Prezident Administrasiyasının keçmiş rəhbəri, AMEA-nın sabiq prezidenti Ramiz Mehdiyevin Qarabağla bağlı mövqeyi yenidən gündəmə gəlib. Belə ki, onun keçmiş status-kvonun qorunub-saxlanmasında rol oynadığı bildirilir. Bir qədər əvvəl R.Mehdiyevin mediaya açıqlamasında Qarabağla bağlı suala cavab verməkdən yayınması bu baxımdan xüsusi diqqət çəkir.

İddialar var ki, R.Mehdiyev Qarabağ məsələsində Rusiyanın xeyrinə mövqe sərgiləyib. Onun məhz müharibədən bir il əvvəl PA-dan uzaqlaşdırılması da diqqət çəkir.

R.Mehdiyevin Qarabağ münaqişəsinin uzanmasında, torpaqlarımızın azad edilməsində nə kimi rolu ola bilərdi? Ümumiyyətlə, münaqişə ilə bağlı onun mövqeyi necə idi?

Globalinfo.az-a danışan siyasi şərhçi Asif Nərimanlı deyib ki, Ramiz Mehdiyevin Rusiyaya yaxınlığı və “beşinci kolon”a rəhbərlik etməsi sirr deyildi:

“Qarabağın işğal edilməsində və işğalda qalmasında əsas səbəbkarlardan biri Rusiya olub. Bu baxımdan Moskvaya bağlı şəxsin bu işğalın davam etməsində maraqlı olduğu istisna edilmir. Rusiya Qarabağın işğalından Azərbaycana, ümumilikdə regiona nəzarət məqsədilə istifadə edirdi. Rusiyanın nəzarətinin güclü olması bu ölkəyə bağlı şəxslərin də güclənməsi demək idi. Mehdiyev və komandasının maraqları burada da ortaya çıxır. Onun 2019-cu ildə, Vətən müharibəsindən öncə postundan uzaqlaşdırılması da bu kontekstdə təsadüfi deyil.

Əgər postunda qalsaydı, Rusiyanın istəyinə uyğun olaraq, torpaqlarımızın azad edilməsi prosesinə maneələr yarada, yaxud müharibənin gedişinə maraqlarımızın əleyhinə müdaxilələr edə bilərdi. Rəsmi təsdiqlənməsə də, sabiq baş qərargah rəisi Nəcməddin Sadıqovun timsalında belə cəhdlərin olduğu haqda məlumatlar var. Bu gün yayılan informasiyalar deməyə əsas verir ki, 2019-cu ildə Mehdiyevin postundan göndərilməsi və komandasının müəyyən qədər neytrallaşdırılması müharibədə daxili təxribatların önlənməsində mühüm addım olub”.

Siyasi şərhçi Mütəllim Rəhimli isə deyib ki, Ramiz Mehdiyevə elan olunmuş ittihamların mahiyyəti dövlət əleyhinə fəaliyyəti ehtiva edir:

“Dövlətə xəyanət, dövlət çevrilişi və cinayət yolu ilə əldə edilmiş əmlakın leqallaşdırılması ittihamlarına məruz qalan şəxsin bütün əməllərinin əsasında dövlətin sarsıdılması və uğurun yolunun bağlanması dayanır. Belə bir adam iqtisadi, siyasi və hərbi uğurlara necə sevinə bilər?!

Ramiz Mehdiyevin yayılan səs yazısında onun Qarabağda əldə edilən uğurları şərh etmək istəmədiyi görünür. Azərbaycanın ərazi bütövlüyünü, torpaqlarımızın işğaldan azad edilməsini istəməyənlər bu barədə danışmaqdan imtina edərlər. Yaxud da bu qələbəyə kölgə salmağa çalışarlar.

Bu sadəcə bir adamın mövqeyi deyil. Onun söykəndiyi, istinad etdiyi, əməkdaşlıq qurduğu, daim tapşırıqlar aldığı və xidmət etdiyi qüvvənin münasibətidir. Belə nəticəyə gəlmək olar ki, onların buradakı nümayəndələri çoxdur. Sadəcə olaraq bunu Mehdiyevin simasında gördük”.