Son günlər SOCAR strukturlarında müşahidə olunan absurd ixtisar dalğası kifayət qədər narazılıqla müşaiyət olunur. "DİA-AZ" xəbər verir ki buna səbəb əsasən sıravi işçilərə şamil olunan ixtisarlar fonunda yuxarı heyətdə - SOCAR mərkəzi ofisində çalışanların sırasının günbəgün səbəbsiz olaraq genişləndirilməsi faktıdır.
Bildirək ki, sıravi SOCAR işçiləri Neftçilərin Hüquqlarının Müdafiəsi Təşkilatının (NHMT) sosial şəbəkə hesabında bu məsələyə olduqca sərt reaksiya veriblər. Həmin rəylərin bəzilərini təqdim edirik...
Nadir Xudiyev: "Özlərinə iş var... fəhlə işləməsə də, olar. İxtisara saldıqları fəhlə heyətinin maaşını da öz pullarının üstünə yazarlar..."
***
Əli Cavanşirov: " "SOCAR Polymer"də də eyni vəziyyətdur. 45 nəfər işçini ixtisar edirlər. Şərtlər də eynidir: ya öz xahişi ilə işdən çıxır, ya da 2 ay ixtisar xəbərdarlığı... sonra da 3 ay kompensasiya... Vəssalam.."
***
Cavid Nağıyev: "Görəsən, dünyanın aparıcı neft şirkətlərində - məsələn, BP-də, "Lukoyl" və sair neft şirkətlərdə neçə vitse prezident, müavin və müşavir ştatı var... Azərbaycanda neft hasilatı ildən ilə azalır... bu təbiidir. Yeni neft yataqları kəşf olunmur... lay təzyiqi aşağı düşür, neft layları sulaşır. Bu halda baş ofisdə müəyyən Ştatlar lazımsız olmalıdır. Burada isə əksinədir. Anlamırlar ki, hasilat azaldıqca gəlir azalır..."
***
Elsevər Əliyev: "Rovsən Nəcəfin işsiz qohumları hələ tam yerləşməyib.
Məsləhət görərdim, SOCAR-ı ROVSƏN NƏCƏFƏ versinlər... bəlkə sakitləşə. Maraqlisi nədir... "Azərqaz"da fəhlələri çıxarırlar... əvəzində isə "Azərqaz"da, SOCAR-da yeni rəhbər ştatları açırlar. Baş götürüb gedəsən bu ölkədən..."
***
ZN: "Mənə bir şey maraqlıdır: mərkəzi ofisdə oturanda iş necə gedəcək? Nefti, qazı kim çıxaracaq? Dəftər-kağız, sənəd-sünəd yazmaqla? Bizdə niyə hər şey tərsinə gedir? Niyə fəhləyə gün ağlamırsınız? Bütün işi, əziyyəti görən fəhlə heyətidir. Bu şirkətləri ayaqda saxlayan fəhlələrdir, onlar olmasa, şirkət bir gündə çökər. Oturub kağız yazmaqla heç nə düzələn deyil, araşdırsan, yarısından çoxu da havayı pul yeyənlərdir. Fəhləni ixtisar etməyin, maaşını artırın. İşçilərə qiymət verin, hamının ailəsi var, heç kim heç kimdən artıq deyil.."
Məsələ diqqətimizdədir... Mövzuya qayıdacağıq...
