Ermənistanda seçkilər yaxınlaşdıqca siyasi gərginlik də artır. Revanşist qüvvələr hər fürsətdən istifadə edərək, aktivləşməyə çalışır. Eyni zamanda, kilsə Paşinyan qarşıdurması da davam edir. Dünən Araqatsotn yeparxiyasının yepiskopu Mkrtıç Proşyan iki aylıq müddətinə həbs olunub.

Yepiskop seçki hüquqlarının həyata keçirilməsinə mane olmaqda (Ermənistan Cinayət Məcəlləsinin 149-cu maddəsi) və ictimai toplantılarda iştiraka məcbur etməkdə (Cinayət Məcəlləsinin 236-cı maddəsi) ittiham edilib. Keşiş Qaregin Arsenyan da yepiskopla birlikdə bir ay müddətinə həbs edilib.

Baş verənlər fonunda görəsən, seçkiöncəsi Paşinyanın reytinqi hansı səviyyədədir?

Mövzu ilə bağlı Bizim.Media-ya açıqlamasında politoloq Tural İsmayılov bildirib ki, Ermənistanda son günlər kilsə daxilində baş verən həbslər və revanşist dairələrin fəallaşması ölkədə siyasi xaosun yeni mərhələsinin göstəricisidir:

“Bu proses təkcə din pərdəsi altında gizlənən siyasi oyundur. Revanşistlər cəmiyyətin hisslərini manipulyasiya edərək hakimiyyətə qayıtmaq planı qururlar. Halbuki bu qruplar 30 il ərzində ölkəni korrupsiya, təcrid və işğal siyasəti ilə bataqlığa salmışdılar. İndi isə özlərini “xilaskar” kimi göstərməyə çalışırlar”.

Cəmiyyətin əksəriyyəti Paşinyanı dəstəkləməkdə davam edir.

Həmsöhbətimiz deyir ki, Paşinyanın bu qüvvələrlə mübarizəsi çətin olsa da, o, cəmiyyətin əksəriyyətindən dəstək almaqda davam edir:

“Çünki xalq çox yaxşı anlayır – revanşistlər qayıdarsa, Ermənistan yenidən fəlakətə sürüklənəcək. Kilsə daxilindəki həbslər isə dövlətin dini simvollar arxasında gizlənən siyasi təxribatlara qarşı cavab addımıdır. Bu, hüquqi yox, təhlükəsizlik məsələsidir. Revanşistlərin məqsədi daxildə xaos yaradıb Paşinyanın islahat xəttini pozmaqdır. Onlar hələ də 2020-ci ilin məğlubiyyətini qəbul etməyib. Amma indi nə Moskva, nə də Qərb bu cür radikal ritorikanı dəstəkləyir. Ermənistanın gələcəyi müharibə deyil, sabitlik və inteqrasiyadadır”.

Politoloq qeyd edir ki, Paşinyanın reytinqi müəyyən enmələrə baxmayaraq, yenə də 40 faiz civarındadır:

“Bu isə regiondakı gərgin mühitdə ciddi göstəricidir. O, hazırda həm siyasi, həm də ideoloji baxımdan revanşistlərə qarşı “dövlət” mövqeyini təmsil edir. Cəmiyyətin modern təbəqəsi və gənclik artıq dini populizmə inanmır.

Ermənistan indi seçim qarşısındadır: ya keçmişin revanşizmi, ya da gələcəyin rasional siyasəti. Paşinyan üçün bu mübarizə sadəcə seçki kampaniyası deyil, dövlətçiliyin qorunması savaşına çevrilib”.