Son dövrlər, xüsusilə də dekabr ayında smart olmayan qaz sayğacları ilə bağlı şikayətlər artır.

Qış mövsümünün başlanması ilə minlərlə abonent aylıq qaz borcunun əvvəlki dövrlərlə müqayisədə səbəbsiz şəkildə yüksəldiyini iddia edir. Bəzi hallarda aylıq sərfiyyatın 2–3 dəfə artaraq 800–1000 kubmetrə çatdığı bildirilir.

Bununla da smart olmayan, mexaniki qaz sayğaclarının ölçmə mexanizminin dəqiqliyi, texniki nasazlıqlar və mümkün səhv hesablamalarla bağlı suallar gündəmə gəlir.

Bəs vətəndaş evdə istifadə etdiyi qaz cihazlarının və ya sayğacın düzgün işləmədiyini əsas gətirərək ekspertiza tələb edə bilərmi?

Məsələ ilə bağlı “Cebheinfo.az”-a açıqlamasında "Azəriqaz" İstehsalat Birliyinin İctimaiyyətlə əlaqələr şöbəsinin rəisi Eldəniz Vəliyev bildirib ki, uyğunsuzluqla bağlı bütün müraciətlər araşdırılır:

“Əlbəttə ki, belə hallarda vətəndaşın ekspertiza tələb etmək hüququ var. Mən dəfələrlə bildirmişəm ki, kimdə etimadsızlıq varsa, öz sayğacını ekspertiza təşkil edərək yoxlatdıra bilər. Bu günə qədər daxil olan müraciətlərin hamısı araşdırılıb. Müraciət edən vətəndaşlara cavab verilib ki, “Azəriqaz”ın öz qayda və qanunları, həmçinin məlumat bazası mövcuddur və sərfiyyat həmin baza üzərindən yoxlanılır.

Aparılan yoxlamalar nəticəsində indiyədək heç bir artıq sərfiyyat faktı aşkarlanmayıb, bu günə qədər belə bir hal müşahidə olunmayıb”. O qeyd edib ki, son bir həftə ərzində sərfiyyatla bağlı ardıcıl məlumatlar daxil olub:

”Həmin müraciətlərin hamısı araşdırılıb və vətəndaşlara rəsmi məlumat verilib ki, qeyd olunan iddialarla bağlı hər hansı uyğunsuzluq yoxdur. Yoxlama zamanı vətəndaşın məlumat bazasındakı sərfiyyat göstəriciləri araşdırılır, daha sonra nəticə barədə ətraflı izahat verilir. Vətəndaşa göndərilmiş bildirişlərlə bazada olan göstəricilərin tam eyni olduğu, hər hansı yanlışlığın mövcud olmadığı izah olunur.

Aparılan izahatlardan sonra vətəndaşların əksəriyyəti bunu qəbul edir. Qəbul etməyənlər də olur, lakin göstəricilər ortadadır. Yəni daxil olan bütün şikayətlər araşdırılır və hər biri üzrə müvafiq izahat verilir”.

Azad İstehlakçılar Birliyinin kommunal xidmətlər üzrə eksperti Nüsrət Qasımov bildirib ki, belə olan hallarda vətəndaş rəsmi olaraq “Azəriqaz”a müraciət etməlidir:

“Vətəndaşın iştirakı ilə sayğac çıxarılaraq laboratoriyaya aparılır və yoxlanılır, laboratoriya rəyi isə əsas sənəd sayılır. Abonentlər bəzən səhv düşünə bilirlər, çünki ilin sonunda sayğaclarda qaz sərfiyyatı normaya uyğun hesablanır.

Abonentlərin illik qaz sərfiyyatı üzrə tariflər uyğun yəni 1200 kubmetrə qədər qaz 12,5 qəpikdən, 1200–2500 kubmetr arası 22 qəpikdən, 2500 kubmetrdən çox isə 30 qəpikdən hesablanır. Bu tarif sistemi səbəbindən bəzən abonentlərdə borcun süni şəkildə artması təəssüratı yarana bilər".

Ekspert qeyd edib ki, vətəndaşın hüququ var ki, ərizə ilə müraciət etsin və öz iştirakıyla sayğac çıxarılsın:

"Sayğac yoxlanılmalı və rəsmi sənəd təqdim edilməlidir ki, sayğacın düzgün işlədiyi təsdiqlənsin. Bu proses həm abonentin borcunu aydınlaşdırır, həm də mümkün yanlışlıqların aradan qaldırılmasına şərait yaradır. Belə olan halda vətəndaş həm haqqını qoruyur, həm də gələcəkdə yaranacaq mübahisələrin qarşısını alır".