"Hər bir ölkənin paytaxtı onun idarəetmə mərkəzi olmaqla dövlətin rəhbərliyinin və nazirliklərin yerləşdiyi əsas şəhər statusunu daşımaqdadır".

Bu sözləri Azad Vətən Partiyası sədrinin Hüquq və İnsan Haqları üzrə müavini Tacəddin Əyyubov "Cebheinfo.az"-a açıqlamasında deyib.

O bildirib ki, qədim dövrlərdən başlayaraq dövlətlər paytaxtlarını təyin edərkən təsadüfi deyil, düşünülmüş əsaslarla qərarlar alıb və həyata keçiriblər:

"Dövlətlər paytaxtlarını ölkə ərzisində başqa bölgəyə köçürülməsi vacibliyini hiss edərkən bu addımı atmaqdan çəkinməyib həyati önəmli dəyişiklikləri həyata keçiriblər.Bəzi dövlətlər ölkədə gedən müharibələr zamanı paytaxtın dəyişdirilməsi zərurətindən edibsə, bəzi dövlətlər isə təbii fəlakətlər, əhalininin anormal sıxlığı və digər səbəblərdən dəyişdirmək məcburiyyətində qalıblar.

Yaxın zamanda paytaxtlarını dəyişdirəcəyini elan edən Cənubi Koreya, İran, İndoneziya, Qvineya da daxil olmaqla bir sıra ölkərər də paytaxt dəyişdirmənin məcburi vacibliyini qəbul ediblər. Paytaxtın dəyişdirilməsi böyük maliyyə tələb edən ciddi addım olaraq böyük vaciblik məcburiyyətində atılmalı olan addımlar olub".

Ekspert Azərbaycanın paytaxtının dəyişdirilməsi ehtimalından da danışıb:

"Etiraf etmək lazımdır ki, Bakı həddindən artıq yüklənib. Bakı öz şəhər və paytaxt funksiyasını normal idarəetməsindən çox-çox uzaqlaşmaqdadır. Paytaxta bölgələrdən kütləvi insan axını gəlir. Bakıya əhalinin kütləvi axınının sosial-iqtisadi və digər səbəbləri var. Ancaq Bakı sürətlə daş binalar yığınağına çevrilərək keçmiş yaşıllığı və təbii gözəlliyindən çox uzaqlaşıb.

Tikilən binaların günü-gündən artmağı, bir-birinə çox yaxın tikilməsi, vəziyyəti daha da çətinləşdirir. Həmçinin, şəhərdə tıxacların da artması sürücüləri narahat edir. Uzun müddətdir ki, paytaxtın tıxac probleminə çarə tapılmır".

Həmsöhbətimiz diqqətə çatdırıb ki, Bakıdakı sıxlığın azaldılması üçün müxtəlif təkliflər verilsə də, effektiv olmayıb:

"Xüsusilə Bakının mərkəzində universitetlərin və kolleclərin çoxluğu bu yükü daha da artırır. Ona görə də zaman-zaman universitetlərin başqa yerə köçürülməsi, habelə başqa həll yolları təklif olunur. Ancaq bunların heç birinin problemin həllinə ciddi təsir edəcəyini zənn etmirəm.

Düşünürəm ki, Bakı şəhərinin "nəfəs" alması üçün paytaxt statusundan qurtulması yeganə vasitə olar. Paytaxtın Bakı şəhərindən köçürülməsi ilə nazirliklər, rəsmi qurumlar, dövlət idarələri də yeni paytaxta daşınacaq. Bu addımla həm Bakı şəhərinin yükü və sıxlığı xeyli azalacaq".

Tacəddin Əyyubov paytaxtın Ağdam şəhərinə köçürülməsini təklif edib:

"Hesab edirəm ki, yeni paytaxtın Ağdam şəhərinə köçürülməsi yaxşı olar. Bir çox millət vəkili və ekspert də paytaxtın Ağdam şəhərinə köçürülməsini təklif edir. Hazırda Ağdamın yenidən qurulması da üstünlük ola bilər.

Çünki paytaxt başqa şəhərə köçürülərkən, adətən ora yenidən qurulur. Bu baxımdan, başqa şəhəri seçməkdənsə, onsuz da sıfırdan yenidən qurulan Ağdamı paytaxt etmək daha yaxşı seçim olar. Ümid edirəm ki, paytaxtın Bakıdan köçürülməsini uzun müddət gözləməyəcəyik".