Erməni Apostol Kilsəsinin (EAK) rəhbəri katolikos II Qareginin qardaşı oğlu ən azı iki ay həbsdə yatacaq. Ölkə hakimiyyəti onu seçki prosesinə müdaxilə etməkdə və tabeliyində olanları müxalifətin mitinqlərində iştiraka məcbur etməkdə ittiham edir. Dünyəvi hakimiyyətin ruhani hakimiyyətə hücumu bütün yeparxiyanı iflic vəziyyətinə salıb.

Reyting.azxəbər verir ki, bu barədə “Nezavisimaya qazeta” yazıb.

Rusiya nəşrinin təhlilində qeyd olunur:

İrəvan Şəhər Birinci İnstansiya Cinayət Məhkəməsi Erməni Apostol Kilsəsinin Araqatsotn yeparxiyasının rəhbəri yepiskop Mkrtıç Proşyan barəsində iki aylıq həbs qətimkan tədbiri seçib. Hüquq-mühafizə orqanları onu seçki hüquqlarının həyata keçirilməsinə və seçki komissiyalarının işinə mane olmaqda (6 ilədək həbs), habelə insanları mitinqlərdə iştiraka məcbur etməkdə (5 ilədək həbs) ittiham edir.

Cinayət işi Hovhannavank kilsəsinin rektoru keşiş Aram Asatryanın İctimai Televiziyada verdiyi açıqlama ilə bağlı “Məlumatlı Vətəndaşlar İttifaqı” ictimai təşkilatının hesabatı əsasında açılıb. Din xadimi 2021-ci ildə müxalifətin mitinqlərinə öz istəyi ilə deyil, yuxarılarının göstərişi ilə qatıldığını bildirib.

"Arxiyepiskop Mkrtıçın işi o qədər "dövlət əhəmiyyətlidir" ki, onun üçün yaradılmış istintaq qrupu 54 müstəntiqdən ibarətdir. 54 müstəntiq Erməni Apostol Kilsəsi ilə bağlı məsələlər üzərində işləyir və heç nəyi şansa buraxmır",- yepiskopun vəkili Yerem Sarkisyan bildirib.

Onun sözlərinə görə, bu, Ermənistan üçün görünməmiş haldır.

Bununla belə, Proşyan adi yepiskop deyil, katolikosun qardaşı oğludur.

Xatırladaq ki, Ermənistanın baş naziri Nikol Paşinyan son bir neçə aydır ki, II Qaregini korrupsiyada və subaylıq andını pozmaqda ittiham edərək, dövlət çevrilişi cəhdində iştirakına eyham vuraraq istefaya məcbur etməyə çalışır.

Proşyan oktyabrın 15-də səhər tezdən saxlanılıb. Ondan başqa, 12 din xadimi, bir mühasib, bir xəzinədar və Araqatsotn yeparxiyasının məmuru da tutulub. Muqnidəki Müqəddəs Gevork kilsəsinin rektoru, Araqatsotn yeparxiyasının rəhbəri, keşiş Qaregin Arsenyan bir ay müddətinə həbs edilib.

Təhlükəsizlik rəsmiləri hesab edir ki, o, cinayətlərin törədilməsində Proşyana kömək edib. Qalan məhbuslara şahid statusu verilib.

"Araqotn yeparxiyası rəhbərinin, kahinlərin və yeparxiya əməkdaşlarının qanunsuz cinayət təqibi hakimiyyətin başlatdığı mütəşəkkil antikilsə kampaniyasının növbəti təzahürüdür. Bu cür qınaq obyekti açıq-aşkar bədxassəli məqsəd güdür: kilsənin normal fəaliyyətini iflic etmək, nüfuzunu sarsıtmaq”, - Erməni Apostol Kilsəsinin katolikosu II Qareginin mətbuat xidməti bildirib.

Bundan başqa, Erməni Apostol Kilsəsi hesab edir ki, Ermənistan hakimiyyəti bu cür repressiv tədbirlərdən istifadə etməklə din azadlığı hüququnu kobud şəkildə pozur, dindarların dini hisslərini təhqir edir, nifrət toxumu səpir, düşmənçilik salır və sosial parçalanmanı dərinləşdirir. Buna baxmayaraq, kilsə öz xadimlərini təxribatlara boyun əyməməyə və keşişləri qorumağa çağırır.

Öz növbəsində səlahiyyətlilər Proşyanın evində aparılan axtarışın nəticələri barədə məlumat veriblər. Təhlükəsizlik qüvvələri avro, dollar, rubl və dram bağlamaları aşkar ediblər.

Baş nazirin aparat rəhbəri Arayik Arutyunyan təhlükəsizlik fotolarından birində mövhumata görə, uğurlar gətirəcəyi güman edilən iki dollarlıq əsginasa diqqət çəkdirib. "Bu insanlar Allaha inanmaq əvəzinə boş şeylərə inandıqları halda necə dəli olmayasan! Onlar İsa Məsihin davamçıları deyil, onlar Ceffersonun (iki dollarlıq əskinasda təsvir olunan üçüncü ABŞ prezidenti – red.) davamçılarıdır", - Arutyunyan bildirib.

Politoloq Tiqran Koçaryan hesab edir ki, hakimiyyət katolikosun ətrafını həbs etməklə kifayətlənəcək, lakin onu rahat buraxacaq. "Erməni ənənələrinə görə II Qareginə birbaşa hücum etmək çətindir. Bunun əvəzinə Paşinyan, məsələn, "Ermənistanın Apostol Kilsəsi" adlanacaq alternativ kilsə yaratmağa cəhd edə bilər. Üstəlik, bu təşkilatın rəhbəri baş nazirlə razılaşdırılacaqdı, biz artıq Konstantinopol Erməni Patriarxlığının fəaliyyət göstərdiyi Türkiyədə də buna bənzər bir şey görürük”, - deyə Koçaryan NG-yə bildirib.

Hər halda, üç EAK yeparxiyasının rəhbəri hazırda dəmir barmaqlıqlar arxasındadır: Araqatsotnlu Proşyan, Şiraklı Mikael Ajapaxyan və Tavuşlu Baqrat Qalstanyan. Ajapaxyan artıq dövlət çevrilişinə çağırışa görə 2 il, Qalstanyan isə üsyan hazırlamağa görə 15 ilə qədər həbs cəzası alıb.

Oliqarx Samvel Karapetyan kilsənin müdafiəsi üçün ilk çıxış edənlərdən olub. Konkret olaraq o, bəyan edib ki, parlament müxalifəti Paşinyanı sakitləşdirə bilməsə, başqa üsullara əl atacaq.

Buna cavab olaraq Ermənistan hakimiyyəti Karapetyanı dövlət çevrilişinə çağırışda ittiham edib və həbs edib. Onu 5 ilə qədər həbs gözləyir. O, artıq 110 gündən çox dəmir barmaqlıqlar arxasında yatıb və oktyabrın 15-də onun həbs müddəti daha bir ay uzadılıb. Karapetyan həbsdə olduğu müddətdə Paşinyan ona məxsus olan Ermənistanın Elektrik Şəbəkələrinin milliləşdirilməsi prosesinə başlayıb.