Şabran rayonunun Qoğan kəndində yaşayan Hacıyevlər ailəsində hazırda iki nəfər ağır onkoloji xəstəlikdən əziyyət çəkir. Lakin bu xəstələrin müalicəsi, dolanışığı üçün lazım olan vəsaiti ailə ala bilmir.
Bizimyol.info xəbər verir ki, Təvəkkül Hacıyev 5 aydır ki, bülletendə olduğu müddətə görə ona ödənilməli olan vəsaiti ala bilmir. Bu isə onsuz da çətin şərtlər altında yaşayan ailənin daha da acınacaqlı vəziyyətə düşməsinə səbəb olub.
Təvəkkül Hacıyevin özü ilə yanaşı, gəlini Günel Hacıyeva da onkoloji xəstəlikdən əziyyət çəkir: “Kənd yeridir, vəziyyət onsuz da çətindir. Üstəlik, evdə iki onkoloji xəstə... Biz başqa bir şey istəmirik ki. Halal pulumuzu istəyirik. Onkoloji xəstə adamın pulunu verməmək nə deməkdir? Bu hansı insafa, vicdana sığır? Bunlar düşünmür ki, bu aylar ərzində bu adamın özü, ailəsi nə yeyir, nə içir, dərmanlarını necə alır? Neçə dəfə kənddən rayon mərkəzinə xəstəxanaya gedib-gəlmişik. Hər dəfə gedib-gəlməyə nə qədər yolpulu çıxır. Səhiyyə deyir, sosial medafiə köçürməlidir. Sosial müdafiə deyir, səhiyyəlikdir. Belə zülm olmaz vətəndaşın başına açırlar. Biz hardan bilək ki, kimlikdir. Əsas budur ki, sizlərin səhlənkarlığınız ucbatından biz əzab çəkirik”.
Bülletendə olan vətəndaşların pullarının ödənilməməsi ilə bağlı problem barədə Bizimyol.info bir müddət əvvəl də məlumat vermişdi. Məlumatda bildirilirdi ki, “sistemdə problem var” bəhanəsi ilə xəstə insanlar əlavə çətinliklərlə üzləşməli olur.
Artıq 5 aydır ki, ölkədə əmək qabiliyyətinin müvəqqəti itirilməsinə görə müavinətlə (bülleten) bağlı məsələlərin həlli də elektronlaşdırılıb. Mayın 1-dən “e-bülleten” sisteminə keçilib. Bu keçidin özü də onsuz da sağlamlığındakı problemlərdən əziyyət çəkən insanlara əlavə problemlər yaradıb. Hələ aprel ayında Əmək və Əhalinin Sosial Nazirliyi bununla bağlı məlumat yayaraq bəyan etmişdi ki, Nazirlər Kabinetinin müvafiq qərarına əsasən tətbiq edilən innovativ yenilik olaraq. Səhiyyə Nazirliyinin “Vahid Səhiyyə İnformasiya Sistemi” vasitəsilə “Sığortaolunanlar üçün xəstəlik vərəqələri” Səhiyyə Nazirliyinin və Tibbi Ərazi Bölmələrini İdarəetmə Birliyinin (TƏBİB) tabeliyində fəaliyyət göstərən tibb müəssisələrində elektron sənəd formasında hazırlanacaq. Bundan sonra tibb müəssisələri tərəfindən e-imza ilə təsdiq edilərək, işəgötürənə və Əmək və Əhalinin Sosial Müdafiəsi Nazirliyinin tabeliyindəki Dövlət Sosial Müdafiə Fonduna (DSMF) elektron qaydada göndəriləcək. Həmin elektron sənəd DSMF tərəfindən işçiyə müvəqqəti əmək qabiliyyətinin itirilməsinə və hamiləliyə, doğuma görə müavinətlərin təyinatı üçün əsas olacaq: “Bu məqsədlə, Səhiyyə Nazirliyi tərəfindən Əmək və Əhalinin Sosial Müdafiəsi Nazirliyi ilə birgə elektron xəstəlik vərəqələrinə dair məlumatlar vahid e-reyestrdə birləşdirilib. Nəticədə işəgötürənlər bu e-bülletenləri Əmək və Əhalinin Sosial Müdafiəsi Nazirliyinin müvafiq informasiya sistemindən, tibb işçiləri isə “e-Səhiyyə” portalı və mobil tətbiqindən asan və rahat şəkildə əldə edə biləcək.
“E-bülleten” sisteminə keçid qeyd edilən sahədə kağız daşıyıcıların saxlanması və emalı ilə bağlı artıq iş yükünün aradan qaldırılması və vaxt itkisinin minimallaşdırılmasına, xidmətlərin çevikliyinə və keyfiyyətinin, şəffaflığının artırılmasına şərat yaradır”. Lakin praktikada bu sistemə keçid vətəndaşların problemlərini həll etmək əvəzinə, onlara əlavə problemlər yaradıb. Göründüyü kimi, onlar aylardır pullarını ala bilmirlər.
