Türkiyədə iqtisadi böhran olduğundan, bura çalışmağa gələn naxçıvanlıların bəzisinə maaş əvəzi geyim əşyaları verilir. Sədərək gömrüyü isə, bu vəziyyətdən istifadə edib, rüsum adı ilə onlardan yüksək məbləğdə pul tələb edir. Bu haqda “Gündəlik Naxçıvan”a bir qrup yerli sakin məlumat verib.
Onlar bildirirlər ki, risumu ödəmək istəsələr belə, gətirdikləri geyim əşyalarını əllərindən alıb, anbara vururlar. Bu malı çıxarmaq üçün isə, onları günlərlə get-gələ salırlar. Anbarda qalan malların hər günü üçün əlavə rüsum tələb olunduğundan, sakinlər çox vaxt gətirdiklərindən imtina etməli olurlar.
Beləliklə, onlar Türkiyədə aylarla işləyib qazandıqlarını Sədərək gömrüyündə qoyub, çıxmalı olurlar.
Ordubad rayon sakini Elsevər Quliyev deyir ki, dəyəri 500 manat olan geyimləri çıxarmaq üçün ondan 700 manat tələb ediblər:
“Türkiyədə işlədiyim yerdə pul problemi olduğuna görə, maaşımın bir hissəsinin yerinə 500 manatlıq geyim əşyaşı vermişdilər. Gömrükdə buraxmadılar. Dedim ki, rüsumu nədir deyin ödəyim. Mən Ordubada gedirəm. Bir həftə sonra geri qayıtmalıyam. Dedilər ki, olmaz. Bizim işimiz anbar vurmaqdır, sonra gedib şəhər gömrüyündən götürərsən. Bir gün sonra malı götürmək üçün getdim. Dəyəri 500 manat olan mal üçün 700 manat rüsum istədilər. Etiraz etdim, ki, qanunla maksimum 33 faiz tələb edərlər. Bunfan sonra ggah müqavilə, gah qəbz istədilər, gah da laboratoriyadan kağız tələb etdilər ki, birdən mallarda xəstəlik olar. 3-4 gün boşuna gedib, gəldim, 80 manat da bu günlərə yazdılar. Məcbur qalıb, gətirdiklərimdən imtina etdim.”
Sərxan Orucov isə, gəzmək üçün getdiyi Türkiyədən aldığı geyimlər üçün dəyərindən artıq rüsum ödədiyini deyir:
“Türkiyədə xoşuma gələn geyim əşyaları oldu, ailəm üçün aldım. Cəmisi 300 manatlıq mal idi. Gömrükdə saxladılar. Dedim rüsumunu ödəyim aparım. Dedilər bizlik deyil, Bizim işimiz anbara vurub, sənədləşdirməkdir. Şəhər gömrüyündən götürərsən. Bir gün sonra getdim 400 manat pul istədilər. Dedilər ki, karqoya vurardın. Karqo da özlərinindir. Malın kilosunu 7 ABŞ dollarına gətirirlər. İstədikləri pulu verdim və malımı götürdüm.”
Sakinlər bildirirlər ki, əvvəllər gömrükdə dəyəri min manata qədər olan geyim və məişət əşyasına problem yox imiş. Bir müddət əvvəl bu məbləği 600 manata endirilib, indi isə ümumiyyətlə imkan verilmir.
