Azərbaycanda dövlət idarəetmə strukturlarında mütəmadi olaraq kadr islahatları aparılır. Bunun nəticəsidir ki, bir sıra yüksək vəzifələri tutan məmurlar vəzifələrindən azad olunublar. Onlardan bəziləri başqa vəzifələrə təyin olunsalar da, birdəfəlik kreslosu ilə vidalaşanlar da az deyil.

Maraqlıdır ki, bir sıra məmurlar vəzifələrindən azad edilsələr də, onların yerinə hələlik təyinat olmayıb.

Bizim.Media boş qalan məmur kreslolarının siyahısını təqdim edir:

Ekologiya və təbii sərvətlər naziri

2018–2025-ci illərdə Azərbaycan Respublikasının ekologiya və təbii sərvətlər naziri ola Muxtar Babayev bu ilin fevralında vəzifəsindən azad edilib. O, Azərbaycan Respublikası Prezidentinin iqlim məsələləri üzrə nümayəndəsi təyin edilib. Lakin ekologiya və təbii sərvətlər naziri vəzifəsinə hələlik yeni təyinat olmayıb.

Qax rayonunun icra başçısı

Qax rayonu İcra Hakimiyyətinin başçısı Musa Şəkiliyev Dövlət Təhlükəsizliyi Xidmətinin (DTX) əməkdaşları tərəfindən 21 iyun 2025-ci il tarixində həbs edilib. Bundan sonra Prezident İlham Əliyevin sərəncamı ilə Şəkiliyev vəzifəsindən uzaqlaşdırılıb.

Culfa rayonunun icra başçısı

Culfa rayon İcra Hakimiyyətinin başçısı Siyam Hacıyev ötən ilin avqust ayında vəzifədən azad edilib. Hələlik onun yerinə heç kim təyin edilməyib.

“İri Şəhərlərin Birləşmiş Su Təchizatı Xidməti”nin İdarə Heyətinin sədri

“İri Şəhərlərin Birləşmiş Su Təchizatı Xidməti” publik hüquqi şəxsin İdarə Heyətinin sədri Köçərli Həsənov ötən ilin sentyabrında vəfat edib. O, İstanbulda ürək əməliyyatı keçirəndən sonra həyatını itirib. Köçərli Həsənovdan sonra sözügedən vəzifəyə təyinat olmayıb. Lakin “İri Şəhərlərin Birləşmiş Su Təchizatı Xidməti” publik hüquqi şəxsin İdarə Heyətinin sədrlik müvəqqəti olaraq Tahir Xəlilova həvalə olunub.

Nəsimi rayonunun icra başçısı

Nəsimi Rayon İcra Hakimiyyətinin sonuncu başçısı Asif Əsgərov olub. O, 2024-cü ilin sentyabrın 1-də keçirilən parlament seçkilərində Milli Məclisin deputat seçilib. Prezident İlham Əliyevin sərəncamı ilə Asif Əsgərov vəzifəsindən azad edilib. Onun yerinə hələlik təyinat olmayıb.

Naxçıvan MR Ali Məclisinin sədri

Naxçıvan Muxtar Respublikası Ali Məclisinin sədrinin kreslosu da bir neçə ildir ki, boşdur. Vasif Talıbov 21 dekabr 2022-ci il tarixdə bu vəzifədən istefa verib.

Dövlət Dəniz Akademiyasının rektoru

Azərbaycan Dövlət Dəniz Akademiyası da rektorsuz universitetlər sırasındadır. Ali təhsil müəssisəsinin rektoru Heydər Əsədov parlamentin deputatı seçildikdən sonra vəzifəsindən azad edilib.

Naxçıvan Müəllimlər İnstitutunun rektoru

Naxçıvan Müəllimlər İnstitutunun rektoru Azad Novruzov da Ali Məclisin deputatı seçildiyi üçün vəzifəsini itirib. O, oktyabrın 27-də vəzifəsindən azad edilib.

DSX Akademiyasının rəisi

Dövlət Sərhəd Xidməti (DSX) Akademiyasının rəisi general-mayor Azər İbrahimov bu ilin oktyabr ayında vəzifəsindən azad edilib. Akademiyanın rəisi vəzifəsinin icrası general-mayor Faiq Məmmədova həvalə edilib.

Ağdərə rayonunun icra başçısı

Başçısı olmayan qurumlardan biri də Ağdərə Rayonun İcra Hakimiyyətidir. 2023-cü ilin dekabr ayında Prezident İlham Əliyevin sərəncamı ilə Ağdərə Rayon İcra Hakimiyyəti yaradılıb. Qərarda Nazirlər Kabinetinə Ağdərə Rayon İcra Hakimiyyətinin fəaliyyətinin təşkili məqsədilə zəruri maliyyə vəsaitinin ayrılması və inzibati bina ilə təmin olunması üçün bir ay müddətində tədbirlər görməsi tapşırılıb. İcra Hakimiyyətinə hələlik başçı təyin olunmayıb.