Gözdən əlil Qulu Abbasov onun haqqında çıxarılan 15 il azadlıqdan məhrumetmə hökmündən apellyasiya şikayəti verib.

Bizimyol.info xəbər verir ki, iyulun 21-də Bakı Apellyasiya Məhkəməsində hakim İbrahim İbrahimlinin sədrliyilə onun işi üzrə ilkin baxış iclası keçirilib. İclasda təqsirləndirilən şəxsin anket məlumatları dəqiqləşdirilib, hüquq və vəzifələri izah edilib.

Apellyasiya şikayətində Qulu Abbasovun hər iki gözünün görmə məhdudiyyətli olması və bununla əlaqədar əlilliyinin nəzərə alınaraq, onun cəzasının yüngülləşdirilməsi xahiş olunub.

Qulu Abbasov qəsdən adam öldürmə ittihamı ilə həbs edilib. O, Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsi ilə 15 il azadlıqdan məhrum edilib. Onun haqqında hökm Bakı Ağır Cinayətlər Məhkəməsində hakim Vüqar Seyidovun sədrliyilə çıxarılıb.

43 yaşlı Qulu Abbasov mübahisə zəminində 41 yaşlı qonşusu Xanlar Əmirovu bıçaqla qətlə yetirməkdə ittiham olunur. Hadisə Qaradağ rayonu Lökbatan qəsəbəsində baş verib. O, ifadəsində bildirib ki, mərhum Xanlar Əmirov gözünün görməməyindən sui-istifadə edərək, ailəsinin qadın üzvlərindən birinə qarşı nalayiq hərəkətlər edirdi. Bu səbəbdən aralarında bir neçə dəfə insident baş vermişdi. Hətta yaxın adamların müdaxiləsi əvvəllər bu səbəbdən baş vermiş davaların qarşısını almağa yaramışdı.

Qulu Abbasovun vəkilil bildirib ki, hüquqlarını müdafiə etdiyi şəxsə qarşı irəli sürülmüş ittiham çox ağırdır. Onun əməlində xüsusi amansızlıq yoxdur. Bu səbəbdən də vəkil hesab edir ki, onun əməli Cinayət Məcəlləsinin 120.1 (qəsdən adam öldürmə) maddəsinə tövsif olunmalıdır. Vəkil müvəkkilinə bu maddənin sanksiyasının aşağı həddində də cəza verilməsini xahiş edib.

Qeyd edək ki, Cinayət Məcəlləsinin 120.1 maddəsində 9 ildən 14 ilə qədər azadlıqdan məhrumetmə var. Ağırlaşdırıcı hallarda – Cinayət Məcəlləsinin 120-ci maddəsinin digər bəndlərində isə 14 ildən 20 ilə qədər və ya ömürlük azadlıqdan məhrumetmə cəzası nəzərdə tutulub.

Apellyasiya məhkəməsində Qulu Abbasovun şikayəti üzrə ilkin iclasdan sonra məhkəmə baxışı avqustun 4-nə təyin olunub.