Lənkəran Ağır Cinayətlər Məhkəməsində xüsusi amansızlıqla qətl törətməkdə təqsirləndirilən Əli Əliyevin cinayət işinin bəzi detalları məlum olub.

Pravda.az-ın əldə etdiyi məlumata görə, hakim Aqil Nuriyevin sədrliyi ilə keçirilən prosesdə o, Cinayət Məcəlləsinin 120.2.4-cü (xüsusi amansızlıqla və ya ümumi təhlükəli üsulla adam öldürmə) maddəsi ilə elan edilmiş ittiham üzrə özünü təqsirli bilib.

Əli Əliyev ifadəsində deyib ki, 14 sentyabr 2025-ci il tarixdə Şirvan şəhərində həmkəndlilərinin övladının kiçik toy mərasimində iştirak edib. Toy zamanı yeyib-içdikdən sonra alkoqol sərxoşluğu vəziyyətinə düşüb.

Onun sözlərinə görə, toy mərasiminin keçirildiyi şadlıq sarayının həyətində başqa şəxslə arasında mübahisə yaranıb. Bu zaman zərərçəkmiş Rüstəm Əliyev ona irad bildirib, yumruqla sol göz nahiyəsinə zərbə vuraraq xəsarət yetirib və ailə üzvlərinin ünvanına nalayiq ifadələr işlədib.

Əli Əliyev qeyd edib ki, toy mərasimindən sonra Sabirabad rayonunun Moranlı kəndində yerləşən evinə qayıdıb. Lakin Rüstəm Əliyevlə görüşərək toyda baş verən hadisə, ona qarşı zor tətbiq etməsi və təhqirləri barədə danışmaq qərarına gəlib. Bu məqsədlə Rüstəmə telefonla zəng edərək kənd ərazisində yol kənarında görüş təyin edib. Evdən çıxarkən mətbəxdəki çörək qabından mətbəx bıçağını götürüb.

Təqsirləndirilən şəxs məhkəmədə etiraf edib ki, bıçağı götürməkdə məqsədi Rüstəm Əliyevin onu yenidən təhqir edəcəyi və ya xəsarət yetirəcəyi halda onu öldürmək olub.

Daha sonra yolda qonşusu ilə rastlaşıb. Ondan yanacaq pulunu ödəmək şərtilə Rüstəm Əliyevin evinin yaxınlığına aparmasını xahiş edib. O, qonşusu ilə idarə etdiyi “VAZ-2105” markalı avtomobillə görüş yerinə gediblər.

“Görüş zamanı Rüstəm Əliyev nalayiq ifadələr işlədərək avtomobilə yaxınlaşdı. O, avtomobilin qabaq sərnişin oturacağında əyləşdi və arxa tərəfə çevrilərək məni öldürəcəyi ilə hədələdi. Bundan sonra Rüstəm Əliyev avtomobildən düşərək məni yenidən təhqir etdi və yumruqla vuraraq burnumu sındırdı”, - Əli Əliyev bildirib.

Bundan sonra hadisə daha da ağırlaşıb.

Əli Əliyevin ifadəsinə əsasən, o, belində gizlətdiyi bıçağı çıxararaq Rüstəm Əliyevin döş qəfəsi, qarın və boğaz nahiyələrinə zərbələr endirib. Bundan başqa, onun bədəninin müxtəlif nahiyələrinə zərbələr vurub, boynunu əli ilə sındırıb və bıçaqla baş nahiyəsində kəsiklər törədib.

Hadisədən sonra isə kənd mərkəzinə qaçaraq polis əməkdaşlarına təslim olub.

Məhkəmədə verilən sualları cavablandıran Əli Əliyev bildirib ki, toy mərasimində Rüstəm Əliyevlə eyni masada əyləşib və bir qədər şərab içib.

O, digər şəxslə mübahisə zamanı Rüstəm Əliyevin onları araladığını, mübahisənin dəqiq səbəbini isə xatırlamadığını deyib.

Təqsirləndirilən şəxs qeyd edib ki, Rüstəm Əliyevi onun ailəsini insanların yanında nalayiq ifadələrlə təhqir etməsinə görə söhbət etmək məqsədilə görüşə çağırıb.

Əli Əliyev həmçinin avtomobildə harada əyləşməsi ilə bağlı məsələyə də aydınlıq gətirib. Bildirib ki, avtomobilin sağ tərəfi torpaq təpəyə sıxılmış vəziyyətdə olduğundan həmin tərəfdən minmək mümkün olmayıb. Bu səbəbdən o, sol tərəfdən, sürücünün arxasında əyləşib və avtomobil hərəkətə başlamazdan əvvəl yerini dəyişməyib.

O, toyda Yasəflə mübahisə etdiyi zaman Rüstəm Əliyevin ona bir şillə vurduğunu və təhqir etdiyini də vurğulayıb.

Əli Əliyev ifadəsinin sonunda Rüstəm Əliyevi “burnumu sındırdığı və təhqir etdiyi üçün öldürmüşəm” deyib.

Məhkəmədə son sözlə çıxış edən Əli Əliyev törətdiyi əməldən peşman olmadığını bildirib.

İttihama görə, hadisə 14 sentyabr 2025-ci il tarixdə Sabirabad rayonunun Moranlı kəndi ərazisində baş verib.

Əli Əliyev həmin gün axşam saat 20 radələrində tanışları ilə birlikdə Şirvan şəhərində fəaliyyət göstərən "Leyla" şadlıq sarayında keçirilən toy mərasimində iştirak edib. Məclis zamanı spirtli içki qəbul edən Əli Əliyev alkoqol sərxoşluğu vəziyyətində şadlıq sarayının həyətində tanışı ilə mübahisə edib və onu vurub. Bu zaman hadisəyə müdaxilə edən həmkəndlisi, zərərçəkmiş Rüstəm Əliyev təqsirləndirilən şəxsin bu hərəkətinə irad bildirib.

İraddan narazı qalan Əlinin Rüstəmlə mübahisəsi daha da böyüyüb. Bu zaman Rüstəm onun sol göz nahiyəsinə yumruqla zərbə endirib, həmçinin ünvanına və ailə üzvlərinə qarşı nalayiq ifadələr işlədib.

Nəticədə Əli Rüstəmin 6-cı və 7-ci boyun fəqərələrini sındırıb, daha sonra baş nahiyəsinə əlavə olaraq təxminən 10 dəfə bıçaq zərbəsi endirib.

İstintaqın qənaətinə görə, təqsirləndirilən şəxs sonda bıçaqla zərərçəkmişin başını bədənindən ayırıb. Məhkəmə-tibbi ekspertizasının rəyinə əsasən, başın travmatik amputasiyası və bədənə yetirilmiş çoxsaylı ağır xəsarətlər nəticəsində Rüstəm Əliyev hadisə yerində həyatını itirib.

Məhkəmənin hökmü ilə ona 19 il müddətə azadlıqdan məhrumetmə cəzası təyin edilib. Hökmdə qeyd edilib ki, Əli Əliyev həmin cəzanın ilk 3 ilini həbsxanada, qalan hissəsini isə ciddi rejimli cəza çəkmə müəssisəsində çəkəcək.

Qeyd: Daha əvvəl Əli Əliyev Cinayət Məcəlləsinin 237.1, 177.2.1 və 177.2.3-cü maddələri ilə məhkum edilmişdi.