Rosselxoznadzorun Ermənistandan karantin nəzarətinə məruz qalan məhsulların idxalını məhdudlaşdırmaq qərarı əsas ixrac mövqelərinə - tərəvəz, meyvə və gül bazarına zərbə vurub. Bu isə Ermənistanın xarici bazarların real şaxələndirilməsinə nə dərəcədə hazır olduğu ilə bağlı sualları daha da artırıb.

Musavat.com erməni mediasına istinadla bildirir ki, bunu iqtisadçı Suren Parsyan bildirib.

Ekspert ayrı-ayrı kateqoriyaların kritik asılılığını vurğulayıb: "Ermənistan meyvələrinin təxminən 90%-i Rusiyaya ixrac olunur, tərəvəzlər üçün isə bu rəqəm təxminən 98%-ə çatır". Onun sözlərinə görə, o deməkdir ki, Ermənistanın tərəvəz, meyvə, balıq məhsulları, spirtli içkilər və güllərin satışı üçün əsas bazarı 90%-dən çox Rusiya Federasiyasıdır. Hökumət əsasən bazarları Avropaya yönəltməyə diqqət yetirir, lakin Suren Parsyanın sözlərinə görə, Avropaya ixracın qarşısında əsas maneə tariflər deyil, standartlardır: “Ermənistan məhsulları olduqca sərt olan Avropa standartlarına və qaydalarına uyğun olmalıdır”.

Yeri gəlmişkən, Rosselxoznadzorun Ermənistan gül məhsullarının idxalını məhdudlaşdırmaq qərarından sonra gül istehsalçıları daxili bazarda satış həcmlərində və qiymətlərdə kəskin azalma ilə üzləşiblər.

Hakimiyyət orqanlarının alternativ bazarlara tədarükü təşkil etmək və sektora dəstək vermək vədinə baxmayaraq, bir çox fermer bu günə qədər yardım mexanizmləri barədə heç bir məlumat almadıqlarını söyləyir. News.am məhdudiyyətlərin sektora necə təsir etdiyini öyrənmək üçün Hrazdan stadionunun yaxınlığındakı topdansatış gül bazarında bir neçə istehsalçı arasında sorğu keçirib. Gülçülərin sözlərinə görə, məhdudiyyətlərin nəticələri təkcə ixrac üçün çalışan istehsalçılara deyil, həm də daxili bazara yönəlmiş satıcılara təsir edib. İxrac üçün nəzərdə tutulan məhsulun bir hissəsinin ölkədə qalması nəticəsində daxili bazarda artıq güllər yarandı və nəticədə qiymətlər kəskin şəkildə aşağı düşüb.

"Əvvəllər bir dəstə günəbaxan çiçəyi 2000 drama satılırdı, amma indi eyni dəstəni 200 drama güclə ala bilirlər. Hamı çiçəkləri xarab olmadan mümkün qədər tez satmağa çalışır", - istehsalçılardan biri deyib. Fermerlər artıq məhsullarının əhəmiyyətli bir hissəsini atmaq məcburiyyətində qaldıqlarını deyirlər. İqtisadiyyat Nazirliyi daha əvvəl bildirib ki, iyun ayının əvvəlindən bəri Avropa və Yaxın Şərq ölkələri də daxil olmaqla müxtəlif xarici bazarlara təxminən 961 min gül ixrac edilib.

Musavat.com xatırladır ki, Rusiya, Belarus, Qazaxıstan və Qırğızıstan Ermənistanın Avrasiya İqtisadi Birliyi və Avropa İtifaqına üzvlük arasında mümkün qədər tez qərar verməsini istəyirlər.

Bunu iyunun 22-də Rusiya Xarici İşlər Nazirliyinin sözçüsü Mariya Zaxarova “Novosti” agentliyinə verdiyi müsahibədə bildirib. "Rusiya, digər üç AİB ölkəsi - Belarus, Qazaxıstan və Qırğızıstan kimi, bu məsələdə mümkün qədər tez aydınlıq istəyir", - Zaxarova bildirib.

O, dörd AİB ölkəsinin liderlərinin 29 may tarixli Birgə Bəyanatında Ermənistanda mümkün qədər tez milli referendum keçirilməsinin vacibliyini vurğulamasının təsadüfi olmadığını vurğulayıb: “Çünki bu, Ermənistan Konstitusiyasında ölkənin fövqəlmilli beynəlxalq təşkilatlara üzvlüyü ilə bağlı qərar qəbul etmək üçün nəzərdə tutulan yeganə mexanizmdir”.

Zaxarova əlavə edib ki, bəyanatda Rusiya, Belarus, Qazaxıstan və Qırğızıstan hökumətlərinin bu ilin dekabr ayında keçiriləcək Ali Avrasiya İqtisadi Şurasının iclası üçün mövcud vəziyyəti təhlil edən birgə hesabat hazırlaması nəzərdə tutulur. "Bu cür işlər mütləq görüləcək", - deyə o, vurğulayıb.

Musavat.com