"Mən, "Azneft" İstehsalat Birliyinin tabeliyində olan NQÇİ-lərdən birinin dəniz obyektlərində növbəli (vaxta) iş rejimində fəaliyyət göstərən əməkdaşı olaraq, hazırda minlərlə neftçinin üzləşdiyi ciddi bir hüquqi və maddi problemi diqqətinizə çatdırmaq üçün Sizə müraciət edirəm..." "DİA-AZ" xəbər verir ki, bunu özünün SOCAR İnsan Resursları Departamenti və Hüquq İdarəsinə ünvanlanmış müraciətində sözügedən qurumun işçisi Rac Kərimov qeyd edib.
O daha sonra bildirir: "Məsələnin mahiyyəti:
Biz, dəniz şəraitində çalışan işçilər, Bakı şəhərində yerləşən Təlim-Tədris Mərkəzlərində (TTM) keçirilən icbari təlimlərə cəlb olunuruq. Bu təlimlər sertifikatlarımızın yenilənməsi və fəaliyyətimizin davamlılığı üçün mütləqdir. Lakin bu prosesdə aşağıdakı qanunsuzluqlar baş verir:
Maddi itki və Ezamiyyə xərcləri: AR Əmək Məcəlləsinin 179.1-ci maddəsinə əsasən, işçi ixtisasını artırmaq üçün təlimə göndərildikdə onun orta əmək haqqı saxlanılmalı və qanunla müəyyən edilmiş ezamiyyə xərcləri (gündəlik və otel xərci) ödənilməlidir. Lakin bu ödənişlər bizə ödənilmir.
Yaşayış yeri problemi:
Rayonlardan və dəniz növbəsindən gələn işçilər təlim müddətində yataqxana ilə təmin olunmur, nəticədə öz maaşları hesabına otel və ya kirayə xərcləri çəkməyə məcbur qalırlar.
Məntiqi ziddiyyət:
SOCAR-ın Baş Ofis və Azneft İB-nin əməkdaşları dəniz obyektlərinə gəldikdə onlara həm ezamiyyə xərci, həm də dəniz əmsalı ödənildiyi halda, işçilərin dənizdən TTM-nə göndərilməsi niyə ezamiyyə sayılmır? Bu, açıq-aşkar ikili standartdır.
Bir neftçi kimi sadə bir sual verirəm: İdarənin məni məcburi göndərdiyi kursda mən niyə öz maaşımdan hoteldə gecələmək üçün xərc çəkməliyəm? "Azneft" İB-nin bu yanaşması minlərlə işçinin hüququnun pozulması deməkdir.
Sizdən bu sistematik qanun pozuntusuna son qoyulmasını, ezamiyyə xərclərimizin ödənilməsini və ya işçilərin təlim müddəti ərzində yaşayış yeri ilə təmin olunması məsələsinin dərhal həllini xahiş edirəm..."
