“Bizim teatrımızda elə aktyorlar var ki, tamaşadan sonra fəhlə kimi işləyirlər. Aktyor əlçatmaz olmalıdır. O vaxtın aktyorlarını görəndə bilmirdik ki, nə edək? İndi aktyor yazıq fəhlə də işləyir, usta da olur. Nə etsinlər? Ailə dolandırırlar. Əslində aktyora normal maaş verilsə, diqqət göstərilsə belə olmaz. Aktyor gələr, sənətçi kimi işini görər və gedər. Biz heç Rusiyadakı aktyorların da səviyyəsinə gedib çata bilmirik. Hələ Türkiyəni demirəm. Yazıq aktyorlar. Bu sənətə gəlmək mənim həyatımın ən böyük səhvidir. Hərbi sahəyə getməli idim. Bu sahəyə necə gəldimsə özümü bədbəxt, həyatımı heç-puç etdim”
Bunu Moderator.az-a açıqlamasında Şuşa Dövlət Musiqili Dram Teatrının aktrisası Mətanət Eres deyib.
O daha sonra əlavə edib:
“Aktyora diqqət yoxdur. Mükafatı 15 il eyni adamlara verirlər, o biri yetim aktyorlar nə etsin? “Xalq artisti” fəxri adını da, təqaüdünü də, mükafatı da, teatrda ən yüksək maaşı da, evi də xalq artistinə verirsən. Teatrda işləyən bircə xalq artistidir? Bütün teatr bu qədər plan ödəyir, büdcəyə gəlir gətiririk. Bəs bizim əziyyətimiz hara gedir? O zaman bizə də “xalq artisti” fəxri adı verin, biz də alaq. Bunun başqa yolu yoxdur. Bəzən deyirlər ki, fəxri adlar yığışdırılsın. Məncə yığışdırılmamalıdır. Çünki aktyora həyatda stimul verən nələrsə olmalıdır. “Əməkdar artist” adı əməyə görə verilir. 16 il stajın varsa “xalq artisti” fəxri adı da ala bilərsən. Aktyora bir çiçək, bir alqış, bir də diqqət lazımdır. Hər bir aktyor ona verilən diqqəti gözləyir. Ümid edirəm bu diqqətdən bizə də pay düşər” deyə aktrisa bildirib.
Tanınmış aktrisa seriallarda çəkilməməsinin səbəblərindən də danışıb:
“Seriallarda da pul vermirlər. Yoldan keçəni, sənətə aidiyyatı olmayanı da çəkirlər. Elələrinə pul verirlər, amma aktyor diplomu olana yox. Bir də teatrlarda hər rejissorun aktyor mafiyası olduğu kimi, seriallarda da belədir. Hər dəfə eyni adamlar çəkilir. Biz çəkiləndə pul verilmir, rejissor 5 yaylıqla ağlayır, büdcədən gileylənir. Rejissor keyfiyyəti yox, öz mənfəətini düşünür. Aktyor var ki, teatrda yaxşıdır kinoda yox, yaxud da əksinə. Aktyor da var ki, ikisində də yaxşıdır. Belə aktyorlar azdır. Bəzən də düşünürlər ki, pafosla danışmaq lazımdır. Adam var kamera görəndə danışığı da dəyişir. Təbiilik olmalıdır. Necə danışırlarsa, elə də simaları var. Təbii deyillər, hamı bir-birinə oxşayır, eyniləşib. Küçəyə çıxırsan qızları bir-birində ayırmaq olmur. Serial və filmə çağıranda adətən soruşurlar ki, üz cizgiləri özünündür? Silikon yaxud botoks yoxdur? Sənətçilər elə bilir ki, bu yaxşıdır. Amma çox iyrənc görünürlər” deyə o bildirib.
