Şəhid Səyavuş Kəlbalıyev və Fəxri Məmmədovun məzarları üzərində olan şəxsi əşyalarının oğurlanması barədə yeni təfərrüat məlum olub. Oğurluq etməkdə ittiham olunan Kənan və Vüqar adlı şəxslər dindirilmə zamanı bildiriblər ki, şəhid Fəxri Məmmədovun məzarı üzərində qoyulan gitaranı oğurlayıb 30 manata satıblar. Səyavuş Kəlbalıyevin məzarı üzərindən götürülən hərbi çəkmə və hərbi dəbilqəni isə evlərində gizlədiblər. Qeyd edək ki, Sabunçu rayonu Bakıxanov qəsəbəsindəki Şəhidlər Xiyabanında şəhid məzarlarından oğurluq edilməsi faktı üzrə polis əməkdaşları tərəfindən həyata keçirilən tədbirlər nəticəsində şübhəli şəxslər saxlanılıb. Onların oğurladığı əşyalar isə şəhidlərin ailələrinə qaytarılıb. Hadisəni törətməkdə şübhəli bilinən şəxslər 17 yaşlı Kənan Əsədli və 16 yaşlı Vüqar Quliyevdir. Hazırda Sabunçu Rayon Polis İdarəsinin 13-cü Polis Şöbəsində faktla bağlı araşdırma aparılır.
Qeyd etməliyik ki, Fəxri Məmmədov şəhid olarkən 20 yaşı vardı. O da həmin bu şübhəli şəxslər kimi gənc idi. Amma taleyin acı istehzası belə olurmuş; kimisi 20 yaşında şəhidlik zirvəsinə ucalır, bir başqası 17 yaşında oğru olur…
Məzarları talan edilən şəhidlər haqqında qısa məlumat verməyi özümüzə borc bildik. Fəxri Habil oğlu Məmmədov hərbi xidmətin başa çatmasına 3 ay qalmış 44 günlük Vətən müharibəsində şəhidlik məqamına ucalıb. Fəxri Məmmədov 2000-ci il iyulun 27-də Bakıda anadan olub. Ailənin üç övladından, evin tək oğlu, iki bacının tək qardaşı olub. Uşaqlıqdan musiqiyə böyük marağı, həvəsi olub, gitarada ifa edib. Onun gitarada ifası yutub kanalında indi də qalmaqdadır. 2007-2016-cı illərdə Bakı şəhəri Sabunçu rayonu Şəhid Cəlal Məmmədyarov adına 155 nömrəli tam orta məktəbdə təhsil alıb. 2016-cı ildə isə 9-cü sinfi bitirdikdən sonra Peşə Liseyinə daxil olub, kompüter ixtisası üzrə təhsil alıb. 2019-cu ildə hərbi xidmətə yollanıb. Beyləqan istiqamətindəki “N” saylı hərbi hissədə xidmət edib. Əsgərliyinin başa çatmasına 3 ay qalmış - İkinci Vətən müharibəsinin başlaması ilə döyüşlərə, Vətənin müdafiəsinə atılıb. Döyüşlərin ilk günündə, sentyabr ayının 27-də, 20 yaşının tamamından cəmi iki ay sonra da Cəbrayıl rayonunda qəhrəmancasına həlak olub.
Səyavuş Hümbət oğlu Kəlbalıyev 1987-ci il oktyabr ayının 16-da Cəbrayıl rayonunun Horovlu kəndində anadan olub. İlk təhsilini Bakı şəhəri, Sabunçu rayonu, Pirşağı qəsəbəsində fəaliyyət göstərən Şuşa şəhər 6 saylı tam orta məktəbində alıb, 2005-ci ildə həmin məktəbi əla qiymətlərlə bitirərək Heydər Əliyev adına Azərbaycan Ali Hərbi Məktəbinə daxil olub. 2009-cu ildə Hərbi Məktəbi bitirdikdən sonra Respublikanın müxtəlif bölgələrində hərbçi kimi xidmətini davam etdirib. Cəbrayıl-Beyləqan rayonu üzrə kəşfiyyat idarəsinin rəisi olub. Vətənin bölünməzliyi və müstəqilliyi uğrunda gedən İkinci Qarabağ müharibəsində mayor Kəlbalıyev Səyavuş Hümbət oğlu 29 sentyabr 2020-ci il tarixdə Füzuli rayonu istiqamətindəki döyüşlərdə böyük qəhrəmanlıq göstərərək həlak olub. Ailəli idi, iki övladı yadigar qalıb.
Baş vermiş utancverici bu hadisə yerlərdə Şəhidlər muzeylərinin yaradılması zərurətini gündəmə gətirib. Birinci Qarabağ müharibəsinin qazisi, hərbi jurnalist Rey Kərimoğlu çıxış edərək bildirib ki, hər rayonda Şəhidlər Muzeyi yaradılmalıdır:
- Hər rayonda şəhid muzeyləri yaradılsın və şəhidlərin bütün əşyaları da bu muzeylərə təhvil verilsin, orada saxlanılsın, qorunsun. Belə olarsa şəhidlərin şəxsi əşyalarının məzarları üzərinə qoyulmasına da ehtiyac qalmaz. Oğurluq da olmaz. Hər rayonda, mərkəzi hissələrdə “Şəhidlər Muzeyi" olmalıdır. Orada həmin rayonun bütün şəhidlərinin ayrıca guşəsi olmalı, əşyaları, orden və medalları da orada qorunub mühafizə edilməlidir.
