Hövsan stomatoloqları TƏBİB-dən Prezidentə şikayət məktubu göndəriblər.

Ovqat.com-un məlumatına görə, məktubda TƏBİB “Səhiyyə arabasının 5-ci təkəri” olmaqda günahlandırılır.

Məktubu olduğu kimi təqdim edirik.

“Azərbaycan Prezidenti Cənab İlham Əliyevə

Hövsan qəsəbəsində yerləşən 23 saylı poliklinikanın stomatoloqları adından

Müraciət

Möhtərəm Prezident,

Sizin yürütdüyünüz uzaqgörən siyasət nəticəsində Azərbaycan vətəndaşlarının tibbi yardım alma və səhiyyə işçilərinin sosial təminatı xeyli dərəcədə yaxşılaşıb. Bununla belə, onu da nəzərinizə çatdırmağı vacib hesab edirik ki, Sizin vətəndaşların sosial rifah halının və sağlamlığının yüksəldilməsi istiqamətində apardığınız məqsədyönlü siyasətinizə rəğmən hər vəchlə onu gözdən salmağa çalışan məmurlarımız da az deyil. Zamanınızı çox almadan bildirmək istərdik ki, TƏBİB adlı heç bir işə yaramayan, arabanın 5-ci təkəri funksiyasını yerinə yetirən qurum biz stomatoloqları rəsmən tasa oturdub. Bizdən hər ay qeyri-qanuni şəkildə 1800 manat xərac istəyir, əks halda işimizlə vidalaşmağımızla bizi təhdid edir. Halbuki, biz Hövsan kimi kasıb rayonun sakinlərinə xidmət edir və əməyimiz müqabilində adətən heç bir ödəniş almırıq. Bizdən istənilən 1800 manatı ayda qazanmaq imkanımız belə yoxdur. Hesab edirik ki, orta əsrlərin xəracına bənzəyən bu tipli tələblər “5-ci kolon”un Sizin uğurlu sosial siyasətlərinizə kölgə salmaq və ölkədə süni şəkildə narazılıqlar ordusu yaratmaq məqsədi güdür. Çünki bu absurd tələbi yerinə yetirə bilməyən əksər həkimlər işdən çıxmağa məcbur ola və Hövsan kimi kasıb rayonun sakinləri sağlamlıqları ilə sınağa çəkilə bilər. Bu isə, təbii ki, əhalini qəsdən sosial narazılığa sürükləmək deməkdir.

Hesab edirik ki, təkcə bizə yox, həm də dövlətimizin təhlükəsizliyinə qarşı yönəldilmiş bu cür özbaşınalıqların qarşısının alınmasına çalışacaq və öz vəzifə səlahiyyətlərindən ciblərinin doldurulması üçün istifadə edən məmurların cəzalandırılmasına göstəriş verəcəksiniz.