"Sabiq SOCAR prezidenti Rövnəq Abdullayevin dövründə hər il az da olsa, əmək haqqında artım olurdu... O gedəndən sonra əmək haqqı artımı da o vaxtdan fəhləyə arxasını dönüb gedib və geri dönəcəyinə də ümüd yoxdur..." "DİA-AZ" xəbər verir ki, bunu özünün etiraz dolu müraciətində SOCAR işçisi Zamiq Əliyev qeyd edib.

O daha sonra bildirir: "Qeyd edim ki, inflyasiya şəraitində 5 il müddətində əmək haqqının artırılmaması işçilərin sosial-iqtisadi vəziyyətinə ciddi və çoxşaxəli mənfi təsirlər göstərir. Xüsusilə də SOCAR kimi strateji əhəmiyyətli qurumda bu cür yanaşma yalnız fərdi rifaha deyil, həm də ümumi istehsalat səmərəliliyinə və sosial sabitliyə zərbə vurur

Hər kəsə məlumdur ki, inflyasiya pulun alıcılıq qabiliyyətini sistemli şəkildə azaldır. Əgər əmək haqqı nominal olaraq sabit saxlanılırsa, faktiki olaraq işçinin real gəliri ildən-ilə aşağı düşür. Bu isə işçinin gündəlik tələbatlarını – ərzaq, kommunal xidmətlər, nəqliyyat v.s xərclərini qarşılamaq imkanını ciddi şəkildə məhdudlaşdırır. Nəticədə işçi minimum yaşayış standartından aşağı səviyyəyə enmək riski ilə üzləşir ki, bu da sosial ədalət prinsipinin kobud şəkildə pozulmasıdır.

Sosial baxımdan isə əmək haqqının artırılmaması ailələrin rifahına birbaşa təsir edir. İşçilərin kredit öhdəliklərini yerinə yetirmək qabiliyyəti azalır, yoxsulluq riski artır və sosial təbəqələşmə dərinləşir. Bu isə artıq təkcə iqtisadi deyil, həm də ictimai təhlükəsizlik məsələsinə çevrilə bilər.

Nəticə etibarilə deyim ki inflyasiya fonunda əmək haqqının 5 il ərzində artırılmaması həm həm iqtisadi, həm də sosial baxımdan qəbuledilməzdir. Bu hal işçilərin fundamental sosial hüquqlarının pozulmasıdır və işçilərin dilənçi vəziyyətinə salınmasıdır..."