“Xarici radiostansiyalar, xüsusilə ABŞ dövlət büdcəsindən maliyyələşən bəzi media orqanları Azərbaycanda əsasən təxribatla məşğul olub. Məni də zamanında bir-iki dəfə efirə dəvət ediblər, əsas məqsədləri kimlərləsə üz-üzə qoymaq idi. Məsələn, ora dəvət edilənlərə, siyahılar təqdim ediblər ki, kimlərinsə əleyhinə danışsınlar. Siyahıda Daxili İşlər, Milli Təhlükəsizlik, Fövqəladə Hallar və digər nazirliklərin də adları olub. Hansı qurumlar ki, bu media orqanlarının fəaliyyətinə mümkün qədər nəzarət ediblər, onların irəli getməsinin önünü kəsiblər, belə qurumlar daha çox tənqid edilib. Hamımız bilirik ki, bu media qurumları dövlət başçısı da daxil olmaqla hər kəsi tənqid edib, mümkün qədər şərləmək istəyiblər. Hətta onlara qarşı çıxış edən ziyalıları da arzuolunmaz şəxslər elan ediblər”.
Bu fikirləri “Reytinq” qəzetinə açıqlamasında Milli Məclisin keçmiş üzvü Cümşüd Nuriyev ABŞ dövlət büdcəsindən maliyyələşən bəzi xarici radiostansiyaların fəaliyyətinin dayandırılmasına münasibət bildirərkən deyib.
Professor Cümşüd Nuriyev bildirib ki, bu media qurumları fəaliyyət göstərdikləri ölkələrdə aranı qızışdırmağa, nifaq salmağa çalışıb, hədəfə aldıqları şəxslərə hücumlar ediblər: “Buna paralel olaraq USIAD də qeyri-hökumət təşkilatlarını qızışdırıb. ABŞ da gördü ki, heç nədən bu qurumların fəaliyyətinə 50 milyard dollar xərclənir, onları dayandırdı. Məsələn, bir ara bu qurumlar Azərbaycan və Ermənistan arasında milli ədavəti daha da qızışdırmağa xidmət ediblər. USAID isə xoşuna gəlməyən ölkədə “rəngli inqilablar” həyata keçirməyə çalışırdı. Eləcə də xoşlarına gəlməyən, onların sözü ilə oturub-durmayan prezidentləri, dövlət adamlarını nüfuzdan salmağa cəhd edirdilər. Bunlar heç də gizli məsələlər deyil. Diqqət edəndə görərsiniz ki, bu qurum ABŞ-nın kəşfiyyat xidmətlərindən təqaüdə çıxan yüksək çinli zabitləri müxtəlif proqramlar adı altında öz məqsədləri naminə işlədib, hansısa ölkələrə göndərib və s. Bu yollarla inqilabi şərait yaratmaq istəyiblər. Hesab edirəm ki, onların fəaliyyətinin dayandırılması çox müsbət haldır”.
Professor sonda deyib ki, USAID məkrli planlarını reallaşdırmaq üçün böyük pullar xərcləyib: “Bəzən isə bu pullar korrupsiya yolu ilə mənimsənilib. Ancaq aydındır ki, USIAD-lə əməkdaşlıq edənlər lazım gəlsə, atalarının da dosyesini hazırlayardılar. Qısası, milli şüur, milli maraq kimi dəyərlər onlar üçün əhəmiyyətli sayılmayıb”.
