Naxçıvan Muxtar Respublikası Ağır Cinayətlər Məhkəməsində 2008-ci ildə Rusiyada qətl törətməkdə təqsirləndirilən Rasim Əkbərovun (soyadı şərtidir) cinayət işinin bəzi detalları məlum olub.

Pravda.az-ın əldə etdiyi məlumata görə, hakim Hüseyn Məmmədovun sədrliyi ilə keçirilən prosesdə ittiham aktı elan olunub.

Qeyd: İstintaq orqanı təqsirləndirilən şəxsi qəsdən adam öldürməkdə ittiham etsə də, o, məhkəmədə ittihamı qismən qəbul edərək hadisənin istintaqın təsvir etdiyi kimi baş vermədiyini bildirib.

İttiham aktına əsasən, Rasim Əkbərov Azərbaycan Respublikası Cinayət Məcəlləsinin 120.1-ci (qəsdən adam öldürmə) maddəsi ilə ittiham irəli sürülüb.

Hadisə 2008-ci ildə Rusiya Federasiyasının Moskva şəhəri, Molostov küçəsində yerləşən yaşayış binasının köməkçi tikilisində baş verib. Həmin vaxt təqsirləndirilən şəxslə eyni binada yaşayan zərərçəkmiş Şahin İsmayılov arasında mübahisə yaranıb. Bu zaman Şahin onun ünvanına nalayiq ifadələr işlətməsi sonuncuda qisas hissi yaradıb. Bundan sonra Rasim Şahin İsmayılovu öldürmək qərarına gəlib.

Belə ki, təqsirləndirilən şəxs zərərçəkmişin yaşadığı otaqdan götürdüyü bıçaqla onun həyat üçün mühüm orqanlarından biri olan sol döş qəfəsinə bir zərbə endirib. Zərbə nəticəsində ürəyin ön pərdəsi və sol mədəciyi zədələnib, təxminən 2500 millilitr həcmində kəskin qan itirmə baş verib. Məhkəmə-tibbi ekspertizasının rəyinə görə, Şahin İsmayılov aldığı deşilmiş-kəsilmiş ürək yarasından yaranmış travmatik şok və qan itirmə nəticəsində hadisə yerində ölüb.

Məhkəmə istintaqında ifadə verən Rasim Əkbərov elan olunmuş ittiham üzrə özünü yalnız qismən təqsirli bildiyini deyib.

Onun sözlərinə görə, 2005-ci ildə işləmək məqsədilə Moskvaya gedərək qardaşının yanında fəhlə kimi çalışmağa başlayıb. O, mənzil istismar idarəsinin binasında azərbaycanlı işçilər üçün ayrılmış otaqlardan birində tək yaşayıb, digər otaqda isə Şahin İsmayılov dostları ilə birlikdə məskunlaşıb.

Təqsirləndirilən şəxs qeyd edib ki, hadisə baş verən gün axşam yeməyi hazırlayarkən Şahin İsmayılov əlində iki tərəfi itilənmiş bıçaqla onun otağına daxil olub və çay dəmləməsini istəyib. O isə vaxtının olmadığını, yeməkdən sonra işlərinin olduğunu bildirib. Bir müddət sonra Şahin yenidən qayıdıb. Bu dəfə Şahin onun saçından tutaraq boğazına bıçaq dirəyib və zorla öz otağına aparıb. Orada bıçaqla onun sol böyrünü yaralayıb.

Rasim ifadəsind deyib ki, qaçmağa çalışarkən Şahin yenidən üzərinə hücum edib. Bıçağı əlindən almağa cəhd göstərərkən özü də əlindən xəsarət alıb.

"Artıq başqa çıxış yolum yox idi. Onu çiynindən tutub itələdim, stolun üstünə yıxıldı və əlində olan bıçaq sinəsinə batdı", – deyə təqsirləndirilən şəxs məhkəmədə bildirib.

Onun sözlərinə görə, hadisədən sonra Şahin İsmayılov ayağa qalxa bilməyib və xırıldamağa başlayıb.

Təqsirləndirilən şəxs əlavə edib ki, əvvəlcə zərərçəkmişin hadisəni dramatikləşdirdiyini düşünüb və ona ayağa qalxmasını deyib. Lakin vəziyyətin ağır olduğunu anlayanda kömək çağırmaq üçün çölə qaçıb. Daha sonra yenidən otağa qayıdaraq ədyalı yerə sərib, Şahin İsmayılovu onun üzərinə uzadaraq xəstəxanaya aparmağa hazırlaşıb.

İfadəsinə görə, həmin vaxt yaralı ondan sinəsinə batmış bıçağı çıxarmağı dəfələrlə xahiş edib.

Əvvəlcə bıçağa toxunmaq istəmədiyini deyən təqsirləndirilən şəxs sonradan zərərçəkmişin israrlı xahişindən sonra bıçağı çıxardığını bildirib. Məhz həmin anda köməyə çağırdığı şəxslər otağa daxil olublar. Onlar bıçağı onun əlində gördükdə hadisənin necə baş verdiyini soruşublar.

Rasim vurğulayıb ki, daha sonra bir neçə nəfərin köməyi ilə Şahin İsmayılovu avtomobilə mindirərək xəstəxanaya aparmağa başlayıblar. Lakin xəstəxanaya çatmağa az qalmış avtomobildə olan şəxslərdən biri Şahin İsmayılovun artıq öldüyünü bildirib.

O deyib ki, ilk dəfə belə hadisə ilə üzləşdiyindən özünü itirib, qorxudan əsib. Avtomobildə olan şəxslərdən biri ona şillə vuraraq özünə gəlməsinə çalışıb. Həmin şəxslər xəstəxanaya getsələr hamısının saxlanılacağını dediklərinə görə geri qayıdaraq hadisə yerinə üz tutublar. Yolda olarkən həm polisə, həm də təcili tibbi yardıma məlumat verilib.

Təqsirləndirilən şəxs bildirib ki, hadisə yerinə qayıtdıqda polis və təcili yardım artıq orada olub. Yanında olan şəxslər avtomobildən düşərək qaçıblar, özü isə tibb işçilərinə yaxınlaşıb Şahin İsmayılovun xilas edilməsinin mümkün olub-olmadığını soruşub.

"Hətta lazım gələrsə, ürəyimi ona verəcəyimi dedim", – deyə o ifadəsində vurğulayıb.

Daha sonra hadisə yerindən ayrılan Rasim əvvəlcə Tula şəhərinə gedərək yaralarını sarıdığını, qanlı paltarlarını dəyişdiyini, daha sonra Volqoqrada, oradan isə Dağıstan vasitəsilə Azərbaycana qayıtdığını deyib.

Onun sözlərinə görə, Volqoqradda olarkən "Rıjı" ləqəbli Fariz adlı tanışı ona zəng edərək hadisədə istifadə olunan bıçağın məhv edildiyini deyib.

Məhkəmədə əlavə sualları cavablandıran təqsirləndirilən şəxs bildirib ki, Şahin İsmayılovu təxminən iki-üç il tanıyıb.

O iddia edib ki, aralarında əvvəllər heç vaxt ciddi münaqişə olmayıb. Əksinə, Şahin ona qarşı daim aqressiv münasibət göstərib, aldığı avtomobilə görə paxıllıq edib, hətta avtomobilini cızıb.

Rasim daha bir diqqətçəkən iddia səsləndirərək bildirib ki, hadisədən əvvəl Şahin onun otağına gizlicə daxil olub və bunu görən qohumuna "Mən sənin qaynını öldürmək istəyirəm" dediyi barədə sonradan məlumat alıb.

O, hadisə zamanı özü spirtli içki qəbul etmədiyini, lakin Şahin İsmayılovun sərxoş vəziyyətdə olduğunu düşündüyünü də əlavə edib.

Sonda təqsirləndirilən şəxs törətdiyi əməldən peşman olduğunu bildirib, ailəsinin yeganə dolanışıq mənbəyi olduğunu vurğulayaraq məhkəmədən ona bəraət verilməsini xahiş edib.

Məhkəmənin hökmü ilə Rasim Əkbərov cəzasını ümumi rejimli cəzaçəkmə müəssisələrində çəkməklə 7 il müddətinə azadlıqdan məhrum edilib.