Ermənistanın ABŞ-dəki səfiri Narek Mkrtçyan ABŞ Prezidentinin xüsusi nümayəndəsi Stiven Uitkoff ilə görüşüb.
Bu barədə Ermənistan səfirliyi məlumat yayıb.
Həmsöhbətlər avqustun 8-də Azərbaycan, Ermənistan və ABŞ arasında əldə olunan razılaşmaların gedişi və regional proseslərə toxunublar.
Stiven Uitkoff ABŞ-nin sülh gündəminə ardıcıl dəstəyini bir daha təsdiqləyib.
Mkrtçyan regionda sülh və sabitliyin bərqərar olunmasında göstərdiyi səylərə görə Stiven Uittkofa minnətdarlığını bildirib.
Politoloq Elçin Xalidbəyli Sherg.az-a bildirib ki, ABŞ-nin Cənubi Qafqazda sülh prosesinə dəstək verməsi artıq açıq-aşkardır:
"Bayden administrasiyasından fərqli olaraq Tramp administrasiyasının hakimiyyətə gəlməsindən sonra ABŞ-nin Cənubi Qafqaz siyasəti ciddi şəkildə dəyişib və pozitiv istiqamət alıb. İndi Vaşinqton bölgədə sülhün əsas təminatçılarından biri kimi çıxış edir. Bu, regional sabitlik üçün olduqca mühüm faktordur. Son vaxtlar ABŞ Cənubi Qafqaz istiqamətində əsasən Böyük Britaniya ilə paralel hərəkət edir. Bir müddət öncə Böyük Britaniya Azərbaycana və Ermənistana silah ixracına qoyulmuş embarqonu ləğv edib. Yəni ABŞ və Böyük Britaniya Cənubi Qafqazı Rusiyanın təsir dairəsindən uzaq, daha möhkəm dövlətlərin yerləşdiyi zona kimi görmək istəyirlər. Beləliklə, bölgəni Rusiyadan uzaqlaşdırmaq məqsədilə əhəmiyyətli və pozitiv istiqamətli prosesə start verilib. Bu baxımdan hesab etmək olar ki, hazırda Cənubi Qafqazın gələcək taleyi baxımından ABŞ və Böyük Britaniyanın sülh və sabitliyi dəstəkləməsi vacib və təsiredicidir. Əgər bu proses davam edərsə, regionun Qərbin təhlükəsizlik arxitekturasında yeri olmasının ehtimalı kifayət qədər yüksəkdir.
Böyük ehtimalla, proseslər indiki kimi davam edərsə, Azərbaycan və Ermənistan arasında yekun sülh müqaviləsi Avropa ölkələrindən birində, hətta ABŞ-də imzalanacaq. Lakin bunun qarşısında hələ bir əngəl durur. Ermənistan Konstitusiyasındakı, Azərbaycana qarşı ərazi iddialarını əks etdirən müddəaların ləğvi məsələsi hələ tam həll olunmayıb".
Analitik əlavə edib ki, hazırkı proseslərə əsasən demək olar ki, yekun sülh müqaviləsi Rusiyada imzalanmayacaq:
"Görünən odur ki, Moskva bu prosesdən kənarda qalır və müqavilənin imzalanmasına bir ildən də az vaxt qalıb. Ermənistanda keçiriləcək parlament seçkiləri bir çox məqamı aydınlaşdıracaq. Əgər Paşinyan hakimiyyəti mövqeyini qoruyub qalib gələrsə, sülh müqaviləsi qısa müddətdə imzalanacaq və Paşinyan tərəfdarları referendum keçirərək müqaviləni təsdiq edə bilərlər. Əks halda, Paşinyan məğlub olsa, həm Ermənistanda, həm də Cənubi Qafqazda sülh prosesi daha mürəkkəb xarakter daşıya bilər".
