MALİYYƏ NAZİRLİYİNİN GÖRMƏZDƏN GƏLDİYİ FAKTLAR
DİA.AZ: - Azərbaycan Respublikasi Səhiyyə Nazirliyi Bakı Baş Səhiyyə İdarəsinin Xətai rayonundakı 14 saylı Şəhər Poliklinikasının baş həkimi Mahmudov Əlisahib Balaş oğlunun qanunazidd əməlləri barədə mətbuatda dəfələrlə yazılar dərc olunub. İndi isə adıçəkilən poliklinikanın sabiq həkim-cərrahı, hazırda isə Xəzər rayonundakı 14 saylı Birləşmiş Şəhər Xəstənxanasının həkim-cərrahı, Qarabağ Muharibəsi iştirakçısı Əliyev Ələsgər İbrahim oğlu tərəfindən redaksiyamıza yeni məktub daxil olub.
Həm dövlət orqanları, həm də ictimaiyyət qarşısında dəfələrlə bu məsələni qaldırdığını bildirən Ə.Əliyev aidiyyəti orqanların 14 saylı şəhər Poliknikasının baş həkimi Mahmudov Əlisahib Balaş oğlunun qanunazidd əməllərinə hüquqi qiymət vermədiyini, əksinə Əlisahib Mahmudov korrupsioner əməllərini daha geniş formada davam etdidiyini yazır: "05 aprel 2011-ci il tarixdə Maliyyə Nazirliyinin Dövlət Maliyyə Nəzarəti Xidmətinin rəisi vəzifəsini icra edən Cavanşir Yusifov tərəfindən mənə göndərilən məktubda bildirilir: "Maliyyə Nazirliyinin Dövlət Maliyyə Nəzarəti Xidməti tərəfindən Xətai rayonu 14 saylı Şəhər Poliklinikasında aparılmış yoxlama zamanı aşkar olunan nöqsanların ciddiliyi nəzərə alınaraq, yoxlama materialları hüquqi qiymət verilməsi üçün Maliyyə Nazirliyinin 01 aprel 2011-ci il tarixli DX-03\04-03-258-1890 nömrəli məktubu ilə Azərbaycan Respublikasının Baş Prokurorluğuna göndərilmişdir". Əlbəttə, uzun sürən süründürməçilikdən sonra Maliyyə Nazirliyinin mənim yuxarıda göstərdiyim faktları ciddi qəbul etməsi təqdirəlayiq sayıla bilər. Amma nazirlik 3 il öncə yəni, 20 iyun 2008-ci il tarixində Baş Prokurorluğa anoloji məktub göndərmişdi. Yoxlamanı apartdıran Baş prokurorun köməkçisi Azər Əsgərovun 04 iyul 2008-ci il tarixli cavab məktubunda isə yazılır: "01\165ç saylı material öyrənilərkən cinayət işinin başlanması üçün əsaslar müəyyən edilməmişdir". Halbuki, Azərbaycan Respublikasının CPM-nin 207.1 maddəsinə görə ya cinayət işinin başlanması, ya da rədd edilməsi haqda qərar şikayətçiyə verilməli idi. Maliyyə Nazirliyi yoxlama aktını verməli olduğu halda bunu prokurorluğun üzərinə atdı, prokurorluq isə maaş cədvəllərinə atılan imzaların saxta olub-olmadığını xətt ekspertizasından keçirmədən və dövət büdcəsindən mənisənilən pulların cavabdeh olmalı şəxslərdən alınıb büdcəyə qaytarılmasını təmin etmədən başdansovdu bir cavab hazırlamışdı. Çox güman ki, indi də eyni üsuldan istifadə edərək, hər iki qurum bir-birinə "pas" atmaqla baş vermiş korrupsiyanı bu dəfə də gizlədəcək. Bu dəfə də xırda bir poliklinikadakı böyük korrupsiya əməli qanun çərçivəsində öz hüquqi qiymətini almamış olacaq.
Halbuki, baş həkim və ətrafının müxtəlif maliyyə maxinasiyalarından qazandıqları göz önündədir. Baş həkim Əlisahib Mahmudovun AZ 10 UE 353 dövlət nömrə nişanlı qara rəngli cip Leksus GX-4ç0 markalı avtomobil, poliklinikanın hazırki təsərrüfat müdüri, əvvəllər isə xəzinədar vəzifəsini icra etmiş Kamil Manafovun AZ 90 HE 896 dövlət nömrə nişanlı göy rəngli cip Toyoto Land-Grauzer markalı avtomobilə sahib olması onların bir poliklinikadan nə qədər qazandıqlarını tam şəkildə ortaya qoyur. Çünki rəsmi əməkhaqları 100-150 manat olan bu şəxslərdən birincinin 75 min, ikincinin isə 25 min manat dəyərində avtomobilə sahib olması poliklinika daxilindəki yüksək rəqəmlərlə ölçülən yeyintilərdən xəbər verir.
Ən maraqlısı isə budur ki, 01 aprel 2011-ci il tarixdə ölkə rəhbəri Xətai rayonunun Əhmədli kəndində olarkən adıçəkilən poliklinikanın sökülərək yerində yenisinin inşa edilməsinə göstəriş verib və bu işin icrası üçün büdcədən 1,5 milyon manat vəsait ayırıb. Poliklinikada baş verən qanunsuzluqlarla bağlı aiddiyyatı dövlət orqanlarına çoxsaylı müraciətlər edildikdən sonra bu haqda müvafiq tədbir görülməsi əvəzinə belə bir sərəncamın verilməsi təəccüb doğurur. Yeni bir səhiyyə müəsisəsinin tikilməsi təqdirəlayiq hal sayıla bilər. Amma səhiyyə müəssisəsinin Əlisahib Mahmudovdan, onunla əlbir olan korrupsionerlərdən və bu korrupsiya əməllərinə göz yumanlardan təmizlənib savadlı və təmiz kadrlarla dəyişdirtdirilməsi, vətəndaşlara normal tibbi xidmət göstərilməsi üçün daha vacib idi. Lakin bu hələ də baş verməyib. Mən bu günə qədər poliklinika rəhbərliyinin, onunla əlbir olan və ona havadarlıq edənlərin qanun çərçivəsində cəzalanması üçün mübarizə aparmaq məcburiyyətindəyəm.
Maliyyə Nazirliyinin ikinci yoxlaması zamanı USM kabinetinin işləmədiyi halda baş həkim Əlisahib Mahmudovun oraya işçi qəbul etdiyi və onların adına 4460 manat əməkhaqqı yazaraq büdcə vəsaitinin mənimsənilməsinə şərait yaratması aşkarlanıb. Maliyyə Nazirliyi bu faktdan başqa digər faktları ört-bastır edib ki, baş həkim cinayət məsuliyyətindən kənarda qalsın. Poliklinkanın təsərrüfat müdiri Kamil Manafov isə 2011-ci il mart ayının əvvəlində Prezident Administrasiyasına Maliyyə Nazirliyinin sektor müdiri Namaz Ağamirzəyevdən şikayət xarakterli teleqramlar vuraraq guya onun poliklinikanın işinə müdaxilə etdiyini, oradakı təftişçilərə təzyiq etdiyini bildirib. Əslində baş həkim və Kamil Manafov törətdikləri cinayət xarakterli əməldən yaxa qurtarmağa, ən pis halda isə yalnız Kamil Manafovu qurban verməyə çalışırlar.
Qeyd edim ki, Azərbaycan Respublikasının Maliyyə Nazirliyi 14 saylı şəhər Poliklinikasında 09 fevral 2011-ci il tarixdən 17 mart 2011-ci il tarixədək apardığı yoxlamanın nəticələri barədə tərtib olunmuş yoxlama aktını və digər yoxlama materiallarını özünün 01 aprel 2011-ci il tarixli, DX-03/04-03-258-1890 nömrəli məktubu ilə Azərbaycan respublikasının Baş Prokurorluğuna göndərib. Azərbaycan respublikasının Baş Prokurorluğu isə yoxlama materiallarında korrupsiya elementlərinin olduğunu nəzərə alaraq onu Baş Prokuror yanında Korrupsiyaya qarşı Mübarizə İdarəsinə göndərib. Hazırda Baş Prokuror yanında Korrupsiyaya qarşı Mübarizə İdarəsində araşdırma aparılır."
23 aprel 2011-ci il tarixdə Baş Prokuror yanında Korrupsiyaya qarşı Mübarizə İdarəsinin müstəntiqi Hüseynov Ramin Rafiq oğluna 19 səhifəlik izahat yazan həkim heç olmazsa bu dəfə məsələyə hüquqi qiymət veriləcəyinə ümüd edir.
