2026-cı il ciddi kadr islahatları ili olacaq.
Bizimesr.az-a məlumatlı mənbələrdən daxil olan məlumata görə, yeni ildən əsasən nazirlərin yenilənməsi prosesi davam edəcək. Məlumata görə, son 2–3 ildə yüksək vəzifələrə irəli çəkilən şəxslər qarşıya qoyulmuş tələbləri nəinki icra edə bilməyiblər, əksinə, onların addımları daha ciddi problemlərin yaranmasına gətirib çıxarıb. Üstəlik, bu yüksək çinli məmurlar, əsasən də nazirlər öz fəaliyyətlərində davamlı nöqsanlara yol veriblər.
Məlumatda qeyd olunur ki, yenilənəcək nazirlər arasında Elm və Təhsil naziri Emin Əmrullayevin, Kənd Təsərrüfatı naziri Məcnun Məmmədovun, Dövlət Gömrük Komitəsinin rəisi Şahin Bağırovun, Rəqəmsal inkişaf və nəqliyyat naziri Rəşad Nəbiyevin və Fövqəladə Hallar naziri Kəmaləddin Heydərovun da adı var.
Rəqəmsal inkişaf və nəqliyyat naziri Rəşad Nəbiyevin dəyişdirilməsi ilə qurumun nəzarətində olan, əsasən, nəqliyyat sektorunun yarıtmaz rəhbərliyi də avtomatik olaraq dəyişdirilmiş hesab olunacaq. Çünki Rəqəmsal inkişaf və nəqliyyat naziri Rəşad Nəbiyevin Müşahidə Şurasının rəhbəri olduğu AZCON Holdinqin tərkibində ölkənin nəqliyyat infrastrukturuna nəzarət edən qurumlar birləşib. Bu qurumlar da demək olar ki, qarşıya qoyulmuş vəzifələri, inkişafı təmin edə bilməyib. Metropolitendəki bitməyən problemlər, AYNA və sair kimi qurumların məlum narahatlıq yaradan fəaliyyəti artıq Rəşad Nəbiyevin bu vəzifədə qalmasını böyük sual altına qoyub.
Həmçinin 2025-ci ildə Elm və Təhsil naziri Emin Əmrullayevin qalmaqallarla dolu fəaliyyəti, yüzlərlə məktəbin hələ də direktorsuz qalması, müəllimlərin imtahanlarla bağlı narazılığı və əsasən təhsil sistemində hələ də qalan rüşvət qalmaqalları ilə bağlı məqamlar bu nazirin də dəyişdirilməsini labüd edir.
Kənd Təsərrüfatı naziri Məcnun Məmmədova gəlincə, onun fəaliyyəti ümumiyyətlə, qənaətbəxş deyil. Ölkənin kənd təsərrüfatı sistemi sözün əsl mənasında ciddi geriləmədədir. Məcnun Məmmədovun görünməz fəaliyyəti onun birmənalı olaraq bu postda qalmasına yaşıl işıq yandırmır.
Fövqəladə Hallar naziri Kəmaləddin Heydərov isə yaş həddi ilə bağlı təqaüdə göndəriləcək. Qeyd edək ki, Heydərovun 64 yaşı var. O, 20 ildir Fövqəladə Hallar naziri postunu tutur.
