"Azərbaycana münasibətdə mövcud olan etimad mühiti, əməkdaşlıq ruhu, Qəzza zolağında formalaşacağı gözlənilən sülhməramlı kontingentlərin tərkibində ölkəmizin də yer almasını tamamilə mümkün edir".

Bunu Qaynarinfo-ya açıqlamasında Milli Məclisin deputatı Hikmət Babaoğlu Qəzza zolağına göndərilməsi planlaşdırılan sülhməramlı missiyanın tərkibində Azərbaycan qüvvələrinin də olması məsələsini şərh edərkən deyib.

Deputat bildirib ki, Azərbaycan beynəlxalq münasibətlərdə, o cümlədən Yaxın Şərq ölkələri arasında xüsusi etimada malik bir ölkədir:

"Bu isə Yaxın Şərqdə baş tutması gözlənilən sülh prosesində Azərbaycanın iştirakçılığını mümkün edir. Eyni zamanda, Azərbaycan Yaxın Şərqdə sülhü inşa edən ölkələr tərəfindən də etibarlı tərəfdaş kimi qəbul edilir. ABŞ, münaqişədə tərəf olan İsrail başda olmaqla, digər qlobal aktorlarla da Azərbaycanın yaxşı münasibətləri var. Onu da nəzərə almaq lazımdır ki, Azərbaycan hərbçiləri müxtəlif vaxtlarda dünyanın müxtəlif bölgələrində sülhməramlı missiya yerinə yetirib".

Hikmət Babaoğlu qeyd edib ki, Azərbaycan əsgərlərinin belə bir sülhməramlı missiyada iştirak təcrübəsi var:

"Məsələn, Əfqanıstanda, Balkanlarda... Azərbaycana münasibətdə mövcud olan bu etimad mühiti, əməkdaşlıq ruhu ölkəmizin Qəzza zolağında da sülhməramlı kontingentlərin tərkibinə öz missiyasını göndərməsini tamamilə mümkün edir".

Qeyd edək ki, "Politico" nəşrinin məlumatına görə, İndoneziya, Azərbaycan və Pakistan Qəzza zolağında münaqişədən sonra yaradılması planlaşdırılan beynəlxalq sabitləşmə qüvvələri üçün qoşun tədarük etməyə əsas namizədlər hesab olunur. Nəşrin bildirdiyinə görə, qüvvələrin tərkibilə bağlı danışıqlar hazırda davam edir və hələlik heç bir ölkə nə yekun qərar verməyib, nə də rəsmi öhdəlik götürməyib. Bununla belə ABŞ-ın müdafiə rəsmisi bu 3 ölkənin prosesə ən çox maraq göstərən tərəflər olduğunu bildirib.

Yaxın Şərq kimi mürəkkəb bir problemin həllində Azərbaycanın iştirakının təklif olunması Bakıya olan etimad və güvənin gösrəricisi sayıla bilər. Xatırladaq ki, bu təşəbbüs ABŞ Prezidenti Donald Trampın Qəzzada sülhə dair 20 bəndlik planın tərkib hissəsidir.