Prezident Administrasiyasının sabiq rəhbəri Ramiz Mehdiyevin Rusiyanın Azərbaycandakı əsas adamı olması və bir sıra cinayətlərdə rol alması gündəmin əsas mövzusudur. Lakin bildirilir ki, mövzu təkcə Rusiya ilə məhdudlaşmır. Son zamanlar ekspertlər və siyasi müşahidəçilər Qərbin və İranın da Azərbaycanda öz “Ramiz Mehdiyevləri” ola biləcəyi ehtimalını irəli sürürlər.

Globalinfo.az-a danışan politoloq Elman Telmanoğlu deyib ki, Ramiz Mehdiyevin siyasi səhnədən tam uzaqlaşdırılması Azərbaycanda həm daxili, həm də xarici təsir dairələrinin balansına dair maraqlı suallar doğurur:

“Onun illərlə dövlət sistemində formalaşdırdığı əlaqələr şəbəkəsi, xüsusilə də informasiya və ideoloji sahələrdəki təsir imkanları uzun müddət Rusiya yönümlü dairələrin maraqlarına cavab verib. Lakin bu gün həmin “siyasət məktəbi” artıq arxivə qovuşur.

Ramiz Mehdiyevin sıradan çıxarılması təkcə Rusiya təsirinin zəifləməsi kimi yox, ümumilikdə xarici təsir oyunçularına açıq mesaj kimi də dəyərləndirilə bilər. Çünki postsovet məkanında bir çox hallarda siyasi elita daxilində “xarici dayağı olan” fiqurlar balans rolunu oynayırdı. Azərbaycan isə bu balans modelindən uzaqlaşaraq, milli maraqlara əsaslanan mərkəzləşdirilmiş siyasi idarəçilik xəttini seçib.

İranın və ya Qərbin “Ramiz Mehdiyevləri” var, təsir cəhdləri zaman-zaman müşahidə olunur. Bu, xüsusilə dini, QHT və informasiya platformalarında özünü göstərə bilər. Amma hazırkı mərhələdə belə fiqurların sistem səviyyəsinə yüksəlməsi, Mehdiyev qədər dərin dayaqlar qazanması real görünmür. Dövlətin təhlükəsizlik institusiyaları artıq bu cür əlaqələrin qarşısını erkən mərhələdə ala biləcək qədər çevik və koordinasiyalı fəaliyyət göstərir”.

Politoloq deyib ki, onların saxlanılmamalarının səbəb sadədir — indi “köhnə üsullarla” oynamaq mümkün deyil:

“Azərbaycanın siyasi sistemində şəffaflıq, idarəetmədə isə nəsil və düşüncə dəyişikliyi baş verir. Xarici təsir mexanizmləri bu yeni reallığa uyğunlaşa bilmir. Odur ki, bu gün “Ramiz Mehdiyev kartı” nə Rusiya, nə Qərb, nə də İran üçün əvvəlki kimi effektivdir.

Nəticə etibarilə, Azərbaycan artıq fərqli mərhələdədir – burada “kölgə oyunları” deyil, konkret milli maraqlar əsasında qurulan siyasət hökm sürür. “Ramiz Mehdiyev modeli” bitib, amma onunla bağlı dərslər unudulmur. Bu isə dövlətin suverenlik reflekslərinin nə qədər gücləndiyini göstərən ən real nümunədir”.