"Son gunlərdə Prezident İlham Əliyevin iştirakı ilə baş tutan beynəlxalq tədbirlər Azərbaycanın diplomatik fəallığının və artan qlobal nüfuzunun parlaq göstəricisinə çevrildi".
Bu barədə "Sherg.az"a açıqlamasında siyasi şərhçi Azər Niftiyev deyib.
Ekspert bildirib ki, qısa bir müddət ərzində dövlət başçısı Amerika, Avropa və Asiya qitələrini əhatə edən dörd mühüm sammitdə iştirak etdi, həmçinin Rusiya Prezidenti Vladimir Putinlə ikitərəfli görüş keçirdi:
"Bu intensiv diplomatik marafon Azərbaycanın çoxşaxəli, balanslı və çevik xarici siyasətinin real təzahürüdür. Prezident İlham Əliyevin beynəlxalq fəaliyyət marafonu 27 sentyabrda Nyu-Yorkda BMT Baş Assambleyasının 80-ci sessiyasında iştirakı ilə başladı. O, BMT Baş katibi Antoniu Quterreş və müxtəlif ölkələrin liderləri ilə görüşlər keçirdi. Prezident çıxışında Azərbaycanın sülh, sabitlik, iqlim məsələləri və enerji təhlükəsizliyi sahəsində atdığı addımları vurğuladı, COP29-un Bakıda keçirilməsinin qlobal əhəmiyyətini ön plana çıxardı. Bu səfər Azərbaycanın qlobal miqyasda etibarlı tərəfdaş və təşəbbüskar ölkə kimi nüfuzunu möhkəmləndirdi. Bir neçə gün sonra Prezident Danimarkanın paytaxtı Kopenhagendə keçirilən Avropa Siyasi Birliyi Zirvəsində iştirak etdi. Bu platformada İlham Əliyev Avropa liderləri ilə bir sıra görüşlər keçirərək enerji təhlükəsizliyi, nəqliyyat marşrutları və regional sabitlik məsələləri barədə fikir mübadiləsi apardı".
Analitik qeyd edib ki, prezidentin çıxışı Azərbaycanın Avropanın enerji təminatında oynadığı vacib rolu, eləcə də müstəqil siyasət kursunun ardıcıllığını bir daha nümayiş etdirdi:
"Daha sonra Prezident Qəbələdə keçirilən Türk Dövlətləri Təşkilatının Dövlət Başçıları Şurasının Zirvə Görüşündə çıxış etdi. Türk dünyasının birliyinin dərinləşdirilməsinə yönəlmiş bu sammitdə İlham Əliyev iqtisadi əməkdaşlığın genişləndirilməsi, birgə müdafiə təşəbbüsləri və mədəni inteqrasiyanın gücləndirilməsi istiqamətində konkret təkliflər irəli sürdü. Azərbaycanın bu platformada həm siyasi, həm iqtisadi, həm də mənəvi liderlik rolunu bir daha təsdiqlədi.
Ardınca Prezident İlham Əliyev Tacikistanın paytaxtı Düşənbəyə səfər edərək MDB Dövlət Başçıları Şurasının iclasında iştirak etdi. Burada Rusiya Prezidenti Vladimir Putinlə keçirilən ikitərəfli görüş xüsusi diqqət çəkdi. Görüş zamanı Azərbaycan-Rusiya münasibətlərinin hazırkı səviyyəsi, iqtisadi əməkdaşlıq, nəqliyyat-kommunikasiya layihələri və regionda sülh prosesi müzakirə olundu.
Görüşdə Azərbaycan-Rusiya tərəfdaşlığının bərabərhüquqlu, qarşılıqlı hörmət və praqmatik əməkdaşlığa əsaslandığı vurğulandı. Beləliklə, son 15 gün ərzində Prezident İlham Əliyevin üç fərqli istiqamətdə - ABŞ, Avropa və Asiyaya səfərləri, Qəbələ Zirvəsi və Rusiya ilə yüksək səviyyəli görüşü Azərbaycanın çoxvektorlu diplomatiyasını tam aydınlığı ilə tərənnüm etdirdi. Bu, Azərbaycanın eyni vaxtda Qərb, Şərq və regional tərəfdaşlarla səmərəli dialoq qura bilən nadir dövlətlərdən biri olduğunu göstərir. Prezident İlham Əliyevin diplomatik fəallığı təkcə ölkənin milli maraqlarını müdafiə etmir, həm də Azərbaycanın beynəlxalq münasibətlər sistemində etibarlı, sabitlik yaradan və strateji tərəfdaş kimi mövqeyini möhkəmləndirir. Onun bu iş qrafiki bir daha sübut edir ki, Azərbaycan artıq regional oyunçu deyil - qlobal proseslərə yön verən, dialoqu təşviq edən və sabitliyə xidmət edən mühüm aktordur".
