"Gülməlisi odur ki, Azərbaycanda XVI əsr haqqında müzakirə hər qızışanda o, Ermənistandakı süni intellekt çiplərini qızdırıb qonşu ölkəyə gəlir gətirəcək..." "DİA-AZ" xəbər verir ki, bunu özünün sosial şəbəkə hesabında ReAL Partiyasının qurucu üzvü İlqar Məmmədov qeyd edib.

O daha sonra fikrini belə davam etdirir: "Çünki bizdəki mübahisəçilər bir-birinin dediklərini getdikcə daha da çox süni intellektlə yoxlayır. Ya da hər hansı dolayı yolla süni intellekt bu müzakirələrin məzmununa təsir edir...

Məlum bir tarixi fenomen də yadıma düşür: müharibədə qələbə çalan tərəf məğlub tərəfin ən pis cəhətlərini çox vaxt özünə yaraşdırmağa başlayır. Bunun izahını tapan yoxdur, amma tarixdə belə şey az olmayıb. Bizdə də bəziləri Ermənistan üzərindəki parlaq qələbəmizdən sonra erməni xalqını aldadaraq ona iki dəfə faciə yaşatmış “tarix xəstəliyinə” biz azərbaycanlıları yoluxdurmağa çalışır.

Dediyim fenomen hələ İskəndərin vaxtından məlumdur. Əhəmənilər üzərində qələbəsindən sonra, qalib makedoniyalılar yerli əhalinin adət elədiyi xasiyyətləri mənimsəməyə başladı. Digər makedoniyalılar isə bu mədəni işğala qarşı çıxdı. Son nəticədə, bu ziddiyyət imperiyanı zəiflədib onun məhvinə yol açan amillərdən biri oldu. Qədim Romada da bu fenomen məlum idi. Qədim yunanlar üzərində hər qələbədən sonra, məğlub tərəfin “ən pis” sayılan xasiyyətlərinin romalıları yoluxdurması haqqında Plutarx, Horasi, Polibiy və digərləri yazıb.

Ermənilər özü "tarix xəstəliyi"ndən indi qurtulmağa başlayır, 50 il irəliyə daha çox baxır, nəinki 500 il geriyə. Azərbaycan xalqı da daim gələcəyə və tərəqqiyə açıq xalq olub, yuxarıdan gələn geriçi təsirlərə baxmayaraq. Bu keyfiyyətimizi itirmək olmaz..."