Ali Məhkəmədə dələduzluq, mənimsəmə, rüşvət almada və vəzifə saxtakarlığında təqsirləndirilən Zöhrab Sarıyevin barəsindəki qərardan dövlət ittihamçısı tərəfindən verilən kassasiya protesti üzrə məhkəmə iclası başa çatıb.

Pravda.az-ın əldə etdiyi məlumata görə, hakim İlqar Cəfərovun sədrliyi ilə keçirilən prosesdə qərar elan olunub.

Qərara əsasən, kassasiya protesti təmin edilib, ŞirvanApellyasiya Məhkəməsinin qərarı ləğv olunub, cinayət işi yeni apellyasiya baxışına təyin edilib.

İttihama görə, Zöhrab Sarıyev Saatlı Rayon İcra Hakimiyyəti başçısının əmri ilə 2020-ci ildə Orta Muğan kənd İnzibati Ərazi Dairəsi üzrə nümayəndə vəzifəsinə təyin edilib və 2025-ci ilədək həmin vəzifədə çalışıb.

O, vəzifəsi üzrə nümayəndəliyin fəaliyyətinin təşkili, sənədləşmə işlərinə nəzarət, işçilər arasında icra intizamının təmin edilməsi və digər təşkilati-sərəncamverici funksiyaları həyata keçirib.

İttihama əsasən, Zöhrab Sarıyev tutduğu vəzifədən istifadə edərək qanunsuz üstünlük əldə etmək məqsədilə vətəndaşdan rüşvət alıb.

Belə ki, 2023-cü ilin oktyabr ayında Saatlı rayonunun Orta Muğan kənd sakini S.S.-ni (adı, soyadı şərtidir) nümayəndəlikdə xadimə vəzifəsinə işə qəbul etmək müqabilində ondan 2 000 manat rüşvət istəyib. Razılaşmaya əsasən, həmin məbləğ iki dəfəyə – hər dəfə 1 000 manat olmaqla verilib. Bundan sonra Sarıyev 2024-cü ildə S.S.-i xadimə vəzifəsinə təyin edilməsi barədə əmr imzalayıb. Bundan sonra o, həmin şəxsin işə faktiki gəlməməsini tapşırıb. Buna baxmayaraq, qadının adına əməkhaqqı hesablanması və ödənilməsi üçün sənədlər rəsmiləşdirilib.

Araşdırma zamanı müəyyən edilib ki, 2024-cü ilin avqust, sentyabr, oktyabr və dekabr aylarında həmin şəxsə ümumilikdə 1 371,65 manat əməkhaqqı hesablanaraq bank kartına köçürülüb.

Zöhrab Sarıyev bu vəsaitin faktiki olaraq iş görülmədən ödənilməsini təmin etməklə ona etibar edilmiş dövlət pulunu qulluq mövqeyindən istifadə edərək israf etmə yolu ilə mənimsəyib.

İttihamda daha bir epizod üzrə Zöhrab Sarıyevin 2024-cü ilin oktyabrında başqa bir vətəndaşı da aldadaraq pul aldığı göstərilir.

Belə ki, o, həmin şəxsi Orta Muğan kənd icra nümayəndəliyində xadimə vəzifəsinə bərpa edəcəyinə inandıraraq ondan 800 manat alıb. Lakin sonradan həmin şəxsi işə qəbul etməyib.

Zöhrab Sarıyev bununla kifayətlənməyərək guya həmin şəxsin işə qəbul olunması görüntüsü yaratmaq məqsədilə rəsmi sənədlərə bilə-bilə yalan məlumatlar daxil edib. O, nümayəndəliyin 2024-cü il üzrə əmrlər kitabında zəruri qeydlər aparmadan həmin şəxsin xadimə vəzifəsinə qəbul edilməsi barədə saxta məlumatlar daxil etdiyi əmri öz imzası və nümayəndəliyin möhürü ilə təsdiqləyib.

Cinayət işinin daha bir epizodu isə iki vətəndaşın dövlət qurumunda işə düzəldilməsi vədi ilə bağlı olub. Zöhrab Sarıyev Sabirabad rayonunun Çöl Dəllək kənd sakinləri olan iki şəxsin Fövqəladə Hallar Nazirliyinin struktur bölmələrindən birində işləmək istədiklərini bilib. O, tutduğu vəzifədən istifadə edərək həmin şəxslərə pul müqabilində işə düzəlmək imkanı yaratacağını vəd edib.

Belə ki, zərərçəkmiş şəxslərdən birinin yanğınsöndürən, digərinin isə sürücü vəzifəsinə qəbul olunmasına köməklik göstərəcəyini bildirib. Hər iki şəxsdən 13 800 manat olmaqla ümumilikdə 27 600 manat pul tələb edilib. Həmin şəxslər 2024-cü ildə Orta Muğan kənd icra nümayəndəliyinin inzibati binasında Zöhrab Sarıyevlə görüşüblər. Onların birlikdə gətirdikləri qohumları vasitəsilə ümumilikdə 27 600 manat pul Zöhraba verilib. Lakin vəd edilən işə qəbul baş tutmayıb.

Beləliklə, ittihama görə, Zöhrab Sarıyev qulluq mövqeyindən istifadə etməklə təkrarən aldatma yolu ilə iki vətəndaşın ümumilikdə 27 600 manatını ələ keçirib.

Lənkəran Ağır Cinayətlər Məhkəməsinin hökmü ilə Zöhrab Sarıyev Cinayət Məcəlləsinin 178.2.3, 178.2.4, 179.2.3, 311.1 və 313-cü maddələri ilə təqsirli bilinib. O, 1 il 6 ay müddətinə dövlət və yerli özünüidarə orqanlarında rəhbər və maddi-məsul vəzifə tutmaq hüququndan məhrum edilməklə, 5 il müddətinə azadlıqdan məhrum edilib. Onun cəzasını ümumi rejimli cəzaçəkmə müəssisəsində çəkməsi müəyyən olunub.

Hökmdən dövlət ittihamçısı tərəfindən apellyasiya protesti verilib. Şirvan Apellyasiya Məhkəməsinin qərarı ilə dövlət ittihamçısının apellyasiya protesti təmin edilməyib və Lənkəran Ağır Cinayətlər Məhkəməsinin hökmü dəyişdirilmədən saxlanılıb. Bundan sonra dövlət ittihamçısı kassasiya protesti ilə Ali Məhkəməyə müraciət edib. Kassasiya protestində Şirvan Apellyasiya Məhkəməsinin qərarının ləğv edilməsi xahiş olunub.