlər deyirik. Türk deməyə çəkinirik. Bəlkə biz də yenidən Dərbənd qalası, Dərbənd söhbətini qaldıraq?! Bəlkə deyək ki, dünənə qədər ora bizim olub?! Bəlkə Şimali Qafqaz respublikalarının Azərbaycanda birləşmə 1918-ci ildə traktatını, parlamentdə qəbul edilən qərarı qaldıraq?! Ümumiyyətlə, nəinki Dərbənd, bütün Şimali Qafqaza iddiamızı qoyaq. Bəlkə Şimali Qafqazdan da özümüzə cəlb edək?! Bəlkə Rusiyanın muxtar respublikalarındakı Rusiyanın işğalından razı olmayan tarixçilər, siyasətçilər, jurnalistlər tapaq?! Onları hazırlayaq və lazımi məlumatlar verək, səsləndirsinlər. Bəlkə Rusiyanı daxildən çalxalayaq? Rusiya görsün ki, bizim də onlara qarşı "silah"ımız var. Ruslar talışları yığıb orada konfrans keçirə bildiyi kimi, biz də burada çeçənləri yığıb konfrans keçirək. Niyə etmirik? Tatarları, başqırdları, çukçaları yığaq. Əminəm ki, çukçaların arasında rusa qarşı nifrəti olan kifayət qədər insan tapa bilərik. Bizim diasporamız, səfirlərimiz, konsullarımız nə ilə məşğuldular? Cavan-cavan uşaqlardır, orada nə ilə məşğuldurlar? İdeologiya ilə məşğul olmaq lazımdır”-deyə Əhəd Məmmədli vurğulayıb.
