Gununsesi.info olaraq Bakı Şəhər İcra Hakimiyyətinin başçısı Eldar Əzizovun və daha bir neçə icra başçısının Mehdiyevə Bakı şəhərində villa tikməsi və mənzil bağışlamasından bəhs etmişdik.

Bu barədə yazılardan sonra məlum oldu ki, Ramiz Mehdiyevin əmlakları təkcə Bakıda deyilmiş.

Əhalinin sıx məskunlaşdığı Göyçayda 40 hektarlıq, hündür hasarla əhatələnmiş bir bağ var.

Rayonun Hüngütlü kəndi ərazisindəki bu bağ keçmiş nəqliyyat naziri Ziya Məmmədovun tapşırığı ilə bir vaxtlar Göyçay rayon icra hakimiyyəti başçısı Mənsur Məmmədov tərəfindən inşa olunub.

Araşdırmamız zamanı öyrəndik ki, bu evin inşa olunduğu və əhatələndiyi torpaq camaatın əlindən alınaraq Ramiz Mehdiyevə hədiyyə edilib.

Sakinlər deyir ki, Ziya Məmmədovun qardaşı İldırım Məmmədovun bilavasitə başçılığı ilə zorakı üsullarla, hədə-qorxu gəlinməklə əhalidən dəyər-dəyməzinə müsadirə olunub.

Camaatın pay torpaqları birləşdirilərək əzəmətli imarətin tikilməsində sözün əsl mənasında yerli sakinlərin qanı sovurulub.

2012-2014-ci illərdə Mənsur Məmmədov bu bağın salınması, ətrafına hasar çəkilməsi, içərisində şərq hökmdarlarının sarayına bənzədilən imarətin tikilməsi üçün sahibkarlardan belə pul toplayıb.

Onun əlaltıları Ramiz İbrahimov(həyatda yoxdur) Vahid İsayev, Rəşad Şükürov və hal-hazırda Yevlax rayon məhkəməsinin sədri Ruslan Əlizadə həmin dövrdə bütün idarə və təşkilatların rəhbərlərini məcbur edərək küllü miqdarda vəsait toplayıb bu obyektin tikintisinə yönəltmişdir.

Hətta Mənsur Məmmədov rayon məktəblilərindən də pul yığdırmaqla qısa müddətə işləri yekunlaşdırmağa müvəffəq olur.

Yerigəlmişkən bu işdə Ruslan Əlizadə xüsusi canfəşanlıq göstərib. Mənsur Məmmədov onu hər hansı tapşırıq dalınca göndərəndə Ruslan heç başçısının ağlına gəlməyən iki qat artıq məbləğlə geri dönürdü. Beləcə “etimad” qazanan Ruslan indi insanların taleyinə hökm vermək səlahiyyətində iş başındadır.

Mənsur Məmmədovsa 25 ildir, Zərdab, Ucar və Göyçayda başçı işləyir. Hal-hazırda onun yüz milyonlarla ölçülən varidatı, çoxsaylı obyektləri mövcuddur.

2014-ci ildə tikintisi başa çatan bağa lazım olan vəsaiti toplamaq üçün həmin dövrdə Göyçay rayonunda polis rəisi işləyən Vüqar Məmmədyarov pul toplanması üçün daha orjinal vasitələrə əl atırdı.

O, rayonda dilənçiliklə məşğul olan hər bir dilənçidən gündəlik 30 manat məbləğində “haqq”alır, xüsusi günlərdə, məsələn nar festifalı olan bayram günlərində dilənçiləri gündəlik 50 manat verməyə məcbur edirdi.
Hasarının daşları vətəndaşların qanı ilə hörülən bu bağ tikilib, inşa ediləndən sonra camaat düşündü ki, rahat nəfəs alar.

Təəssüf ki, belə olmadı. Bağda pələng saxlatdıran Mənsur Məmmədov hər gün bələdiyyə sədrlərini, icra nümayəndələrini, baytarlıq idarəsi rəhbərlərini pələngləri yemləmək üçün təzə quzu ətinə pul vermələrini məcbur edirdi.

Evinə bir kq ət ala bilməyən zavallılar məcburiyyət qarşısında bu qansızlığa dözürdülər. Hərçənd ki, “dözürdülər” ifadəsi bu məqamda yersizdir.

Çünki hətta borc içində üzən bələdiyyə sədirlərindən intihar edənlər də oldu. Bütün bunlar o vaxt Milli Təhlükəsizlik Nazirliyi yerli əməkdaşlarının gözləri qarşısında baş verirdi. Sabiq nazir Eldar Mahmudov yəqin onu da bilməmiş deyildir ki, hədiyyə olunan imarətinə gələn Ramiz Mehdiyev o qanla hörülmüş divarlar arxasında dövlətçiliyə qarşı planlar cızırdı. Kim bilir, onların planlarında Ramiz Mehdiyev, Ziya Məmmədov tandemi Mənsur Məmmədova hansı postu və səlahiyyəti nəzərdə tutubmuş.

Tez-tez helikopterlə bağa gələn Qalina Mehdiyevanın hər gəlişində Mənsur Məmmədov əmrə müntəzir bu ətrafına saatlarla dolanıb qalırdı.

Yəqin ki, DTX da aparılan araşdırmalarda Mənsur Məmmədovun da Mehdiyev yolunda çəkdiyi cəfakeş fəaliyyət üzə çıxacaq və o, da haqq etdiyi cəzanı alacaq.