Kamilo Duranın tez bir zamanda “Seltik”də parlamasının, qollarını sıralamasının ancaq özünə, bir də gələcəkdə Kolumbiya millisinə faydası var. Hazırda 24 yaşı olduğunu nəzərə alaraq, bu uğurlu seriyanı davam etdirəcəyi təqdirdə “Böyük beşlik” liqalarından birinə gedəcəyini ehtimal etmək elə də çətin deyil.

Futbolçunun təklif gəldiyi anda qərar verməsi, “Seltik”ə dərhal “hə” deməsi başadüşüləndir. Məsələn, mən də futbolçu olsam, stadionu olmayan, didərgin düşən “Araz Naxçıvan”, “İmişli” kimi klublarla boz tribunalar önündə, meydan qapıları standardan 11 sm hündür olan arenada oynamaqdansa, daha yaxşı şəraiti olan çempionata üz tutaram.

Təbii ki, Kamilo Duranın uğurlu çıxışı “Qarabağ”ın da reklamıdır. Amma bu da müvəqqəti, keçicidir. Əksəriyyət reklama baxmır, onun zaman itkisi kimi qiymətləndirərək ötürür. Biz o zaman sevinəcəyik ki, “Seltik” kimi klublarda çıxış edən futbolçular azərbaycanlılar olsun.

Hazırkı durumda isə azərbaycanlı futbolçuya ciddi maraq yoxdur. Məsələn, millinin üzvü, “Qarabağ”ın aparıcı futbolçusu Elvin Cəfərquliyev transferə çıxarıldı, ciddi təkliflə irəli duran olmadı. Sonda etdiyi intizamsızlığa baxmayaraq, azərbaycanlı futbolçunu itirməmək baxımından bağışlanıldı, yenidən əsas heyət üzvünə çevrildi.

Bundan sonrakı illərdə də açığı, Elvinə xaricdən ciddi təkliflər gələcəyini də düşünmürəm. Onunla aşağı-yuxarı eyni səviyyədə olan, intizam baxımından fərqlənən Toral Bayramov isə Türkiyənin ikinci liqasına üz tutursa, məncə, artıq qaranlıq nəsə qalmır.

“Reklamlar bitdi, seyrə davam” dedikdən sonra, Kamilo Duranın transferindən “Qarabağ”ın qazandığı sadəcə, bir neçə milyondur. Görünən odur ki, Ağdam klubu transfer siyasətini bu yöndə yürütməyi özünə hədəf götürüb – Portuqaliya və digər ölkələrin ikinci liqalarında çıxış edən, perspektivi olan 200-250 min avroluq futbolçuları aşkarlamaq və gələcəkdə daha baha qiymətə başqa kluba satmaq.

Bunun hər dəfə alınıb-alınmayacağını zaman göstərəcək. Məsələn, bu mövsüm transfer edilən 7 futbolçuda ilk baxışdan həmin perspektiv görünmür.

Yürüdülən siyasətin sponsor yükünün azaldılmasına yönəlmiş addım hesab etmək olmar. İlk baxışdan bu, yaxşıdır, amma əldə edilən gəlirlərdən yeni-yeni azərbaycanlı futbolçuların üzə çıxması üçün də müəyyən vəsait xərcləmək lazımdır.

Bu, təkcə “Qarabağ”a yox, “Şəfa”ya da, “İmişli”yə də, “Araz Naxçıvan”, “Şamaxı”ya da aiddir. Bütün klublar dövlətdən pul alır və həmin vəsait ancaq legioner futbolçuların transferlərinə xərclənir. Qazanan legionerlər, işbazlar, uduzan isə Azərbaycan futboludur, özü də böyük hesabla...

O gün Elvin Cəfərquliyev müsahibəsində “Əvəzedici komandada asfaltın üzərində məşq edirdim” deyirdisə, deməli, infrastruktur baxımından hardasa axsamalar, ciddi problemlər var. Futbola baxışı bir də bu istiqamətdən dəyişmək lazımdır. Futbolçu yetişdirmək birbaşa klubların işidir, daha gedib Afrika ölkələrindən çöldə-bayırda qalanları gətirib klubunda oynadacaqsansa, sənin Azərbaycan futboluna nə faydan var?..

Emin Səfərov - xitab24.az