Türkiyədə Ankara Prokurorluğunun apardığı istintaq çərçivəsində “Süleymançılar” dini qruplaşmasının lideri Alihan Kuriş də daxil olmaqla, 49 nəfər barəsində saxlanılma qərarı verilib. Şübhəlilərdən A.Kuriş də daxil olmaqla 30 nəfər artıq saxlanılıb.

Yenicag.az xəbər verir ki, Ankara mərkəzli əməliyyatın 17 vilayətdə eyni vaxtda həyata keçirildiyi, ümumilikdə 123 ünvanda axtarış aparıldığı və müsadirə tədbirlərinin görüldüyü öyrənilib. Əməliyyat çərçivəsində Türkiyənin Hakimlər və Prokurorlar Şurasının (HSK) sabiq üzvü Prof. Dr. Ahmet Gökçen də daxil olmaqla onlarla şəxs, həmçinin fərqli sektorlarda fəaliyyət göstərən 33 şirkət istintaqa cəlb edilib.

MASAK araşdırması və FETÖ metodları: 100 milyard lirəlik şübhəli transfer

Sözügedən istintaqın strukturun ierarxik və iqtisadi mənfəət yönümlü kriminal qruplaşma olub-olmadığının araşdırılmasına yönəldiyi bildirilib. Şübhəlilərə qarşı korrupsiya, çirkli pulların yuyulması və milyardlarla lirəlik usulsüzlüklər iddiaları irəli sürülüb.
Türkiyənin Maliyyə Cinayətlərini Araşdırma Qurumunun (MASAK) analizlərinə əsasən, təşkilatla əlaqəli şəxs və şirkətlər üzərindən 100 milyard lirədən çox vəsaitin xaricə çıxarıldığı, həmçinin İsraillə əlaqəli pul trafikinin mövcudluğu araşdırılır. Qruplaşmanın “WhatsApp” əvəzinə xüsusi şifrəli proqramlardan istifadə etdiyi, sistemin ierarxik strukturu və qapalı xəbərləşmə şəbəkəsi ilə tamamilə FETÖ metodlarını kopyaladığı vurğulanır.

Alman kəşfiyyatının çətiri altında 70 milyon dollarlıq mərkəz

Əməliyyatla bağlı ən diqqətçəkən məqamlardan birini isə Türkiyənin daxili işlər naziri Mustafa Çiftçi açıqlayıb. Nazir qeyd edib ki, 2016-cı ildə təşkilatın rəhbərliyinə keçən Alihan Kuriş bütün fəaliyyətləri böyük məxfilik içərisində idarə edir: “Hazırda Almaniyanın Köln şəhərində 70 milyon dollarlıq nəhəng bir mərkəz inşa edirlər və bütün fəaliyyətlərin artıq oradan idarə olunacağını ehtimal edirik.”

Türkiyə mediası və analitiklərin qənaətinə görə, qruplaşmanın mərkəzini məhz Almaniyaya köçürməsi təsadüfi deyil. Bu proses birbaşa Alman kəşfiyyatının (BND) himayəsi və nəzarəti altında həyata keçirilir. Alman kəşfiyyatı FETÖ ilə ortaq hərəkət edən “Süleymançılar”a Avropada təhlükəsiz sığınacaq və iqtisadi genişlənmə zəmanəti verir, əvəzində isə bu hibrid strukturu Türkiyəyə və postsovet məkanına, xüsusən də Azərbaycana qarşı bir təzyiq rıçağı kimi istifadə etməyi planlaşdırır.

İstintaqda adı keçən şirkətlərin Azərbaycandakı izləri: “Hisar Tour” faktı

Baş Prokurorluğun açıqlamasına əsasən, ELF Yapı, Armine Giyim, Ayakkabı Dünyası, Göknur Gıda kimi şirkətlərlə yanaşı, “İstanbul Hisar Turizm ve Ticaret A.Ş.” də axtarış aparılan müəssisələr arasındadır.
Qruplaşmanın 100 milyardlıq maliyyə şəbəkəsində yer alan bu şirkətlər arasında Azərbaycanda (xüsusən Bakı şəhərində) birbaşa rəsmi şəkildə fəaliyyət göstərən yeganə müəssisə məhz “Hisar Turizm”dir. Təriqətin əsas logistika halqası olan bu şirkət Azərbaycanda “Hisar Tour” (Həcc və Ümrə Xidmətləri) adı altında fəaliyyət göstərir. Türkiyədəki ana qurumun qlobal (Almaniya, ABŞ, Malayziya) şəbəkəsinin rəsmi filialı olan “Hisar Tour Azerbaijan”, qruplaşmanın ölkəmizdəki iqtisadi və təşkilati dayağı rolunu oynayır.
Qruplaşmanın Azərbaycan ayağı: FETÖ-“Süleymançılar” ittifaqı və Alman kəşfiyyatının rolu
Azərbaycanın hüquq-mühafizə orqanlarının davamlı mübarizəsi nəticəsində “Süleymançılar”ın ölkəmizdəki tələbə yataqxanaları və yeraltı tədris mərkəzləri şəbəkəsinin fəaliyyəti böyük ölçüdə məhdudlaşdırılsa da, təhlükə yeni forma alaraq davam edir.

Hələ bir il öncə Yenicag.az saytı olaraq biz bu təhlükəyə diqqət çəkmiş və FETÖ-nün məhz “süleymançılar” üzərindən Azərbaycanda dini sferada yenidən təşkilatlanmağa çalışdığını faktlarla gündəmə gətirmişdik.

Məlumata görə, FETÖ üzvləri hazırda həm Avropada, həm də Azərbaycanda daha rahat hərəkət etmək və diqqətdən kənarda qalmaq üçün məhz “yeni süleymançı” kartından istifadə edirlər. “Süleymançılar”ın lideri Alihan Kurişin bu vəziyyətə göz yummasının arxasında isə məhz Alman kəşfiyyatının dəstəyi və təşkilatçılığı dayanır. Kəşfiyyatın vasitəçiliyi ilə Kuriş Fətullah Güləndən sonra FETÖ-nün əsas liderlərindən sayılan Abdullah Aymaz ilə sıx ittifaq qurub.

Alman kəşfiyyatı və Abdullah Aymaz vasitəsilə FETÖ-nün iqtisadi rıçaqlarına çıxış əldə edən Kuriş, təkcə Almaniyada (Köln mərkəzində) deyil, Azərbaycanda da terror təşkilatı üzvlərinin “süleymançı” adı altında gizlənməsinə şərait yaradır. Türkiyənin müvafiq qurumları Alman kəşfiyyatı tərəfindən idarə olunan bu iki şəbəkənin birgə hərəkət etdiyinə dair əsaslı dəlillərə malik olduğu üçün “süleymançılar”ı da “qara siyahı”ya alıblar.

Azərbaycanda “Ev söhbətləri” yenidən bərpa olunub

Araşdırmaya görə, 15 İyul çevriliş cəhdindən sonra Azərbaycanda fəaliyyətini donduran FETÖ, artıq “yeni süleymançılar” cildində məşhur “Ev söhbətləri”ni bərpa edib. Dini camaatların yeni üzvləri “verbovka” etmək və informasiya mübadiləsi aparmaq üçün istifadə etdiyi bu “söhbətlər” şəbəkənin yenidən böyüməsinə xidmət edir.

Əvvəllər FETÖ-nün Azərbaycan üzrə məsulu Naci Tosuna bağlı olan hücrələr indi birbaşa Abdullah Aymazın nəzarətinə keçib. İtirilmiş mövqelərin bərpasında israrlı olan Aymaz, əsas hədəf kimi biznes strukturlarında çalışanların yenidən aktivləşdirilməsini seçib.

Dövlət adamlarını etibarsızlaşdırma taktikası
Alman kəşfiyyatının rəhbərliyi altında formalaşan FETÖ və “Süleymançılar”ın ortaq şəbəkəsi ölkədə gedən prosesləri manipulyasiya edərək güclənməyi və onlara əngəl ola biləcək Azərbaycan dövlət məmurlarını gözdən salmağı hədəfləyir. Təşkilat özlərinə qarşı olan şəxslərin adlarını müxtəlif qalmaqallarda hallandırmaqla ənənəvi etibarsızlaşdırma siyasəti yürüdür.
Türkiyə Polis Akademiyasının yaydığı FETÖ hesabatında da Azərbaycanla bağlı yer alan xəbərdarlıq bu məqamda yenidən aktuallaşır: “Azərbaycan Prezidenti İlham Əliyev FETÖ ilə mübarizədə ən ciddi dəstək verən dövlət rəhbərlərindəndir. Lakin pulun çox dövr etdiyi bəzi sahələrdə bürokratik şəbəkə hələ də mənfəət əlaqələrini saxlayır… FETÖ Azərbaycanda öz adamlarının önünü açmaq üçün təşkilata mənsub olmayan şəxsləri gözdən və nüfuzdan salmağa çalışır.”

Baş tutan son əməliyyat sübut edir ki, hədəf təkcə iqtisadi cinayətlərin qarşısını almaq deyil, həm də xarici kəşfiyyat orqanlarının (xüsusən Almaniyanın) nəzarətində formalaşan yeni FETÖ-“Süleymançı” hibridinin Türkiyədəki təhlükəli şəbəkəsini məhv etməkdir.

Aqil Ələsgər