Şirvan Apellyasiya Məhkəməsində xuliqanlıqda təqsirləndirilən Yasin Məmmədzadənin (adı, soyadı şərtidir) barəsindəki hökmdən verilən apellyasiya şikayəti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Yaşar Həşimovun sədrliyi ilə keçirilən prosesdə qərar elan olunub.
Qərara əsasən, apellyasiya şikayəti qismən təmin edilib, Kürdəmir Rayon Məhkəməsinin hökmü dəyişdirilib, ona 2 il 3 ay müddətinə azadlıqdan məhrumetmə cəzası təyin edilib.
İttihama görə, hadisə 2025-ci ildə saat 18 radələrində Kürdəmir şəhəri, Bakı prospektində baş verib.
Belə ki, Yasin Məmmədzadə öz təşəbbüsü ilə yaranmış mübahisə zamanı cəmiyyətə açıq hörmətsizlik nümayiş etdirərək ictimai qaydanı kobud şəkildə pozub.
İş materiallarında göstərilir ki, o, yerdən götürdüyü daşı silah qismində istifadə edərək S.Məmmədova məxsus avtomobilin yan şüşəsini qəsdən sındırıb. Nəticədə avtomobil sahibinə 70 manat məbləğində maddi ziyan dəyib.
Bununla kifayətlənməyən təqsirləndirilən şəxs təxminən bir saat sonra, saat 19 radələrində həmin prospektdə yerləşən və insanların intensiv hərəkət etdiyi ictimai ərazidə xuliqanlıq hərəkətlərini davam etdirib.
Yasin Məmmədzadə heç bir əsaslı səbəb olmadan Ağdam rayonunda qeydiyyatda olan zərərçəkmiş D.D. (adı, soyadı şərtidir) ilə münaqişə yaradıb. Daha sonra üzərində olan bıçaqdan silah qismində istifadə edərək zərərçəkmişə bir dəfə zərbə endirib.
Məhkəmə-tibbi ekspertizasının rəyinə görə, zərərçəkmişin sağ baldırının yuxarı üçdəbir hissəsində deşilmiş-kəsilmiş yara əmələ gəlib. Həmin xəsarət sağlamlığın qısa müddətə pozulmasına səbəb olan yüngül bədən xəsarəti kimi qiymətləndirilib.
Cinayət işi üzrə toplanmış sübutlar, şahid ifadələri, ekspertiza rəyləri və digər materiallar araşdırıldıqdan sonra məhkəmə təqsirləndirilən şəxsin əməlini Cinayət Məcəlləsinin 221.3-cü maddəsi (silah və ya silah qismində istifadə edilən əşyadan istifadə edilməklə törədilən xuliqanlıq) ilə tövsif edib.
Kürdəmir Rayon Məhkəməsinin hökmü ilə Yasin Məmmədzadə həmin maddə üzrə təqsirli bilinərək 3 il müddətinə azadlıqdan məhrumetmə cəzasına məhkum edilib. Məhkəmə onun cəzasını ciddi rejimli cəzaçəkmə müəssisəsində çəkməsini qərara alıb.
