Şaxtalı havalar Naxçıvan şəhərinin istilik təminatındakı çatışmazlıqları daha aydın üzə çıxarıb. Yaşayış binalarına verilən istilik normal olmadığından sakinlər -20 dərəcəyədək şaxtada evlərini qızdırmaq üçün təhlükəli üsullardan istifadə etməyə məcbur qalırlar.

Onlar ya mətbəxdə qazı açıq qoyur, ya da elektrik qızdırıcılarından istifadə edirlər.

Şəhər sakini Oruc Qurbanov deyir ki, bu üsullardan məcbur qalıb istifadə edirlər:

“İstilik pulunu qaldırıblar, indi 45 qəpikdir. Ayda 60 manata yaxın pul alırlar, amma bir az şaxtalar düşən kimi normal istilik verilmədiyi ortaya çıxır. Şaxtalar düşəndən sonra ev normal qızmır. Uşaqlar xəstələnməsin deyə, məcbur qalıb qazı yandırırıq, üstəlik elektrik piltəsi də qoşuruq. Ayın sonunda ikiqat xərc çıxır və pulunu ödəyə bilmirik. Şikayət edəndə də işçilər məsuliyyəti bir-birinin üzərinə atırlar.”

Digər şəhər sakini Veysəl Əliyev isə bildirir ki, problemlə bağlı aidiyyəti qurumlara şikayət etsələr də, nəticəsi olmayıb:

“İstilik üçün pulu nəyə ödəyirik, niyə əlavə olaraq özümüz də xərc çəkməliyik? Əvvəllər yaxşı idi, amma şaxtalar düşəndən sonra mərkəzləşdirilmiş istilik zəif verilir. Gecələr ev buz kimi olur. Ya soyuqda oturmalısan, ya da artıq pul xərcləyib özünü isitməlisən. Əlavə elektrik peçi qoşmuşam, ara-sıra qaz piltəsini də açıq saxlayıram. Bu da kommunal xərcləri ikiqat artırır. Ailədə işləyən bir mənəm. Aldığım maaş 500 manatdır. Onsuz da çətinlik çəkirdik. Belə davam etsə, aldığım maaşı da bunlara ödəməli olacağam. Nə şəhər icra hakimiyyəti, nə də digər müvafiq qurumlar şikayətlərimizə baxır.”