Xəbər verdiyimiz kimi, ötən gün Azərbaycanın vətəndaş cəmiyyəti nümayəndələri Ermənistanın paytaxtı İrəvanda qarşı tərəfin nümayəndələri və rəsmi şəxslərlə görüş keçiriblər.
Azərbaycanı Fərhad Məmmədov (Cənubi Qafqaz Araşdırmalar Mərkəzinin rəhbəri), Rusif Hüseynov (Topçubaşov Mərkəzinin həmtəsisçisi və direktoru), Ramil İskəndərli (Milli QHT Forumu İdarə Heyətinin sədri), Kəmalə Məmmədova və Dilarə Əfəndiyeva (Azərbaycan Qadın Hüquqlarını Müdafiə Cəmiyyətinin Qadınlar Sülh və Əmin-Amanlıq Mərkəzinin rəhbəri) təmsil ediblər.
Görüş Vaşinqtonda 2025-ci il 8 avqust tarixində qəbul edilən Birgə Bəyanatın ruhuna uyğun olaraq sülh gündəminin irəlilədilməsinə həsr olunub və bu formatda Ermənistan və Azərbaycan vətəndaş cəmiyyəti nümayəndələrinin ilk görüşü kimi tarixə düşüb.
“Cebheinfo.az”-ın əməkdaşı tarixi əhəmiyyətli görüşlə bağlı Topçubaşov Mərkəzinin həmtəsisçisi və direktoru Rusif Hüseynovla əlaqə saxlayıb.
Saytımıza açıqlamasında o bildirib ki, Azərbaycan vətəndaş cəmiyyəti nümayəndələrindən ibarət heyətin Ermənistana səfəri önəmli bir mərhələdir:
“Səfərin əsas məqsədi Vaşinqtonda 8 avqustda keçirilmiş görüş və orada imzalanmış Birgə Bəyanatın ruhuna uyğun olaraq sülh prosesinə vətəndaş cəmiyyətinin töhfəsini müəyyənləşdirmək və bu prosesdə yer almaqdır.
İndiyədək hər iki ölkənin müxtəlif ictimai-siyasi xadimlərinin, jurnalistlərinin, idmançılarının, bəzi hallarda isə deputatlarının müxtəlif beynəlxalq tədbirlər çərçivəsində qarşılıqlı səfərləri baş tutub. Lakin bu dəfə reallaşan səfər ikitərəfli təşəbbüsün və qarşılıqlı razılaşdırılmış çərçivənin nəticəsidir.
Bu baxımdan biz bu səfəri yüksək qiymətləndiririk. Bu görüşün baş tutması çox əhəmiyyətli idi. İlk növbədə sırf ikitərəfli xarakter daşıdığına və azərbaycanlı nümayəndələrin birbaşa Ermənistana səfər etməsi baxımından qarşımızda müəyyən məqsədlər və planlar durur.
Ümid edirik ki, Azərbaycan və Ermənistan liderləri tərəfindən aparılan dövlətlərarası sülh gündəliyinə vətəndaş cəmiyyəti olaraq öz töhfəmizi verə biləcəyik. Məqsədimiz bu prosesin ardıcıllığını və davamlılığını qorumaqdır”.
Onun sözlərinə görə, görüş zamanı hər iki tərəfin nümayəndələri Ermənistan Respublikasının Təhlükəsizlik Şurasının katibi Armen Qriqoryanla görüşüblər və onun çıxışı nikbin ruhda olub:
“Görüşdə iştirak edən hər iki tərəfin nümayəndələri, Ermənistan Respublikasının Təhlükəsizlik Şurasının katibi Armen Qriqoryanla da görüşmək imkanı əldə etdilər. Bu da çox önəmli idi. Çünki İrəvana səfər etmiş azərbaycanlı nümayəndələr Ermənistan dövlətinin mövqeyini, xüsusilə də rəsmi İrəvanın sülh prosesinə baxışını anlamaq və müəyyən suallarını ünvanlamaq imkanı qazandılar.
Onu demək olar ki, Armen Qriqoryan da çıxışında daha çox nikbin mövzulara kökləndi. Onun fikirlərində proseslə bağlı optimizm hiss olunurdu”.
