“Konstitusiyaya dəyişikliklə bağlı mövqeyimizi bildirmişik və bu, dəyişməyib”. Bu barədə Ermənistan Baş naziri Nikol Paşinyan jurnalistlərlə söhbətində bildirib. Baş nazir Ermənistan Konstitusiyasına xarici yox, daxili gündəlik əsasında dəyişiklik edəcəyini deyib: "Heç bir xarici siyasət gündəmimizdə Konstitusiya mövzusu yoxdur. Konstitusiya ilə bağlı daxili gündəliyimiz var və bu, hakim “Vətəndaş Müqaviləsi” Partiyasının 7-ci qurultayı zamanı qəbul edilmiş bəyannamədə açıq və birmənalı şəkildə qeyd olunub". Ermənistanın hakim partiyasının həmin bəyannaməsində bildirilir:
"2026-cı ildə keçiriləcək növbəti parlament seçkilərində xalqın etimad səsini aldıqdan sonra hökumət referendum yolu ilə Ermənistan Respublikasının yeni Konstitusiyasının qəbulu prosesinə start verəcək". Xatırladaq ki, Ermənistan Konstitusiyasında müvafiq dəyişiklik sülh müqaviləsinin imzalanması üçün Azərbaycanın tələbidir. Söhbət Azərbaycana qarşı ərazi iddiasını ehtiva edən bəndin Ermənistanın əsas qanunundan çıxarılmasından gedir.
Millət vəkili Ceyhun Məmmədov Sherg.az-a deyib ki, Ermənistan tərəfi nəzərə almalıdır ki, əgər öz Konstitusiyasını dəyişdirməzsə, ərazi iddialarına dair müddəaları çıxarmazsa, yekun sülh müqaviləsi imzalanmayacaq. Deputat bildirib ki, Azərbaycanın prinsipial mövqeyi ondan ibarətdir ki, mütləq şəkildə Ermənistan Konstitusiyasında dəyişiklik edilməlidir:
"Bir ölkənin Konstitusiyasında həm bizə, həm Türkiyəyə qarşı ərazi iddiaları qalırsa, belə şəraitdə heç bir sülh sənədinin imzalanmasından söhbət gedə bilməz. Azərbaycan bunu dəfələrlə müxtəlif platformalarda Ermənistanın diqqətinə çatdırıb. Düşünürəm ki, A.Mirzoyanın bu fikirləri daha çox daxili auditoriyaya yönəlib. Çünki Ermənistan müxalifəti, revanşistlər, radikallar davamlı olaraq daxili auditoriyaya yönəlik açıqlamalar verir, ictimai rəyi çaşdırırlar. Revanşistlər davamlı olaraq Paşinyan komandasını satqınçılıqda, Azərbaycanın göstərişlərini yerinə yetirməkdə ittiham edirlər. Ona görə də İrəvan rəsmiləri bu tipli bəyanatlar səsləndirmək məcburiyyətində qalırlar".
Parlament üzvü vurğulayıb ki, Ermənistanda hazırda gərgin proseslər yaşanır: "Hökumət erməni ictimaiyyətini sakitləşdirməklə məşğuldur. Paşinyan hökuməti də fərqindədir ki, Konstitusiya dəyişikliyi Azərbaycan üçün prinsipial məsələdir. Artıq ölkədə bu istiqamətdə işlərə başlanılıb, sadəcə, seçkiöncəsi cəmiyyətə başqa informasiyalar ötürülür. Çox güman ki, Ermənistan hökuməti seçkilərdən sonra Konstitusiya dəyişikliyinə gedəcək".
