Tbilisidə keçirilən "İpək Yolu Forumu" region ölkələri arasında dialoq üçün əsas platforma olaraq qalır və qalacaq.
Bunu Gürcüstan Baş naziri İrakli Kobaxidze forumun açılış mərasimində deyib.
O bildirib ki, 2015-ci ildə forumun əsası qoyularkən məqsəd dialoq üçün bir meydan yaratmaq olub:
"Bu gün forum artıq sadəcə görüş yeri deyil, ideyaların real layihələrə çevrildiyi məkandır. Ermənistan və Azərbaycanın tədbirdə iştirakı Cənubi Qafqaz ölkələrinin ortaq baxışını nümayiş etdirir. Bu, bir daha göstərir ki, region dövlətləri birgə səylərlə Cənubi Qafqazı sülh, sabitlik və iqtisadi imkanlar məkanına çevirmək niyyətindədirlər".
İrakli Kobaxidze əlavə edib ki, hazırda dünya ənənəvi ticarət yollarını və təchizat zəncirlərini yenidən nəzərdən keçirir:
"Yeni marşrutların formalaşdığı bir dövrdə əsas məqsədimiz sülhün qorunması və möhkəmləndirilməsidir. XXI əsrdə dayanıqlı inkişaf üçün qarşılıqlı əlaqələrin yeni istiqamətlərdə genişləndirilməsi vacibdir. Enerji dəhlizləri, rəqəmsal magistrallar və sərbəst kapital dövriyyəsi bu baxımdan böyük əhəmiyyət daşıyır".
"Borçalı" İctimai Birliyinin sabiq sədri, tanınmış ictimai-siyasi xadim Zəlimxan MəmmədliSherg.az-a bildirib ki, Azərbaycan siyasi sistemi, istər iqtidar, istərsə də müxalifət daxilində “Vahid Qafqaz evi” ideyasının tərəfdarıdır:
"Ölkəmiz hər zaman Qafqaz dövlətləri arasında, eləcə də xalqlar və mədəniyyətlər arasında dialoqun və birgəliyin möhkəmləndirilməsinin, vahid siyasi sistemin qurulmasının tərəfdarı kimi çıxış edib. İdarəetmədəki oxşarlıqlar və eyni idarəçilik modellərinin mövcudluğu isə bu üç dövlətin inteqrasiyasına müsbət təsir göstərə bilər. Hətta rəhbəri olduğum Böyük İdeallar Araşdırma Mərkəzi də bu mövzu üzərində müzakirələr apararaq eyni qənaətə gəlib. Mərkəzimizin fəaliyyət istiqamətləri arasında “Vahid Qafqaz evi” ideyasının həyata keçirilməsi və bu istiqamətdə zəruri addımların atılması da yer alır. Bu baxımdan, İpək Yolu Forumu Qafqazda strateji baxımdan əhəmiyyətli bir platforma rolunu oynaya bilər. Hər bir dövlətin özünəməxsus iqtisadi və siyasi problemləri olsa da, bu forum üç dövlətin - Azərbaycan, Gürcüstan və Ermənistanın yaxınlaşması üçün ortaq zəmin yaradır. Əgər proses ardıcıl və intensiv şəkildə davam edərsə, Ermənistan və Azərbaycan arasında yeni kommunikasiya imkanları yaranar, sülh istiqamətində addımlar atılar və faktiki olaraq region ölkələrini bir-birindən ayıran baryerlər aradan qalxar".
Müsahib əlavə edib ki, üçüncü qüvvələrin regiona müdaxiləsinin qarşısını almağın ən səmərəli yolu da məhz bu üç dövlətin eyni platformada birləşməsidir:
"Bu mənada, İpək Yolu Forumu bəlkə də son və qəti həll mərhələsi olmasa da, ideyanın inkişafı üçün mühüm stimul rolunu oynayır. Gələcəkdə forumun formatı və hədəfləri dəyişə və ya daha da dəqiqləşdirilə bilər. Bütün hallarda, biz bəzi məsələlərdə fikir ayrılıqları yaşasaq da, Qafqazda separatizmin kökünün kəsilməsi, xalqların və mədəniyyətlərin ortaq harmoniyasının tapılması baxımından bu cür dialoqların, görüşlərin və platformaların yaranması son dərəcə əhəmiyyətlidir və davam etdirilməlidir".
