Bakı şəhəri, Nəsimi rayonu, İmran Qasımov küçəsində qanunsuz tikili sakinlərin narazılığına səbəb olub.

Tribuna.az-a bu barədə məlumat verən sakinlər bildirib ki, yol kənarındakı böyük yaşıllıq ərazi obyekt tikintisinə qurban gedir. Verilən məlumata görə, ərazi artıq hasarlanıb və tikinti işlərinə də 1 aya yaxındır ki, başlanılıb:

“Nəsimi rayonunda artıq satılmayan yer qalmayıb. İndi də keçiblər İmran Qasımov küçəsinə. Adı çəkilən küçədə boş yer yoxdur artıq. Bir boş yer var idi, onu da zəbt edib tikinti aparırlar. Ağacların arasında obyekt tikirlər. Deyirlər restoran olacaq. Yəqin tikinti bitəndən sonra ətrafdakı ağacları da məhv edəcəklər. Bu obyekt də, ağacların taleyi də bizi narahat edir. Ancaq Nəsimi rayonu İcra Hakimiyyətinin bundan xəbəri yoxdu. Ya da var, sadəcə görməzdən gəlir”.

Sakinlər bildirib ki, onları narahat edən bu tikili ilə bağlı aidiyyəti qurumlara müraciətlər ediblər. Lakin heç bir tədbir görülməyib. Nəsimi rayon İcra Hakimiyyətinə də dəfələrlə qanunsuz tikinti ilə bağlı məlumat verilib. Lakin sakinlərin müraciətinə bir dəfə də baxılmayıb.

Məsələ ilə bağlı Nəsimi rayon İcra Hakimiyyətinin mövqeyini öyrənmək üçün dəfələrlə zəng etdik. Lakin İH-dən zənglərimizə cavab verən və suallarımızı cavablandıracaq bir adam da olmadı.

Qeyd edək ki, Nəsimi rayonu İcra Hakimiyyətinin başçısı Tahir Budaqovdur. O, bu vəzifəyə 2026-cı ilin 9 fevral tarixində təyin edilib.