Azərbaycanın vətəndaş cəmiyyəti təmsilçiləri Ermənistanın paytaxtı İrəvanda olublar.

Onlar erməni həmkarları və rəsmi şəxslərlə bir sıra görüşlər keçiriblər. Azərbaycan nümayəndə heyətində Cənubi Qafqaz Araşdırmalar Mərkəzinin rəhbəri Fərhad Məmmədov, Topçubaşov Mərkəzinin həmtəsisçisi və direktoru Rusif Hüseynov, Milli QHT Forumu İdarə Heyətinin sədri Ramil İskəndərli, eləcə də Azərbaycan Qadın Hüquqlarını Müdafiə Cəmiyyətinin Qadınlar Sülh və Əmin-Amanlıq Mərkəzinin rəhbəri Kəmalə Məmmədova və Dilarə Əfəndiyeva yer alıblar.

Erməni tərəfdən isə görüşdə Areq Koçinyan, Boris Navasardyan, Naira Sultanian, Narek Minasyan və Samvel Meliksetyan iştirak ediblər. Tədbir 2025-ci il 8 avqust tarixində Vaşinqtonda qəbul edilən Birgə Bəyanatın ruhuna uyğun şəkildə sülh gündəminin irəlilədilməsinə həsr olunub. Bu, Ermənistan və Azərbaycan vətəndaş cəmiyyətləri nümayəndələrinin bu formatda ilk birgə görüşü kimi qiymətləndirilir.

Erməni mətbuatının məlumatına görə isə Ermənistana səfər edən azərbaycanlı nümayəndələr arasında Laçın yolunda keçirilən aksiyada iştirak etmiş ekofəal Dilarə Əfəndiyeva da olub. Ermənistanın “Fip.am” nəşri yazır ki, D.Əfəndiyeva 2022-ci ilin dekabrında azərbaycanlı ekofəalların Laçın dəhlizində keçirdiyi aksiyada iştirak edənlərdən biri kimi tanınır.

“Cebheinfo.az”-a açıqlamasında Azərbaycan Qadın Hüquqlarını Müdafiə Cəmiyyətinin Qadınlar Sülh və Əmin-Amanlıq Mərkəzinin rəhbəri Dilarə Əfəndiyeva görüşlə bağlı açıqlamasında bildirib ki, müzakirələr hər iki tərəf üçün faydalı və səmərəli keçib:

“Görüş çox səmərəli keçdi. Həm Azərbaycan, həm də Ermənistan cəmiyyətini maraqlandıran məsələlər müzakirə olundu. Doğrudur, vaxtımız az, proqram isə kifayət qədər geniş idi. Buna baxmayaraq, bir çox suallar müzakirə edildi, müəyyən istiqamətlər və həll yolları müəyyənləşdirildi.

Əsas mövzu, təbii ki, sülh prosesi idi və iştirakçıların ən çox sualları da bu mövzu ətrafında idi. Biz gördük ki, Ermənistan tərəfi də həqiqətən sülh prosesində maraqlıdır.

Pozitiv məqamlardan biri də o oldu ki, məhz həmin gün Prezident İlham Əliyev Azərbaycanın Ermənistan ərazisindən yüklərin keçidinə icazə veriləcəyini elan etdi. Bu qərar görüş iştirakçıları tərəfindən çox müsbət qarşılandı. Ən mühüm məsələlər bunlar idi”.

Bundan başqa, logistika imkanları, Zəngəzur dəhlizi, humanitar məsələlər və bu istiqamətlərin Azərbaycanla Ermənistan arasında iqtisadi əməkdaşlığa töhfə verəcək məsələlər müzakirə olunub:

“Bu məsələlərin gələcəkdə daha ətraflı araşdırılması planlaşdırılır”.

Dilarə Əfəndiyeva səfər zamanı hər hansı narahatlıq hiss etmədiklərini qeyd edib:

“Hesab edirəm ki, biz bu işi genişləndirməli, vətəndaş cəmiyyətlərini prosesə daha çox cəlb etməliyik. Çünki Birgə Bəyanatda məhz vətəndaş cəmiyyəti nümayəndələrinin qarşılıqlı dialoqu təklif olunur.

Bizim orada təhlükəsizliyimiz təmin olunurdu, amma biz bunu hiss etmirdik. Hər hansı bir qorxu hiss etmədik. Hər şey çox təbii və rahat idi. Həm hava limanında, həm oteldə, yeməkxanada bizə çox hörmətlə yanaşırdılar. Ermənistanda bir gün qaldıq və hər şey standart qaydada təşkil olunmuşdu. Elə bir şərait yox idi ki, biz özümüzü narahat hiss edək”.