Azərbaycan Mərkəzi Bankının (AMB) sədri Taleh Kazımovun “Bank BTB ASC”nin bağlanması ehtimalına reaksiyası diqqət çəkib. O bildirib ki, hazırda sözügedən bank AMB-nin tələblərinə cavab verir və dayanıqlıdır. Digər tərəfdən, “Bank BTB” bu ilin yanvar-sentyabr aylarını 641 min manat zərərlə başa vurub və bu, ötən ilin eyni dövrünə nisbətən 30 faiz çoxdur. Paralel olaraq, bankın səhmlərinin 76.74 faizi Nigar Mehdiyevaya, yəni Ramiz Mehdiyevin gəlininə məxsus olduğu əksəriyyətə bəllidir.
Ramiz Mehdiyevlə bağlı son hadisələr bankın dayanıqlığına təsir edə bilərmi? Bank hansı halda bağlana bilər? Rəsmi açıqlama Mehdiyevin ailəsinə məxsus bankın etibarına təsir edəcək?
Globalinfo.az-a danışan REAL Partiyasının sədri Natiq Cəfərli deyib ki, Azərbaycanda zaman-zaman zəif və problemli bankların bağlanması halları müşahidə olunur:
“Bank BTB” ilə bağlı da gələcəkdə bu cür qərarın verilməsi təəccüblü olmaz. Hazırda bank AMB-nin müəyyən etdiyi tələblərə uyğundursa, qurum müştərilərin mənafeyini, depozitləri və kreditləri nəzərə alaraq hər hansı addım atmaqdan çəkinə bilər. Lakin gələcəkdə bankın fəaliyyəti ilə bağlı ciddi problemlər yaranarsa, AMB-nin onun lisenziyası barədə qərar qəbul etməsi mümkündür. Məhkəmə qərarı olmadan mülkiyyət dəyişdirilə bilməz. Buna görə də istintaqın gedişatını izləmək vacibdir. Mehdiyevlərin əmlakı ilə bağlı məsələlərin hansı həddə araşdırılacağı da bunun nəticələrindən asılı olacaq. Ümumilikdə, gələcəkdə bu istiqamətdə qərarların verilməsi istisna deyil”.
Hüquqşünas, iqtisadçı Əkrəm Həsənov isə qeyd edib ki, bankın Ramiz Mehdiyevin ailəsinə məxsusluğu onun mütləq bağlanılmalı olduğu mənasına gəlmir:
“Bankın qanunsuz vəsait hesabına əldə edildiyi sübut olunarsa, o zaman məhkəmə qərarı ilə əmlak kimi müsadirə edilərək hərraca çıxarılır. Belə halda digər şəxs bankı satın ala bilər. Lakin bu, bankın bağlanması üçün əsas sayılmır. Eyni zamanda, bankın zərərlə işləməsi də onun fəaliyyətinin dayandırılması üçün səbəb deyil. Əgər bank AMB-nin kapital adekvatlığı və digər tələblərinə riayət edirsə, zərərlə işləməyə davam edə bilər. Çünki bu, onun daxili maliyyə problemidir və bağlanma üçün əsas yaratmır”.
