Vətəndaş Əliyev Bəhruz Şahmurad oğlunun “BTB LEASING” ASC-nin vəzifəli şəxsi tərəfindən aldadılaraq xeyli miqdarda pulunun ələ keçirilməsi haqda məlumat vermişdik.
Teleqraf xəbər verir ki, vətəndaş aldadılması ilə bağlı prokurorluğa da müraciət edib.
Bəhruz Əliyev müraciətində bildirirdi ki, xeyli miqdarda vəsaiti şirkət tərəfindən heç bir rəsmi sənəd təqdim edilmədən ələ keçirilib. Bəhruz Əliyev 2025-ci ilin yanvar ayında kredit götürmək üçün “BTB LEASING” ASC-yə müraciət edib. Mənzili girov qoyaraq kredit götürüb.
Girov qoyulan mənzil qardaşına məxsus olub. Kredit isə onun qaynının adına rəsmiləşdirilib. Rəsmi sənədlərdə 151.800 manat pul vəsaitinin lizinq alana verildiyi göstərilib. Lakin lizinq şirkətindən vətəndaşa ümumilikdə 120 min manat pul verilib.
Vətəndaş ASC-yə müraciət etdikdə vəzifəli şəxslər qalan 31.800 manatın sənədləşmə üçün xərclərə sərf olunduğunu bildiriblər.
Bəhruz Əliyevin sözlərinə görə, həmin xərclərlə bağlı onlara hər hansı sənəd təqdim olunmayıb: “İddia edilən xərclərlə bağlı bizə sadəcə şirkətin müdir müavini vəzifəsində işləyən Vüsal Nəsibovun əl ilə yazılmış qeyd vərəqəsi təqdim olunub.
Həmin qeyd vərəqəsindəki xərclərin ümumi cəmi belə 31.800 manat etmir. Etsə belə, orada qeyd olunan "Kasko gözləyən 3%" qeydinə görə tutulan 8.050 manat pul vəsaiti tamamilə bizim iradəmizdən kənar olub və bu barədə məlumatlandırılmamışıq. Məsələ ilə bağlı Vüsal Nəsibova dəfələrlə müraciət etmişik. Kobud rəftarla üzləşmişik. Dəfələrlə müraciət olunduqdan sonra bizə cəmi 6 min manat pul qaytarılıb. Qalan məbləği qaytarmaqdan imtina edirlər. Haqlı idilərsə, 6 min manatı geri niyə qaytarırdılar? Deməli, bu məbləğ qanunsuz olaraq tutulub. Vüsal Nəsibov "bizdə sistem belə işləyir, sizə əlavə pul verilməyəcək" deyir. Vüsal Nəsibov deyir ki, bu şirkətin sahibinə görə onlara heç kim müdaxilə edə bilmir”.
Bəhruz Əliyevə xərclərlə bağlı Vüsal Nəsibov tərəfindən verilən qeyd kağızını təqdim edirik.
Həmçinin məlum olub ki, kasko sığorta üçün min ödəniş alınsa da bununla da bağlı heç bir rəsmi sənəd mövcud deyil.
Xatırladaq ki, adı çəkilən lizinq şirkəti ilə bağlı bu, ilk problemli məsələ deyil. Daha əvvəl şirkətin Hüquq Departamentinin müdiri Ceyhun Əli-Zadə vətəndaşların külli miqdarda pulunu ələ keçirməkdə ittiham edilərək cinayət məsuliyyətinə cəlb edilib.
Bildirək ki, adı çəkilən lizinq şirkəti 2017-ci ildə səhmlərinin 74,98%-i Ramiz Mehdiyevin gəlini Mehdiyeva Nigar İsmayıl qızına məxsus “Bank BTB” ASC tərəfindən yaradılıb.
Fotoda Vüsal Nəsibov
